ସିକ୍ୟୁରିଟି ଏଜେନ୍ସୀର ମନମାନି : ନକଲି ସାର୍ଟିଫିକେଟ୍‌ରେ ମିଳୁଛି ନିଯୁକ୍ତି, କମ୍ ଦରମା ମିଳୁଥିବା ଅଭିଯୋଗ

Published By : Prameya-News7 Bureau | July 06, 2024 IST

ଭଦ୍ରକ ୬।୭: ସରକାରୀ ମେଡିକାଲରେ ଘରୋଇ ସିକ୍ୟୁରିଟି ସଂସ୍ଥାର ମନମାନି । ସରକାରୀ ନିୟମ ଅନୁଯାୟୀ ମିଳୁନାହିଁ ଦରମା । ଅସ୍ଥାୟୀ ସିକ୍ୟୁରିଟି ଚାକିରି ପାଇଁ ମୋଟା ଅଙ୍କର ଡୋନେସନ ନିଆଯାଉଥିବା ବେଳେ, ଅନେକଙ୍କୁ ନକଲି ସାର୍ଟିଫିକେଟ୍ ନେଇ ଭର୍ତ୍ତି କରାଯାଉଥିବା ଅଭିଯୋଗ ଆସିଛି । ସବୁ ଘଟଣାକୁ ସଂସ୍ଥା ଭୁଲ ବୋଲି କହୁଥିବା ବେଳେ ଥାନାରେ ମାମଲା ପହଞ୍ଚିବା ପରେ ମେଡିକାଲ କର୍ତ୍ତୃପକ୍ଷ ଘଟଣାର ଗମ୍ଭୀରତାକୁ ଦେଖି ତଦନ୍ତ ନିର୍ଦ୍ଦେଶ ଦେଇଛନ୍ତି । 

ସୂଚନାଯୋଗ୍ୟ ଯେ, ଭଦ୍ରକ ଜିଲ୍ଲାର ପୁରୁଣା ଓ ନୂଆ ଜିଲ୍ଲା ମୁଖ୍ୟ ଡାକ୍ତରଖାନା, ୭ଟି ସିଏଚସି, ୫୧ଟି ପିଏଚସି ପାଇଁ ପ୍ରାୟ ୧୨୨ ଜଣରୁ ଅଧିକ ସିକ୍ୟୁରିଟି ନିଯୁକ୍ତି ପାଇଁ ଚୁକ୍ତି କରିଛି ଭବାନୀ ସିକ୍ୟୁରିଟି ଏଜେନ୍ସି । କିନ୍ତୁ ଏହି ସଂସ୍ଥାକୁ ଥାନାକୁ ଟାଣିଛନ୍ତି କେତେକ ସିକ୍ୟୁରିଟି କର୍ମଚାରୀ । ଲିଖିତ ଅଭିଯୋଗରେ ଗଣ୍ଡା ଗଣ୍ଡା ଅଭିଯୋଗ । ମୋଟା ଅଙ୍କର ଟଙ୍କା ନେଇ ନିଯୁକ୍ତି ଦେଇଛନ୍ତି ସତ, କିନ୍ତୁ ସରକାରୀ ଶ୍ରମ ବିଭାଗ ନିୟମ ଅନୁଯାୟୀ ଦରମା ଦିଆଯାଉନାହିଁ । କେହି ମୁହଁ ଖୋଲିଲେ ଚାକିରିରୁ ବିଦା କରାଯାଉଛି । ଏମିତି କି ଯେଉଁମାନଙ୍କୁ ନିଯୁକ୍ତି ଦିଆଯାଉଛି ସେମାନେ ମାଟ୍ରିକ୍ ପାସ୍ କରିନଥିଲେ ନକଲି ସାର୍ଟିଫିକେଟ୍‌ରେ ଭର୍ତ୍ତି କରାଯାଉଛି ବୋଲି ଅଭିଯୋଗ ହୋଇଛି । 

ଏହି ଘଟଣାକୁ ନେଇ କେତେକ ସିକ୍ୟୁରିଟି କର୍ମଚାରୀ ଭଦ୍ରକ ସହରାଞ୍ଚଳ ଥାନାରେ ଲିଖିତ ଅଭିଯୋଗ ଆଣିଛନ୍ତି । କିନ୍ତୁ ସିକ୍ୟୁରିଟି ସଂସ୍ଥାର ଅଧିକାରୀ କହିଛନ୍ତି ଯେ, ଅଭିଯୋଗ ଭିତ୍ତିହୀନ । ସଂସ୍ଥା ତରଫରୁ ସେମିତି କିଛି କରାଯାଉ ନାହିଁ । କିନ୍ତୁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଘଟଣାକୁ ଗମ୍ଭୀରତାର ସହ ନେଇଛନ୍ତି । ସେ କହିଛନ୍ତି ଯେ, ସିକ୍ୟୁରିଟି ସଂସ୍ଥା ଦ୍ୱାରା ନିଯୁକ୍ତ କର୍ମଚାରୀଙ୍କ କାଗଜପତ୍ର ଯାଞ୍ଚ ହେବ, ଯୋଗ୍ୟ ନଥିଲେ ବାହାର କରାଯିବା ସହ ସଂସ୍ଥା ଉପରେ କାର୍ଯ୍ୟାନୁଷ୍ଠାନ ନିଆଯିବ । ତେବେ ଖବର ମିଳିଛି ଯେ କର୍ମଚାରୀଙ୍କୁ କମ୍ ଦରମା ଦିଆଯାଉଛି ଓ ଏବେ ଠାରୁ ସଂସ୍ଥା ସିକ୍ୟୁରିଟି କର୍ମଚାରୀଙ୍କୁ ପ୍ରତ୍ୟେକ ମାସ ବ୍ୟାଙ୍କ ଆକାଉଣ୍ଟକୁ ଦରମା ଦେବେ ଓ ତଥ୍ୟ ଜିଲ୍ଲା ଚିକିତ୍ସାଅଧିକାରୀଙ୍କୁ ପ୍ରଦାନ କରିବେ । ତଥ୍ୟ ନଦେଲେ ସଂସ୍ଥାକୁ ଅର୍ଥ ପ୍ରଦାନ କରାଯିବ ନାହିଁ । 

You Can Read:

ସାଇକେଲକୁ ଧକ୍କା ଦେଲା ଟ୍ରକ୍, ନାବାଳକଙ୍କ ବାମ ଗୋଡରେ ଚଢିଗଲା ଚକ

 

 

  • odisha
  • OdishaNews
  • News7 Is Now On WhatsApp Join And Get Latest News Updates Delivered To You Via WhatsApp

    Rath Yatra

    Copyright © 2024 - Summa Real Media Private Limited. All Rights Reserved.