ବିଷାକ୍ତ କଫ ସିରପ୍ ଲେଖି ଡାକ୍ତର ଗିରଫ; ୧୦ ଶିଶୁଙ୍କ ମୃତ୍ୟୁ ପରେ ସରକାରଙ୍କ ଆକ୍ସନ

ନୂଆଦିଲ୍ଲୀ: ମଧ୍ୟପ୍ରଦେଶର ଛିନ୍ଦୱାଡାରେ ୧୦ ଜଣ ଶିଶୁଙ୍କ ମୃତ୍ୟୁ ପରେ ପ୍ରଶାସନ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଶନିବାର ବିଳମ୍ବିତ ରାତିରେ କଫ ସିରପ୍ ପ୍ରେସସ୍କ୍ରାଇବ କରିଥିବା ଡାକ୍ତର ପ୍ରବୀଣ ସୋନିଙ୍କୁ ଗିରଫ କରିଛି ପୋଲିସ। ଡାକ୍ତର ପ୍ରବୀଣ ସୋନି ଏବଂ ଥଣ୍ଡା ସିରପ୍ ପ୍ରସ୍ତୁତକାରୀ କମ୍ପାନୀ ସ୍ରେସୁନ୍ ଫାର୍ମାସ୍ୟୁଟିକାଲର ପରିଚାଳକଙ୍କ ବିରୁଦ୍ଧରେ ପରସିଆ ପୋଲିସ ଷ୍ଟେସନରେ ମାମଲା ରୁଜୁ କରାଯାଇଥିଲା।

ଡ୍ରଗ୍ସ ଏବଂ କସମେଟିକ୍ସ ଆଇନର ଧାରା ୨୭(ଏ), ବିଏନଏସର ଧାରା ୧୦୫ ଏବଂ ୨୭୬ ଅନୁଯାୟୀ ଏକ ମାମଲା ରୁଜୁ ହୋଇଛି। ପରସିଆ ସିଏଚ୍ସିର ବିଏମଓ ଅଙ୍କିତ ସହଲାମ ଡାକ୍ତରଙ୍କ ବିରୁଦ୍ଧରେ ଅଭିଯୋଗ କରିଛନ୍ତି। ଡାକ୍ତର ପ୍ରବୀଣ ସୋନି ଛିନ୍ଦୱାଡାରେ ମୃତ୍ୟୁବରଣ କରିଥିବା ଅଧିକାଂଶ ଶିଶୁଙ୍କୁ କଫ ସିରପ୍ ଦେଇଥିଲେ। ଶିଶୁମାନଙ୍କ ମୃତ୍ୟୁର କାରଣ ହୋଇଥିବା ସିରପର ତଦନ୍ତ ରିପୋର୍ଟ ଶନିବାର ବିଳମ୍ବିତ ରାତିରେ ଆସିଛି। ରିପୋର୍ଟରେ ଜଣାପଡିଛି ଯେ କୋଲଡ୍ରିଫ୍ କଫ୍ ସିରପ୍‌ରେ ୪୮.୬% ଡାଇଥାଇଲିନ୍ ଗ୍ଲାଇକଲ୍ ଅଛି, ଯାହା ଗୁରୁତର ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିପାରେ।

ସେପ୍ଟେମ୍ବର ୭ ତାରିଖରୁ ଛିନ୍ଦୱାଡା ଜିଲ୍ଲାରେ ୧୦ ଜଣ ଶିଶୁଙ୍କ ମୃତ୍ୟୁ ପରେ ମଧ୍ୟପ୍ରଦେଶ ସରକାର ଶନିବାର କୋଲଡ୍ରିଫ୍ ସିରପ୍ ବିକ୍ରୟ ନିଷେଧ କରିଛନ୍ତି। ମୁଖ୍ୟମନ୍ତ୍ରୀ ମୋହନ ଯାଦବ  କହିଛନ୍ତି, "କୋଲଡ୍ରିଫ୍ ସିରପ୍ ଯୋଗୁଁ ଛିନ୍ଦୱାଡ଼ାରେ ପିଲାଙ୍କ ମୃତ୍ୟୁ ଅତ୍ୟନ୍ତ ଦୁଃଖଦ। ସମଗ୍ର ମଧ୍ୟପ୍ରଦେଶରେ ଏହି ସିରପ୍ ବିକ୍ରୟ ଉପରେ ପ୍ରତିବନ୍ଧକ ଲଗାଯାଇଛି। ଏହି ସିରପ୍ ପ୍ରସ୍ତୁତ କରୁଥିବା କମ୍ପାନୀର ଅନ୍ୟ ଉତ୍ପାଦଗୁଡ଼ିକୁ ମଧ୍ୟ ନିଷେଧ କରାଯାଉଛି।"

କାଞ୍ଚିପୁରମର ଏକ କାରଖାନାରେ ଏହି ସିରପ୍ ତିଆରି କରାଯାଇଥିଲା। ଏହି ଘଟଣା ପରେ, ରାଜ୍ୟ ସରକାର ତାମିଲନାଡୁ ସରକାରଙ୍କୁ ତଦନ୍ତ କରିବାକୁ ଅନୁରୋଧ କରିଥିଲେ। ସେ କହିଥିଲେ ଯେ ଆଜି ସକାଳେ ତଦନ୍ତ ରିପୋର୍ଟ ମିଳିଛି ଏବଂ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ପିଲାମାନଙ୍କ ଦୁଃଖଦ ମୃତ୍ୟୁ ପରେ, ସ୍ଥାନୀୟ ସ୍ତରରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ଯାଦବ କହିଛନ୍ତି ଯେ ଏହି ଘଟଣାର ତଦନ୍ତ ପାଇଁ ଏକ ରାଜ୍ୟସ୍ତରୀୟ ଦଳ ମଧ୍ୟ ଗଠନ କରାଯାଇଛି ଏବଂ ଦୋଷୀମାନଙ୍କୁ ଛଡ଼ାଯିବ ନାହିଁ।