ଲୋକସଭା ନିର୍ବାଚନ ପରେ ଏବେ ୫ ରାଜ୍ୟର ବିଧାନସଭା ଉପରେ ସମସ୍ତଙ୍କ ନଜର: ବିଜେପି ଫୋକସ୍ରେ ମହାରାଷ୍ଟ୍ର ଓ ହରିଆଣା
Published By : Prameya-News7 Bureau | June 07, 2024 IST
![](https://api-news7.prameyanews7.com/prameya/document/post/2/2_180_1717782759936.webp)
livemint
ନୂଆଦିଲ୍ଲୀ: ସରିଲା ଲୋକସଭା ନିର୍ବାଚନ। ଏବେ ତୃତୀୟ ଥର ପାଇଁ ସରକାର ଗଢ଼ିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ତେବେ ଏଥର ନିର୍ବାଚନରେ ବିଜେପି ଯାହା ଚାହୁଁଥିଲା ତାହା ହେଲାନି। ମେଣ୍ଟ ୪୦୦ ପାର୍ ତ ଦୂରର କଥା ବହୁମତ ବି କଷ୍ଟରେ ଛୁଇଁଲା। ନିର୍ବାଚନରେ ଫଳାପଳ ଏମିତି ହୋଇଛି ଯେ ଶାସନ ଚଳାଇବାକୁ ହେଲେ ପିଏମ୍ ମୋଦୀଙ୍କୁ ସହଯୋଗୀଙ୍କୁ ଖୁସି କରିବାକୁ ପଡ଼ିବ। ଲୋକସଭା ନିର୍ବାଚନ ଯାହା ହେଲା ହେଲା। ଆଗକୁ ଏକାଧିକ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଛି। ତେଣୁ ସମସ୍ତଙ୍କ ଆଖି ଏହି ନିର୍ବାଚନ ଉପରେ ରହିଛି। ଜୁନ ୨୦୨୪ରୁ ନଭେମ୍ବର ୨୦୨୫ ମଧ୍ୟରେ ୫ ରାଜ୍ୟ- ହରିଆଣା, ମହାରାଷ୍ଟ୍ର, ଝାଡ଼ଖଣ୍ଡ, ଦିଲ୍ଲୀ ଏବଂ ବିହାର ନିର୍ବାଚନ ହେବ। ଜାମ୍ମୁ-କାଶ୍ମୀର ମଧ୍ୟ ନିର୍ବାଚନ ହେବାର ସମ୍ଭାବନା ରହିଛି।
ଏମାନଙ୍କ ମଧ୍ୟରୁ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ହରିଆଣା ଓ ମହାରାଷ୍ଟ୍ରର ବିଧାନସଭା ନିର୍ବାଚନ। କାରଣ ଏହି ଦୁଇ ରାଜ୍ୟ ଏବେ ବିଜେପି ଦଖଲ୍ରେ ରହିଛି। ଏଠି ବିଧାନସଭା ନିର୍ବାଚନକୁ ଆଉ ମାତ୍ର ୪ ମାସ ସମୟ ରହିଲା। ଚଳିତ ବର୍ଷ ଅକ୍ଟୋବର ମାସରେ ମହାରାଷ୍ଟ୍ର ଓ ହରିଆଣାରେ ନିର୍ବାଚନ ହେବ। ୨୦୨୪ରେ ବିଜେପିକୁ ଯେମିତି ଝଟ୍କା ଲାଗିଲା ଦୁଇ ରାଜ୍ୟ ବିଧାନସଭାରେ ନିର୍ବାଚନରେ ଯେମିତି ସେଭଳି ସ୍ଥିତି ଭୋଗିବାକୁ ନପଡ଼େ ଏଥିପାଇଁ ବିଜେପି ଫୁଲ୍ ଦମ୍ରେ ଲାଗିପଡ଼ିବ।
ବର୍ତ୍ତମାନ ମହାରାଷ୍ଟ୍ରରେ ଏକ୍ନାଥ ସିନ୍ଦେଙ୍କ ଶିବସେନା, ବିଜେପି ଓ ଅଜିତ ପାୱାରଙ୍କ ଏନ୍ସିପିର ମହାୟୁତି ମେଣ୍ଟ ସରକାର ରହିଛି। ଏହି ସରକାର ଉଦ୍ଧବ ଶିବସେନା, ଶରଦ ପାୱାରଙ୍କ ଏନ୍ସିପି ଓ କଂଗ୍ରେସ ମେଣ୍ଟ ମହା ବିକାଶ ଅଘାଡ଼ି(ଏମ୍ଭିଏକୁ) ଭାଙ୍ଗି ଗଠନ ହୋଇଥିଲା। ଅପରପକ୍ଷରେ ଅଜିତ ପାୱାର ଓ ଏକନାଥ ସିନ୍ଦେ ବିଦ୍ରୋହ କରି ଦଳ ଛଡ଼ାଇ ଆଣିଥିଲେ। ଯାହାର ପ୍ରଭାବ ଜନତାଙ୍କ ଉପରେ ପଡ଼ିପାରେ।
ଏଥିପାଇଁ ଲୋକଙ୍କ ସମ୍ବେଦନଶୀଳତା ଏମ୍ଭିଏ ପାଖକୁ ଯାଇପାରେ। ୨୦୨୪ ଲୋକସଭା ନିର୍ବାଚନରେ ମହାବିକାଶ ଅଘାଡ଼ି ମେଣ୍ଟକୁ ଅଧିକ ଆସନ ମିଳିଛି। ହେଲେ ମହାୟୁତି ଫେଲ୍ ମାରିଛି। ବିଧାନସଭା ରେଜଲ୍ଟରେ ମଧ୍ୟ ଏହାର ପ୍ରଭାବ ପଡ଼ିପାରେ ବୋଲି ଏନ୍ସିପି ସୁପ୍ରିମୋ ଶରଦ ପାୱାର କହିଛନ୍ତି। ତେବେ ଲୋକସଭାର ପ୍ରଭାବ ଯେ ବିଧାନସଭା ନିର୍ବାଚନ ଉପରେ ପଡ଼ିବା ତାର କିଛି ଗ୍ୟାରେଣ୍ଟି ମଧ୍ୟ ନାହିଁ।
ଏ କ୍ଷେତ୍ରରେ ଦିଲ୍ଲୀକୁ ଆମେ ଉଦାହରଣ ଭାବେ ନେଇପାରିବା। ଦିଲ୍ଲୀରେ ୨୦୧୪ ଓ ୨୦୧୯ରେ ବିଜେପି ସମସ୍ତ ୭ଟି ଲୋକସଭା ଆସନରେ ବିଜୟୀ ହୋଇଥିଲା। ହେଲେ ୨୦୧୫ ଓ ୨୦୨୦ ବିଧାନସଭା ନିର୍ବାଚନରେ ଆପ୍ ବାଜି ମାରିଥିଲା। ଚଳିତ ବର୍ଷ ବି ବିଜେପି ସମସ୍ତ ୭ଟି ଲୋକସଭା ଜିତିଛି। ତେବେ ଫେବ୍ରୁଆରୀ ୨୦୨୫ରେ ହେବାକୁ ବିଧାନସଭା ନିର୍ବାଚନ ଫଳାଫଳ କ’ଣ ହେବା ତା ଊପରେ ସମସ୍ତଙ୍କ ନଜର ରହିବ। ନିର୍ବାଚନକୁ ନେଇ ଆମ ଆଦ୍ମି ପାର୍ଟି ପୂର୍ବରୁ ନିଜର ସ୍ଥିତି ସ୍ପଷ୍ଟ କରି ସାରିଛି। ବିଧାନସଭା ନିର୍ବାଚନରେ ଦଳ କଂଗ୍ରେସ ସହ ମେଣ୍ଟ କରି ନିର୍ବାଚନ ଲଢିବ ନାହିଁ ବୋଲି ଆପ୍ ନେତା ଗୋପାଳ ରାୟ କହି ସାରିଛନ୍ତି।
ସେହିପରି ଝାଡ଼ଖଣ୍ଡରେ ମଧ୍ୟ ଦିଲ୍ଲୀ ପରି ସ୍ଥିତି ହୋଇଥିଲା। ୨୦୧୯ ଲୋକସଭା ନିର୍ବାଚନରେ ବିଜେପି ଏଠି ୧୧ ଆସନରେ ବିଜୟୀ ହୋଇଥିଲା। କିନ୍ତୁ ସେହିବର୍ଷ ବିଧାନସଭା ନିର୍ବାଚନରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ଠାରୁ ଦଳ ହାରିଯାଇଥିଲା। ତେବେ ୨୦୨୪ ନିର୍ବାଚନରେ ଝାଡ଼ଖଣ୍ଡରୁ ବିଜେପିର ଲୋକସଭା ଆଶନ କମିଛି। ଏଥର ବିଜେପି ମାତ୍ର ୮ଟି ଆସନ ଜିତିଥିବା ବେଳେ ଜେଏମ୍ଏମ୍ ୩ ଆସନ ପାଇଛି। ୨୦୧୯ରେ ଜେଏମ୍ଏମ୍ ମାତ୍ର ଗୋଟିଏ ଆସନ ଜିତିଥିଲା।
କିନ୍ତୁ ହରିଆଣାରେ ହାୱା କଗ୍ରେସ ଆଡ଼କୁ ବୋହୁଛି। ଏଠାରେ ୨୦୨୪ ଲୋକସଭା ଆସନରେ ବିଜେପି ଓ କଂଗ୍ରେସ ଉଭୟ ୫ଟି ଲେଖାଏ ଆସନ ଜିତିଛନ୍ତି। ୨୦୧୯ ଲୋକସଭା ଆସନରେ ତୁଳନାରେ ବିଜେପିର ଭୋଟ ଶେୟାର ୫୮ ପ୍ରତିଶତରୁ ୪୬ ପ୍ରତିଶତକୁ ହ୍ରାସ ପାଇଛି। ହେଲେ କଂଗ୍ରେସ ଭୋଟ୍ ଶେୟାର ୨୮.୫ ପ୍ରତିଶତରୁ ୪୩.୬୭ ପ୍ରତିଶତକୁ ବୃଦ୍ଧି ପାଇଛି। କଂଗ୍ରେସ ଆପ୍ ମେଣ୍ଟର ଭୋଟ ଶେୟାର ମଧ୍ୟ ବିଜେପି ତୁଳନାରେ ବଢ଼ିଛି। ସେପଟେ ୩ ସ୍ୱାଧୀନ ବିଧାୟକ ମଧ୍ୟ ବିଜେପି ଠାରୁ ସମର୍ଥନ ପ୍ରତ୍ୟାହାର କରି ନେଇଛନ୍ତି।
ସେପଟେ ବିହାର କଥା ଦେଖିଲେ ଜେଡିୟୁ-ବିଜେପି ମେଣ୍ଟ ଚଳିତ ବର୍ଷ ଲୋକସଭା ନିର୍ବାଚନରେ ଭଲ ପ୍ରଦର୍ଶନ କରିଛନ୍ତି। ବିଜେପି ଅପେକ୍ଷା ଆଞ୍ଚଳିକ ଦଳ ଜେଡିୟୁ ଅଧିକ ଆସନ ପାଇଛି। ବର୍ତ୍ତମାନ ନୀତୀଶ କୁମାର ବିଜେପି ସହ ମେଣ୍ଟ କରି କ୍ଷମତାରେ ଅଛନ୍ତି। ବିହାରରେ ୨୦୨୫ରେ ଅକ୍ଟୋବର-ନଭେମ୍ବରରେ ବିଧାନସଭା ନିର୍ବାଚନ ହେବ। ୨୦୧୯ ନିର୍ବାଚନରେ ବିଜେପିର ବିପୁଳ ବିଜୟ ସତ୍ତ୍ୱେ ବି ୨୦୨୦ରେ ବିହାରରେ ଆରଜେଡି ଏକମାତ୍ର ବଡ଼ ଦଳ ଭାବେ ଉଭା ହୋଇଥିଲା। ଦଳକୁ ଏକାକୀ ସର୍ବାଧିକ ଆସନ ମିଳିଥିଲା। ତେଣୁ ଆସନ୍ତା ନିର୍ବାଚନରେ ଦଳ କେଉଁ ସ୍ଥାନରେ ରହିବା ତାହା ଦେଖିବା ବାକି ରହିଲା।
ସେପଟେ ଜାମ୍ମୁ-କାଶ୍ମୀର ଚଳିତ ବର୍ଷ ଶେଷ ସୁଦ୍ଧା ବିଧାନସଭା ନିର୍ବାଚନ ହେବ। ଧାରା ୩୭୦ ଏ ଉଠିବା ପରେ ସେଠାରେ ପୂର୍ବ ଅପେକ୍ଷା ଶାନ୍ତି ଫେରିଛି। ଆତଙ୍କବାଦୀ ଓ ଉଗ୍ରବାଦର ଦମନ ହେବା ଯୋଗୁ ସେଠାରେ ପର୍ଯ୍ୟଟକଙ୍କ ସଂଖ୍ୟା ବି ବଢିଛି। ଜାମ୍ମୁ-କାଶ୍ମୀରବାସୀ ଏଥର ନିର୍ବାଚନରେ କାହାକୁ ଭୋଟ୍ ଦେବେ ତାହା ସବୁଠାରୁ ରୋଚକ ହେବ।