ମେଟାଲ ଖଣିରେ ପଥର ବ୍ଲାଷ୍ଟିଂ ବେଳେ ଅଘଟଣ : ବିସ୍ଫୋରକ ଖଞ୍ଜୁଥିବା ମେକାନିକ ମୃତ

ଢେଙ୍କାନାଳ ୭।୯: କଳା ମୁଗୁନି ପଥର ଖଣିରେ ପଥର ବ୍ଲାଷ୍ଟିଂ କରୁଥିବା ବେଳେ ଅଘଟଣ । ଏହି ବିସ୍ଫୋରଣରେ ଖୋଦ ବିସ୍ଫୋରକ ଖଞ୍ଜୁଥିବା ଜଣେ ମେକାନିକର ମୃତ୍ୟୁ ଘଟିଛି । ଢେଙ୍କାନାଳ ଜିଲ୍ଲା ନିହଲ ପ୍ରସାଦ ଥାନା ଅନ୍ତର୍ଗତ କାଶୀପୁର ରୋଡ଼ ମେଟାଲ ଖଣି ନିକଟରେ ଏହି ବିସ୍ଫୋରଣ ହୋଇଛି । ମୃତକ ଜଣଙ୍କ ନିହଲ ପ୍ରସାଦ ଥାନା ଅନ୍ତର୍ଗତ ବାଲି କିଆରୀ ଗ୍ରାମର ଜିତୁ ତରାଇ ବୋଲି ଜଣାପଡିଛି ।

ରବିବାର ସକାଳ ପ୍ରାୟ ୭ଟା ସମୟରେ ଖଣି ପାଖରେ ଥିବା ପାହାଡ଼ରେ ପଥର ଡ୍ରିଲ୍ କରି ବିସ୍ଫୋରକ ଖଞ୍ଜୁଥିଲେ ଜିତୁ । ତେବେ ଅସାବଧାନତା ବଶତଃ ଅଚାନକ ବିସ୍ଫୋରଣ ଘଟିଥିଲା ବୋଲି କିଛି ପ୍ରତ୍ୟକ୍ଷଦର୍ଶୀ ଶ୍ରମିକ ପ୍ରକାଶ କରିଛନ୍ତି । ଫଳରେ ଘଟଣାସ୍ଥଳରେ ସେ ଗୁରୁତର ହୋଇଥିଲେ । ଶ୍ରମିକ ମାନେ ଜିତୁ ତରାଇଙ୍କୁ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ । ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରୁଥିବା ଜଣାପଡିଛି । ଏହି ଘଟଣା ପରେ ସେପଟେ ଏହି ବେଆଇନ ବିସ୍ଫୋରଣ କରୁଥିବା ଖଣି ମାଲିକ ଫେରାର ହୋଇଯାଇଛନ୍ତି । ନିହଲ ପ୍ରସାଦ ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।