ଭୁବନେଶ୍ୱର: ବିଧାନସଭାର ଦ୍ବିତୀୟ ପର୍ଯ୍ୟାୟ ଅଧିବେଶନ । ଆଜିଠୁ ଆରମ୍ଭ ହୋଇ ଏପ୍ରିଲ ୫ ତାରିଖ ଯାଏଁ ଚାଲିବ । ଦ୍ବିତୀୟ ପର୍ଯ୍ୟାୟରେ ଆସନ୍ତା ୧୦ ତାରିଖରେ ବଜେଟ୍ ଉପରେ ଆଲୋଚନା ହେବ । ସେହିପରି ମାର୍ଚ୍ଚ ୨୯ ତାରିଖରେ ବିଧାନସଭାରେ ସରକାର ବ୍ୟୟ ମଞ୍ଜୁରି ବିଲ୍ ଉପସ୍ଥାପନା କରିବେ । ଏପଟେ ଗୃହରେ ରଣହୁଙ୍କାର ଛାଡ଼ିବାକୁ ପ୍ରସ୍ତୁତ ବିଜୁ ଜନତା ଦଳ । ବିଜୁବାବୁଙ୍କୁ ପ୍ରସଙ୍ଗକୁ ନେଇ ସରକାରଙ୍କୁ ଘେରିବ । ଧାନ ମଣ୍ଡିରେ ଅବ୍ୟବସ୍ଥା, ଆଇନଶୃଙ୍ଖଳା, ପଞ୍ଚାୟତିରାଜ ଦିବସରେ ବିଜୁ ବାବୁଙ୍କ ଜୟନ୍ତୀ ପାଳନ ନକରିବା ଆଦି ପ୍ରସଙ୍ଗରେ ଶାଣିତ ଆକ୍ରମଣ କରିବ ବିଜେଡି । ସେପଟେ ଶାସକ ବିଜେପି ମଧ୍ୟ ପାଲଟା ଆକ୍ରମଣ କରିବାକୁ ପ୍ରସ୍ତୁତ ହୋଇରହିଛି । ଆତ୍ମରକ୍ଷା ବଦଳରେ ଦଳ ପୂରା ଆକ୍ରମଣ ମୁଦ୍ରାରେ ରହିବ ।
୨୪ ବର୍ଷରେ ବିଜୁଙ୍କ ପାଇଁ କ’ଣ କରିଛ ବୋଲି ପ୍ରଶ୍ନ କରି ବିଜେଡିକୁ କାଠଗଡ଼ାରେ ଛିଡ଼ା କରାଇବ । କଂଗ୍ରେସ ମଧ୍ୟ ବିଜୁ, ମହିଳା ହିଂସା ଓ ଚାଷୀ ପ୍ରସଙ୍ଗରେ ସରକାରଙ୍କୁ ଜବାବ ମାଗିବ । ଶୁକ୍ରବାରଠୁ ଆରମ୍ଭ ହେବ ବିଧାନସଭା ବଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟାୟ । କାର୍ଯ୍ୟସୂଚୀ ଅନୁଯାୟୀ ଏହା ଏପ୍ରିଲ୍ ୫ ପର୍ଯ୍ୟନ୍ତ ଚାଲିବ । ଏହି ଅଧିବେଶନ କାଳରେ ଖର୍ଚ୍ଚଦାବି ନେଇ ଆଲୋଚନା ସହିତ ବ୍ୟୟ ମଞ୍ଜୁରୀ ବିଧେୟକ ପାରିତ ହେବାର କାର୍ଯ୍ୟକ୍ରମ ରହିଛି । ବିଜୁଙ୍କୁ ନେଇ ରାଜ୍ୟ ରାଜନୀତି ଏବେ ତତଲା ରହିଛି । ବିଜୁ ଜୟନ୍ତୀରେ ୩୦ ବର୍ଷ ହେବ ପଞ୍ଚାୟତିରାଜ ଦିବସ ପାଳିତ ହୋଇ ଆସୁଥିଲା । ମାତ୍ର ହଠାତ୍ ରାଜ୍ୟ ସରକାର ଏହାକୁ ବନ୍ଦ କରି ଏପ୍ରିଲ ୨୪କୁ ଘୁଞ୍ଚାଇ ଦେଇଛନ୍ତି । ସରକାରୀ ଛୁଟି ବି ବାତିଲ କରାଗଲା । ଏହାକୁ ନେଇ ବିଜୁ ଜନତା ଦଳ ରାଗରେ ଗରଗର ହୋଇଛି । ସେପେଟ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟସ୍ତରୀୟ ବିଜୁ ଜୟନ୍ତୀରେ ବିଜେଡିକୁ କାଠଗଡ଼ାରେ ଛିଡ଼ା କରାଇ କହିଛନ୍ତି, ୨୪ ବର୍ଷରେ କ’ଣ କରିଛ? ବିଜୁଙ୍କ ସ୍ୱପ୍ନ ସାକାର କରିବାକୁ ଆମ ସରକାର କାମ ଆରମ୍ଭ କରିଛି ।
କଂଗ୍ରେସ ମଧ୍ୟ ସରକାରଙ୍କୁ ବିଭିନ୍ନ ପ୍ରସଙ୍ଗରେ ଘେରାବନ୍ଦୀ କରିବ । ଭକ୍ତ ଚରଣ ଦାସ ଦଳର ନୂଆ ପିସିସି ସଭାପତି ହେବା ପରେ କଂଗ୍ରେସ ଏବେ ଆକ୍ସନ ମୋଡ୍ରେ । ୮ ମାସରେ ୧୬୦୦ ମହିଳା ବିରୋଧୀ ହିଂସା ଓ ୫୪ ଗଣ ଦୁଷ୍କର୍ମ ପ୍ରସଙ୍ଗରେ ଦଳ ସରକାରଙ୍କୁ ଜବାବ ମାଗିବ । କଳା ତାଲିକାଭୁକ୍ତ ସଂସ୍ଥାକୁ ଅଗ୍ନିଶମ ଷ୍ଟେସନ ଅଫିସର, ପୋଲିସ ଏସଆଇ ଓ ସହକାରୀ ଜେଲର ପରୀକ୍ଷା ପରିଚାଳନା ଭାର ଦେଇ ସରକାର ଚାକିରି ବିକ୍ରିରେ ମାତିଛନ୍ତି ବୋଲି ଅଭିଯୋଗ ଆଣିବ ଦଳ । ଏହାଛଡ଼ା ଧାନମଣ୍ଡିରେ ଚାଷୀ ଶୋଷଣ, ଇ କେୱାଇସି ଆଳରେ ସରକାର ଲକ୍ଷ ଲକ୍ଷ ଗରିବ ପରିବାରର ରାସନ କାର୍ଡ କାଟୁଥିବାରୁ ଦଳ ଏହାକୁ ଅସ୍ତ୍ର କରି ଜୋରଦାର ଆକ୍ରମଣ କରିବାକୁ ସ୍ଥିର କରିଛି । ତାଜା ପ୍ରସଙ୍ଗକୁ ଧରି ବଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟାୟ ବେଶ ସରଗରମ ହେବ । ବିଧାନସଭା କାର୍ଯ୍ୟସୂଚୀ ଅନୁଯାୟୀ, ମାର୍ଚ୍ଚ ୭ରେ ବିଭିନ୍ନ ବିଭାଗୀୟ ଷ୍ଟାଣ୍ଡିଂ କମିଟିର ରିପୋର୍ଟ ଗୃହରେ ଉପସ୍ଥାପନ ହେବ । ୧୦ ତାରିଖରୁ ୨୮ ଯାଏଁ ବଜେଟ୍ ଉପରେ ଆଲୋଚନା ହେବ । ମାର୍ଚ୍ଚ ୨୯ରେ ବ୍ୟୟ ମଞ୍ଜୁରି ବିଲ୍ ପାରିତ ହେବ । ଉଲ୍ଲେଖଯୋଗ୍ୟ, ସପ୍ତଦଶ ବିଧାନସଭାର ପ୍ରଥମ ପର୍ଯ୍ୟାୟ ବଜେଟ ଅଧିବେଶନ ଫେବ୍ରୁଆରୀ ୧୩ରୁ ୨୧ ତାରିଖ ପର୍ଯ୍ୟନ୍ତ ଚାଲିଥିଲା । ଏହି ସମୟରେ ସରକାର ୨୦୨୫-୨୬ ଆର୍ଥିକ ବର୍ଷ ପାଇଁ ୨ ଲକ୍ଷ ୯୦ ହଜାର କୋଟି ଟଙ୍କାର ବଜେଟ୍ ଉପସ୍ଥାପନ କରିଥିଲେ ।
