ଓଡିଶା ପାଇଁ ଖୁସି ଖବର, ବିଶ୍ୱର ଶ୍ରେଷ୍ଠ ୨ପ୍ରତିଶତ ବୈଜ୍ଞାନିକଙ୍କ ମଧ୍ୟରେ ଓଡ଼ିଆ ପୁଅ ପ୍ରଫେସର ଡକ୍ଟର ତପନ କୁମାର ମହାନ୍ତ

ମୟୂରଭଞ୍ଜ : ଓଡିଶା ପାଇଁ ଖୁସି ଖବର ଆଣିବା ସହ ରାଜ୍ୟ ପାଇଁ ଗର୍ବ ଆଣିଲେ ଓଡ଼ିଆ ପୁଅ। ବିଶ୍ୱର ଶ୍ରେଷ୍ଠ ୨ପ୍ରତିଶତ ବୈଜ୍ଞାନିକଙ୍କ ମଧ୍ୟରେ ଜଣେ ଓଡ଼ିଆ ପୁଅ। ଆମେରିକାର ଷ୍ଟାଣ୍ଡ୍ ଫୋର ବିଶ୍ୱବିଦ୍ୟାଳୟ ପ୍ରକାଶ କରୁଥିବା ବିଶ୍ୱର ଶ୍ରେଷ୍ଠ ୨ ପ୍ରତିଶତ ବୈଜ୍ଞାନିକଙ୍କ ତାଲିକାରେ ମୟୂରଭଞ୍ଜ ଜିଲ୍ଲା ରରୁଆଁ ବ୍ଲକ ବାଉଁଶପୁର ଗାଁରେ ଜନ୍ମିତ ପ୍ରଫେସର ଡକ୍ଟର ତପନ କୁମାର ମହାନ୍ତ । ସେ ଓମାନରେ ଥିବା ନିଜୱା ବିଶ୍ୱବିଦ୍ୟାଳୟରେ ଗବେଷକ ଭାବେ କାର୍ଯ୍ୟରତ ଥିବା ବେଳେ ଆମେରିକାର ଷ୍ଟାଣ୍ଡ ଫୋର ବିଶ୍ୱବିଦ୍ୟାଳୟ ଦ୍ୱାରା ୨୦୨୫ ମସିହାରେ ପ୍ରକାଶିତ ବିଶ୍ୱର ଶ୍ରେଷ୍ଠ ୨ ପ୍ରତିଶତ ବୈଜ୍ଞାନିକଙ୍କ ତାଲିକାରେ ସାମିଲ ହୋଇଛନ୍ତି ।

 ସମସ୍ତ ବିଷୟରେ ବିଶ୍ୱର ୩୮୫୮୬ ତମ ସ୍ଥାନରେ ଥିବା ପ୍ରଫେସର ଡକ୍ଟର ତପନ କୁମାର ମହାନ୍ତଙ୍କର ବିଶେଷଜ୍ଞତାର ମୁଖ୍ୟ ବିଷୟ ହେଉଛି ଉଦ୍ଭିଦ ବିଜ୍ଞାନ ଓ ଅଣୁଜୀବ ବିଜ୍ଞାନ । ଏହି ଦୁଇଟି ବିଷୟରେ ସେ ଗବେଷଣା କରି ୫ ଥର କ୍ରମାଗତ ଭାବେ ବିଶ୍ୱର ଶ୍ରେଷ୍ଠ ୨ ପ୍ରତିଶତ ବୈଜ୍ଞାନିକଙ୍କ ତାଲିକାରେ ସେ ସାମିଲ ହେବାର ଗୌରବ ଅର୍ଜନ କରିଛନ୍ତି । ତାଙ୍କର ଏହି ସଫଳତାକୁ ନେଇ ସାରା ଓଡିଶା ତଥା ତାଙ୍କ ଜନ୍ମ ମାଟିରୁ ଅନେକ ଶୁଭେଚ୍ଛାର ସୁଅ ଛୁଟିବାରେ ଲାଗିଛି  ।