ଯୌତୁକ ଯୋଗୁ ବ୍ୟବସାୟ ପାଲଟିଛି ବାହାଘର, ସୁପ୍ରିମକୋର୍ଟ କହିଲେ- ନଷ୍ଟ ହେଉଛି ବିବାହର ପବିତ୍ରତା

ନୂଆଦିଲ୍ଲୀ ୨୯।୧୧: ସୁପ୍ରିମକୋର୍ଟ କହିଛନ୍ତି ଯେ ବିବାହ ପାରସ୍ପରିକ ବିଶ୍ୱାସ, ଜଣେ ଜଣକ ସହିତ ସମ୍ମାନ ଉପରେ ସ୍ଥାପିତ ପବିତ୍ର ଓ ଉତ୍କୃଷ୍ଟ ସଂସ୍ଥା। ତେବେ ଦୁଃଖର କଥା ଯୌତୁକ କାରଣରୁ ଏହି ପବିତ୍ର ବନ୍ଧନ ଏବେ କେବଳ ଏକ ବ୍ୟବସାୟୀକ ନେଣଦେଣ ହୋଇ ରହିଯାଇଛି। ସୁପ୍ରିମକୋର୍ଟଙ୍କ ଜଷ୍ଟିସ୍ ବି.ଭି.ନାଗରତ୍ନା ଓ ଜଷ୍ଟିସ୍ ଆର.ମହାଦେବନଙ୍କ ବେଞ୍ଚ କହିଛନ୍ତି ଯେ ଯୌତୁକ ହତ୍ୟା କେବଳ ଜଣେ ବ୍ୟକ୍ତି ନୁହେଁ ବରଂ ପୁରା ସମାଜ ବିରୋଧରେ ଅପରାଧ।

ବେଞ୍ଚ କହିଛନ୍ତି ଯେ ଯୌତୁକରେ ଇଛାରେ ଦିଆଯାଇଥିବା ଉପହାରକୁ ପ୍ରାୟତଃ ଲୁଚାଇବାକୁ ଉଦ୍ୟମ କରା ଯାଏ। ତେବେ ଅସଲରେ ଏହା ସାମାଜିକ ପ୍ରତିଷ୍ଠା ଦେଖାଇବାକୁ ଓ ଆର୍ଥିକ ଲାଳଶା ପୁରଣ କରିବାର ଜରିଆ ପାଲଟି ଯାଇଛି। ପୀଠ ଏହି ବୟାନ ଏପରି ଏକ ବ୍ୟକ୍ତିର ଜାମିନ ରଦ୍ଦ କରିବା ଅବସରରେ ଦେଇଛନ୍ତି ଯାହା ଉପରେ ବିବାହର ମାତ୍ର ୪ ମାସ ପରେ ଯୌତୁକ ପାଇଁ ପତ୍ନୀଙ୍କୁ ବିଷ ଦେଇଥିବାର ଅଭିଯୋଗ ରହିଛି। ସେହି ବ୍ୟକ୍ତିକୁ ଜାମିନ ଦେବା ପାଇଁ ହାଇକୋର୍ଟଙ୍କ ରାୟକୁ ଅବ୍ୟବସ୍ଥିତ ଓ କାୟମ ରହିବାକୁ ଅଯୋଗ୍ୟ ବୋଲି କହିଛନ୍ତି। କାରଣ ଏଥିରେ ଅପରାଧର ଗମ୍ଭୀରତା, ମୃତ୍ୟୁପୂର୍ବରୁ ଦିଆଯାଇଥିବା ଜମାନବନ୍ଦୀ ଓ ଯୌତୁକ ହତ୍ୟାର ଆଇନଗତ ବିଚାରକୁ ନଜର ଅନ୍ଦାଜ କରାଯାଇଛି।

ସୁପ୍ରିମକୋର୍ଟ କହିଛନ୍ତି ଯୌତୁକ କେବଳ ଏକ ସାମାଜିକ ବ୍ୟାଧି ନୁହେଁ, ଏହା କେବଳ ବିବାହର ପବିତ୍ରତାକୁ ନଷ୍ଟ କରୁନି ବରଂ ମହିଳାଙ୍କୁ ଲଗାତାର ଜୁଲମ ଓ ଚାପରେ ରଖିଥାଏ। ଯେତେବେଳେ ଏପରି ଦାବି ସୀମା ପାର କରିଯାଏ ଓ କ୍ରୁରତାରେ ବଦଳି ଯାଏ ଅଥବା ଏହାଠୁ ବି ଖରାପ ଯାହା ଅସମୟରେ ଏକ ନବବଧୂର ଜୀବନ ନେଇଯାଏ ସେତେବେଳେ ଏହା ପରିବାରର ପରିସରରୁ ବାହାରି ଗୁରୁତର ସାମାଜିକ ଅପରାଧର ରୂପ ନେଇଥାଏ। ଏହା କେବଳ ବ୍ୟକ୍ତିଗତ ଦୁଃଖଦ ଘଟଣା ହୋଇ ରହି ନଥାଏ ବରଂ ସମାଜର ସାମୂହିକ ଚେତନାର ଅପମାନ ପାଲଟି ଯାଏ।

ବେଞ୍ଚ କହିଛନ୍ତି ଯେ ଯୌତୁକ ପାଇଁ ହତ୍ୟା ଏହି ସାମାଜିକ ବ୍ୟାଧିର ସବୁଠୁ ଘୃଣ୍ୟ କୃତ୍ୟ ମଧ୍ୟରୁ ଅନ୍ୟତମ। ଏଥିରେ ଜଣେ ଯୁବତୀଙ୍କ ଜୀବନକୁ ଶାଶୂ ଘରେ ସମାପ୍ତ କରିଦିଆଯାଏ, ଯେଉଁଥିରେ ତାର କୌଣସି ଭୁଲ ନଥାଏ, ବରଂ ସେ ଅନ୍ୟମାନଙ୍କର କେବେବି ସମାପ୍ତ ହେଉନଥିବା ଲାଳଶା ପୂରଣ କରିବାରେ ବଳି ଚଢି ଯାଏ। ଶୀର୍ଷ ନ୍ୟାୟାଳୟ କହିଛନ୍ତି ଯେ ଏପରି ଜଘନ୍ୟ ଅପରାଧ ମାନବୀୟ ଗାରିମା ଉପରେ ଆକ୍ରମଣ ଓ ଅନୁଚ୍ଛେଦ ୧୪ ଏବଂ ୨୧ ଅନୁସାରେ ସମାନତାର ସହ ସମ୍ମାନରେ ବଞ୍ଚିବାର ସାମ୍ବିଧାନିକ ଗ୍ୟାରେଣ୍ଟିର ଉଲ୍ଲଂଘନ।

ଏହା ସମୂଦାୟର ନୈତିକ ମୂଲ୍ୟକୁ ସମାପ୍ତ କରିବା, ମହିଳାଙ୍କ ବିରୋଧରେ ହିଂସାକୁ ସାଧାରଣ କଥାରେ ପରିଣତ କରିବା ଓ ଏକ ସଭ୍ୟ ସମାଜର ନିଅଁକୁ ଭାଙ୍ଗିବା ସହ ସମାନ। ଏପରି ଅତ୍ୟାଚାର ସାମ୍ନାରେ କୋର୍ଟଙ୍କ ନିଷ୍କ୍ରିୟତା ଓ ତ୍ରୁଟିପୂର୍ଣ୍ଣ ନରମ ଆଚରଣ ଅପରାଧୀଙ୍କ ସାହାସକୁ ବଢାଇବ ଓ ନ୍ୟାୟ ଏବଂ ପ୍ରଶାସନ ଉପରେ ଜନତାଙ୍କ ଭରସାକୁ କ୍ଷୁର୍ଣ୍ଣ କରିବ। ଏଭଳି ସ୍ଥଳେ ଜାମିନ ମଞ୍ଜୁର କରିବା କୋର୍ଟଙ୍କ ପକ୍ଷେ ଅସମ୍ଭବ ବୋଲି ବେଞ୍ଚ କହିଛନ୍ତି।