LIVE TV
News7 Logo

ଅହମ୍ମଦାବାଦରେ ହେବ ୨୦୩୦ ରାଜ୍ୟଗୋଷ୍ଠୀ କ୍ରୀଡ଼ା, ୨୦ ବର୍ଷ ପରେ ଭାରତକୁ ମିଳିଲା ଆୟୋଜନ ଅଧିକାର

Published By: Ajit - Prameya-News7 Bureau | October 15, 2025 08:31 PM
NEWS7
commonwealth game

ନୂଆଦିଲ୍ଲୀ: ଭାରତକୁ ପୁଣି ଥରେ ରାଜ୍ୟଗୋଷ୍ଠୀ କ୍ରୀଡା ଆୟୋଜନ କରିବାର ଅଧିକାର ମିଳିଛି । ଭାରତ ଶେଷ ଥର ପାଇଁ ୨୦୧୦ରେ ନୂଆଦିଲ୍ଲୀରେ ରାଜ୍ୟଗୋଷ୍ଠୀ କ୍ରୀଡା ଆୟୋଜନ କରିଥିଲା । ଏବେ ୨୦୩୦ରେ ଗୁଜରାଟର ଅହମ୍ମଦାବାଦକୁ ଆୟୋଜନ ଅଧିକାର ଦିଆଯାଇଛି । ଏହାର ଅର୍ଥ ହେଉଛି ୨୦ ବର୍ଷ ପରେ ଭାରତୀୟ କ୍ରୀଡା ପ୍ରେମୀମାନେ ପୁଣି ଥରେ ଭାରତରେ ବିଭିନ୍ନ ଖେଳ ପ୍ରତିଯୋଗିତାକୁ ଉପଭୋଗ କରିବାର ସୁଯୋଗ ପାଇବେ ।

୨୦୩୦ ରାଜ୍ୟଗୋଷ୍ଠୀ କ୍ରୀଡା ପାଇଁ ଭାରତର ଅହମ୍ମଦାବାଦକୁ ଆୟୋଜକ ଭାବରେ ମନୋନୀତ କରାଯାଇଛି ବୋଲି ବୁଧବାର କମନୱେଲ୍‌ଥ ଏକ୍ସିକ୍ୟୁଟିଭ୍ ବୋର୍ଡ ସ୍ପଷ୍ଟ କରିଛି । ବୋର୍ଡ ଏବେ ଗ୍ଲାସଗୋରେ ହେବାକୁ ଥିବା ରାଜ୍ୟଗୋଷ୍ଠୀ କ୍ରୀଡା ସାଧାରଣ ପରିଷଦରେ ଫୁଲ୍ ମେମ୍ୱର କମନୱେଲଥ୍ ସ୍ପୋର୍ଟ୍ସ ମେମ୍ୱରଶିପ୍ ସାମନାରେ ନିଜ ସୁପାରିଶ ଉପସ୍ଥାପନ କରିବ ।

ଅହମ୍ମଦାବାଦ ନାଁରେ ଏହି ଉପଲବ୍ଧି ପରେ ଗୃହମନ୍ତ୍ରୀ ଅମିତ ଶାହ ଏକ୍ସରେ ପ୍ରଧାନମନ୍ତ୍ରୀ ମୋଦୀଙ୍କ ପ୍ରୟାସକୁ ପ୍ରଶଂସା କରିଛନ୍ତି । ଏହା ଭାରତ ପାଇଁ ଗର୍ବର ମୁହୂର୍ତ୍ତ ବୋଲି ସେ କହିଛନ୍ତି । ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ମଧ୍ୟ ଏହାକୁ ଭାରତ ଏବଂ ଗୁଜରାଟ ଉଭୟ ପାଇଁ ଏକ ଗର୍ବର ମୁହୂର୍ତ୍ତ ବୋଲି କହି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରୟାସକୁ ପ୍ରଶଂସା କରିଛନ୍ତି ।

ଗୃହମନ୍ତ୍ରୀ ଅମିତ ଶାହ ଏକ୍ସରେ ଲେଖିଛନ୍ତି, "ଭାରତ ପାଇଁ ଏକ ଅତ୍ୟନ୍ତ ଆନନ୍ଦ ଏବଂ ଗର୍ବର ଦିନ । ଅହମ୍ମଦାବାଦରେ ୨୦୩୦ରେ ହେବାକୁ ଥିବା ରାଜ୍ୟଗୋଷ୍ଠୀ କ୍ରୀଡା ଆୟୋଜନ କରିବା ପାଇଁ ଭାରତର ଦାବିକୁ ରାଜ୍ୟଗୋଷ୍ଠୀ ସଂଘ ଅନୁମୋଦନ କରିଥିବାରୁ ଭାରତର ପ୍ରତ୍ୟେକ ନାଗରିକଙ୍କୁ ହାର୍ଦ୍ଦିକ ଅଭିନନ୍ଦନ । ଏହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଶ୍ୱ କ୍ରୀଡ଼ା ମାନଚିତ୍ରରେ ଭାରତକୁ ସ୍ଥାନିତ କରିବା ପାଇଁ ନିରନ୍ତର ପ୍ରୟାସ ଫଳ ।"​​​​​​​

୨୦୩୦ ରାଜ୍ୟଗୋଷ୍ଠୀ କ୍ରୀଡ଼ା ଆୟୋଜନ ପାଇଁ ଭାରତ ନାଇଜେରିଆ ସହ ପ୍ରତିଯୋଗିତା କରୁଥିଲା । କିନ୍ତୁ ରାଜ୍ୟଗୋଷ୍ଠୀ କ୍ରୀଡ଼ା ଭବିଷ୍ୟତ କ୍ରୀଡ଼ା ପାଇଁ ଆଫ୍ରିକୀୟ ଦେଶର ଆୟୋଜକ ମହତ୍ତ୍ୱାକାଂକ୍ଷାକୁ "ସମର୍ଥନ ଏବଂ ତ୍ୱରାନ୍ୱିତ କରିବା ପାଇଁ ଏକ ରଣନୀତି ବିକଶିତ" କରିବାକୁ ନିଷ୍ପତ୍ତି ନେଇଛି । ୨୦୩୪ କ୍ରୀଡ଼ା ଆୟୋଜନ କରିବା ବିଷୟରେ ବିଚାର କରାଯାଉଛି ।