୩୦ ହଜାର କୋଟି ଟଙ୍କା ମାମଲାରେ ନୂଆ ମୋଡ଼, ପ୍ରିୟା କପୁର ମାଗିଲେ କରିଶ୍ମା-ସଞ୍ଜୟଙ୍କ ଛାଡପତ୍ର ରେକର୍ଡ

ମୁମ୍ଵାଇ ୧୬।୦୧; ବଲିଉଡ୍ ଅଭିନେତ୍ରୀ କରିସ୍ମା କପୁରଙ୍କ ଅପେକ୍ଷା ତାଙ୍କ ପିଲାମାନେ ଏବେ ଚର୍ଚ୍ଚାରେ ଅଛନ୍ତି। କରିସ୍ମାଙ୍କ ପିଲାମାନେ ଅର୍ଥାତ୍ ସମାଇରା ଏବଂ କିୟାନ୍ ସେମାନଙ୍କ ପିତାଙ୍କ ସମ୍ପତ୍ତିରୁ ସେମାନଙ୍କର ଅଂଶ ପାଇଁ କୋର୍ଟ ଲଢ଼େଇ ଲଢ଼ୁଛନ୍ତି। କରିସ୍ମାଙ୍କ ପୂର୍ବ ସ୍ୱାମୀ ସଞ୍ଜୟ କପୁରଙ୍କ ମୃତ୍ୟୁ ପରେ, ଏହି ପାରିବାରିକ ବିବାଦ କୋର୍ଟ ରୁମରେ ପହଞ୍ଚିଛି। ଏହି ମାମଲାରେ ପ୍ରତ୍ୟେକ ଦିନ ମୋଡ ନେଉଛି।

ସଞ୍ଜୟଙ୍କ ତୃତୀୟ ପତ୍ନୀ ପ୍ରିୟା କପୁର, କରିସ୍ମା କପୁର ଏବଂ ତାଙ୍କ ପୂର୍ବତନ ସ୍ୱାମୀ ସଞ୍ଜୟ କପୁରଙ୍କ ମଧ୍ୟରେ ହୋଇଥିବା ଛାଡପତ୍ର ମାମଲା ସହିତ ଜଡିତ ଦଲିଲର ପ୍ରମାଣିତ କପି ପାଇଁ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ସଞ୍ଜୟ କପୁରଙ୍କ ମୃତ୍ୟୁ ଜୁନ୍ ୨୦୨୫ରେ ହୋଇଥିଲା। ତାଙ୍କ ମୃତ୍ୟୁ ପରେ, ହଠାତ୍ ଏକ ଲିଗାଲ ପେପର ସାମ୍ନାକୁ ଆସିଥିଲା, ଯେଉଁଥିରେ ଦାବି କରାଯାଇଥିଲା ଯେ ସେ ତାଙ୍କର ସମ୍ପୂର୍ଣ୍ଣ ସମ୍ପତ୍ତି ତାଙ୍କ ତୃତୀୟ ପତ୍ନୀ ପ୍ରିୟା ସଚଦେବ କପୁରଙ୍କୁ ଦେଇଛନ୍ତି। ଏହି ଦଲିଲ୍ ସମ୍ପୂର୍ଣ୍ଣ ବିବାଦର ମୂଳ ପାଲଟିଥିଲା। ଲିଗାଲ ପେପରରେ ତାଙ୍କର ଦୁଇ ସନ୍ତାନ, ସମାଇରା ଏବଂ କିୟାନ୍ ଉଲ୍ଲେଖ ନଥିଲା, କିମ୍ବା ସେମାନଙ୍କ ପିତାମାତାଙ୍କ ନାମ ମଧ୍ୟ ସାମିଲ ନଥିଲା, ଯାହା ଫଳରେ କରିସ୍ମାଙ୍କ ପିଲାମାନେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ।

ପ୍ରିୟା କପୁରଙ୍କ ଦ୍ୱାରା ସୁପ୍ରିମକୋର୍ଟରେ ଦାଖଲ କରାଯାଇଥିବା ଆବେଦନରେ, ସେ ଛାଡପତ୍ର ଆବେଦନ ସହିତ ଜଡିତ ସମସ୍ତ ଦସ୍ତାବିଜ ଏବଂ କୋର୍ଟ ଦ୍ୱାରା ଦିଆଯାଇଥିବା ସମସ୍ତ ଆଦେଶର ପ୍ରମାଣିତ କପି ଯୋଗାଇ ଦେବାକୁ ଦାବି କରିଥିଲେ। ଏହି ଆବେଦନ ୨୧ ନଭେମ୍ବର, ୨୦୨୫ରେ ଦାଖଲ କରାଯାଇଥିଲା। ସଞ୍ଜୟ କପୁରଙ୍କ ପିଲାମାନେ ଏବେ ଦିଲ୍ଲୀ ହାଇକୋର୍ଟର ଦ୍ୱାରସ୍ଥ ହୋଇଛନ୍ତି ଓ ତଦନ୍ତ ଦାବି କରିଛନ୍ତି। ସେମାନେ କହିଛନ୍ତି ଯେ ଯଦି ତାଙ୍କ ପିତା ପ୍ରକୃତରେ ଏପରି ନିଷ୍ପତ୍ତି ନେଇଥାନ୍ତେ, ତେବେ ସେମାନଙ୍କୁ ଅବଗତ କରାଯାଇଥାନ୍ତା।