ଏୟାର ଇଣ୍ଡିଆ ପ୍ଲେନ କ୍ରାସ୍: ‘ପାଇଲଟ୍‌ଙ୍କୁ ଦୋଷୀ ଦର୍ଶାଯାଇ ନାହିଁ’, କେନ୍ଦ୍ର ଓ ଡିଜିସିଏକୁ ଜବାବ ମାଗିଲେ ସୁପ୍ରିମକୋର୍ଟ

ନୂଆଦିଲ୍ଲୀ: ସୁପ୍ରିମକୋର୍ଟ ଏୟାର ଇଣ୍ଡିଆ ବିମାନ ଦୁର୍ଘଟଣାର ସ୍ୱତନ୍ତ୍ର ଯାଞ୍ଚ ଦାବି କରୁଥିବା ଆବେଦନ ଉପରେ ଶୁଣାଣି କରୁଛନ୍ତି । ଶୁଣାଣି ବେଳେ ଶୀର୍ଷ ଅଦାଲତ ଦିବଗଙ୍ଗ ପାଇଲଟଙ୍କ ବାପାଙ୍କ ଆବେଦନ ଉପରେ କେନ୍ଦ୍ର ଓ ଡିଜିସିଏକୁ ଜବାବତଲବ କରିଛନ୍ତି । ପୂର୍ବରୁ, କୋର୍ଟ ମୃତ ପାଇଲଟ ସୁମିତ୍ ସବରୱାଲଙ୍କ ବାପାଙ୍କୁ କହିଥିଲେ ଯେ ତାଙ୍କ ପୁଅକୁ ଦୋଷ ଦେବାର ଭାର ତାଙ୍କୁ ବହନ କରିବାକୁ ପଡ଼ିବ ନାହିଁ ।

ଏହି ମାମଲାରେ କେନ୍ଦ୍ର ସରକାର ସୁପ୍ରିମକୋର୍ଟଙ୍କୁ କହିଛନ୍ତି ଯେ ଏୟାର ଇଣ୍ଡିଆ ବିମାନ ଦୁର୍ଘଟଣାର ତଦନ୍ତ ପାଇଁ ଅନ୍ତର୍ଜାତୀୟ ବ୍ୟବସ୍ଥା ଅଧିନରେ ବିମାନ ଦୁର୍ଘଟଣା ଯାଞ୍ଚ ବ୍ୟୁରୋ (ଏଏଆଇବି) ତଦନ୍ତକାରୀ ଦଳ ଗଠନ କରାଯାଇଛି । ଏହାସହ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ସ୍ପଷ୍ଟ କରିଛି ଯେ ପ୍ରାରମ୍ଭିକ ରିପୋର୍ଟରେ ବିମାନ ଦୁର୍ଘଟଣା ପାଇଁ ଏୟାର ଇଣ୍ଡିଆ ପାଇଲଟଙ୍କୁ ଦୋଷୀ ଦର୍ଶାଯାଇ ନାହିଁ ।

ଜୁନ୍ ୧୨ରେ ଅହମ୍ମଦାବାଦରୁ ଲଣ୍ଡନ ଅଭିମୁଖେ ଉଡାଣ ଭରିଥିବା ଏୟାର ଇଣ୍ଡିଆର ବୋଇଙ୍ଗ ୭୮୭ ଡ୍ରିମଲାଇନର ଟେକ୍ ଅପ୍ କରିବାର ମାତ୍ର ୩୨ ସେକେଣ୍ଡ ପରେ କ୍ରାସ୍ ହୋଇଥିଲା । ଏହି ଦୁର୍ଘଟଣାରେ ୨୬୦ ଜଣଙ୍କ ମୃତ୍ୟୁ ହୋଇଥିଲା ।

ଏଏଆଇବିର ପ୍ରାଥମିକ ତଦନ୍ତ ରିପୋର୍ଟ ଆସିବା ପରେ ବିମାନର ପାଇଲଟ୍‌ଙ୍କ ଅବହେଳା କଥା ସାମନାକୁ ଆସିଥିଲା । ରିପୋର୍ଟରେ କୁହାଯାଇଥିଲା ଯେ ଉଡାଣ ଭରିବାର ତୁରନ୍ତ ପରେ ଦୁଇ ଇଞ୍ଜନକୁ ଇନ୍ଧନ ଯୋଗାଣ ବନ୍ଦ ହୋଇଯାଇଥିଲା । ତଦନ୍ତରେ କୁହାଯାଇଥିଲା ଯେ ଫୁଏଲ୍ କଣ୍ଟ୍ରୋଲ ସ୍ୱିଚ୍ ଗୋଟିଏ ପରେ ଗୋଟିଏ କଟ୍‌ଅଫ୍ ସ୍ଥିତିକୁ ଆସିଥିଲା । ତେବେ ୧୦ ସେକେଣ୍ଡ ପରେ ସ୍ୱିଚ୍‌କୁ ପୁଣି ଥରେ ଅନ୍ କରାଯାଇଥିଲା, କିନ୍ତୁ ସେତେବେଳେକୁ ଇଞ୍ଜିନ ଜଳି ସାରିଥିଲା ଏବଂ ଏଥିପାଇଁ ଦୁର୍ଘଟଣା ଘଟିଥିଲା ।