ବିଜେପି ସହ ମେଣ୍ଟ କରିବେ କି ଓମାର ଅବଦୁଲ୍ଲା ? ଜମ୍ମୁ-କାଶ୍ମୀର ମୁଖ୍ୟମନ୍ତ୍ରୀ ସ୍ପଷ୍ଟ ଭାବେ କହିଲେ ...

ନୂଆଦିଲ୍ଲୀ :  ଜମ୍ମୁ କାଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଶନିବାର କହିଛନ୍ତି ଯେ, ତାଙ୍କ ଦଳ ରାଜ୍ୟରେ ଭାରତୀୟ ଜନତା ପାର୍ଟି (ବିଜେପି) ସହିତ କୌଣସି ମେଣ୍ଟ କରିବ ନାହିଁ। ଅବଦୁଲ୍ଲା ତାଙ୍କ ସରକାରର ଏକ ବର୍ଷ ପୂର୍ତ୍ତି ଅବସରରେ ଏଠାରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ତାଙ୍କ ଦଳ ନ୍ୟାସନାଲ କନଫରେନ୍ସ ରାଜ୍ୟରେ ବିଜେପି ସହ କୌଣସି ମେଣ୍ଟ କରିବ ନାହିଁ। ସେ ସ୍ପଷ୍ଟ କରିଛନ୍ତି ଯେ, ତାଙ୍କ ଦଳ କୌଣସି ପରିସ୍ଥିତିରେ ବିଜେପି ସହିତ ହାତ ମିଳାଇବ ନାହିଁ।

୨୦୧୫ରେ ପିପୁଲ୍ସ ଡେମୋକ୍ରାଟିକ୍ ପାର୍ଟି (ପିଡିପି) ଏବଂ ବିଜେପିର ଅସମାପ୍ତ ମେଣ୍ଟ ଜମ୍ମୁ କାଶ୍ମୀରକୁ ବିନାଶର ଦ୍ବାରଦେଶରେ ଠିଆ କରିଦେଇଥିଲା। ଆମେ ଏବେ ବି ଏହାର ପରିଣାମ ଭୋଗୁଛୁ। ମୁଁ ସେହି ଭୁଲର ଆଉ ପୁନରାବୃତ୍ତି କରିବି ନାହିଁ, ଯାହା ଅନ୍ୟମାନେ କରି ଥିଲେ। " ଅବଦୁଲ୍ଲା କହିଛନ୍ତି - କ୍ୟାବିନେଟରେ ଆହୁରି କିଛି ମନ୍ତ୍ରୀଙ୍କୁ ସାମିଲ କରାଯିବାର ସମ୍ଭାବନା ରହିଛି। ସେ କହିଛନ୍ତି ଏହି ବିଷୟ ମୋର ବିଚାରାଧୀନ ରହିଛି। ଉପନିର୍ବାଚନ ସମାପ୍ତ ହେବା ମାତ୍ରେ ଆମେ ମନ୍ତ୍ରିମଣ୍ଡଳକୁ ବିସ୍ତାର କରିବୁ।

ଅବଦୁଲ୍ଲା ଆହୁରି କହିଛନ୍ତି- ସରକାର ବର୍ତ୍ତମାନରେ କିଛି ସାମ୍ବିଧାନିକ ପ୍ରତିବନ୍ଧକ ଅଧୀନରେ କାର୍ଯ୍ୟ କରୁଛି, କାରଣ ଏହା ଏକ କେନ୍ଦ୍ରଶାସିତ ଅଞ୍ଚଳ। ମନ୍ତ୍ରୀଙ୍କ ସଂଖ୍ୟା ସୀମିତ କରି ଦିଆଯାଇଛି। ସେ କହିଛନ୍ତି, "ଏହା ବିଶ୍ବାସ କରିବା ଭୁଲ ଯେ , ଜଣେ ବ୍ୟକ୍ତି ମନ୍ତ୍ରୀ ନହେବା ପର୍ଯ୍ୟନ୍ତ ସେ ତାଙ୍କ ଅଞ୍ଚଳ ପାଇଁ କାମ କରି ପାରିବେ ନାହିଁ। ମୁଁ କେବଳ ଗଣ୍ଡେରବଲର ମୁଖ୍ୟମନ୍ତ୍ରୀ ନୁହେଁ, ବରଂ ସମଗ୍ର ଜମ୍ମୁ ଏବଂ କାଶ୍ମୀରର । ସେହିପରି ସକିନା ବେଗମ କେବଳ ନୂରାବାଦର ମନ୍ତ୍ରୀ ନୁହଁନ୍ତି, ବରଂ ସମଗ୍ର ରାଜ୍ୟ ପାଇଁ ସେବା କରୁଛନ୍ତି।"

ଅବଦୁଲ୍ଲା କହିଛ ଯେ, ଏହା ଦୁର୍ଭାଗ୍ୟଜନକ ଯେ, ଏହି ପ୍ରସଙ୍ଗକୁ ପହଲଗାମ ଘଟଣା ସହିତ ଯୋଡା ଯାଉଛି। ଏହି ଘଟଣା ପାଇଁ ନା ନିର୍ବାଚିତ ସରକାର ଦାୟୀ ଥିଲେ ନା ସାଧାରଣ ଜନତା ଏହାକୁ ସମର୍ଥନ କରିଥିଲେ। ଆକ୍ରମଣରେ ସାମିଲ ଥିବା ଲୋକମାନେ ଜମ୍ମୁ ଏବଂ କାଶ୍ମୀରର ନଥିଲେ । ସେ କହିଛନ୍ତି ଯେ, ବିଜେପି ଜମ୍ମୁ- କାଶ୍ମୀରକୁ ରାଜ୍ୟ ମାନ୍ୟତା ଫେରାଇ ଆଣିବାର ପ୍ରତିଶ୍ରୁତି ପୂରଣ କରିବା ଉଚିତ । ବିଜେପି କେବେ କ‌ହି ନଥିଲା ଯେ, ଜମ୍ମୁ-କାଶ୍ମୀରକୁ ରାଜ୍ୟର ମାନ୍ୟତା ସେତେବେଳେ ପୁନଃସ୍ଥାପିତ ହେବ , ଯେବେ ସେ କ୍ଷମତାକୁ ଆସିବ।

ମୁଖ୍ୟମନ୍ତ୍ରୀ କହିଛନ୍ତି, "ଯଦି ଏହା ସେମାନଙ୍କର ଉଦ୍ଦେଶ୍ୟ, ତେବେ ସେମାନେ ଖୋଲାଖୋଲି ଭାବରେ  ଜନସାଧାରଣଙ୍କ ନିକଟରେ କହିବା ଉଚିତ ଯେ, ଯେପର୍ଯ୍ୟନ୍ତ ଅଣ-ବିଜେପି ସରକାର କ୍ଷମତାରେ ରହିବ, ସେପର୍ଯ୍ୟନ୍ତ ରାଜ୍ୟର ମାନ୍ୟତା ପୁନଃସ୍ଥାପିତ ହେବ ନାହିଁ । ଏହାପରେ ଜନତା ନିଜେ ସ୍ଥିର କରିବେ କଣ କରିବାକୁ ହେବ।