ନୂଆଦିଲ୍ଲୀ: ମଣିପୁରରେ ଶାନ୍ତି ଫେରାଇ ଆଣିବାକୁ କେନ୍ଦ୍ର ସରକାର ଉଦ୍ୟମ କରୁଥିବା ବେଳେ ଶନିବାର ପୁଣି ହିଂସାକାଣ୍ଡ ଘଟିଛି। ଏଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ ୨୭ ସୁରକ୍ଷାକର୍ମୀ ଆହତ ହୋଇଛନ୍ତି। ଇମ୍ଫାଲ-ଦିମାପୁର ରାଜପଥରେ କୁକି-ଜୋ ସମ୍ପ୍ରଦାୟର ସଦସ୍ୟ ଓ ସୁରକ୍ଷା ବାହିନୀ ମଧ୍ୟରେ ସଂଘର୍ଷ ହୋଇଥିଲା।
କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ମଣିପୁରରେ ମୁକ୍ତ ବିଚରଣକୁ ଅନୁମତି ଦେଇଥିଲେ। ଆଜିଠାରୁ କୁକି ଏବଂ ମୈତେଇ ଅଞ୍ଚଳ ସମେତ ସାରା ମଣିପୁରରେ ସମସ୍ତ ଯାନବାହାନର ମୁକ୍ତ ଚଳାଚଳକୁ ହୋଇଥାନ୍ତା। ହେଲେ ବିଦ୍ରୋହୀମାନେ ଏହାକୁ ଅବମାନନା କରିଛନ୍ତି। କାଙ୍ଗପୋକପି ଜିଲ୍ଲାରେ, ବିଶେଷକରି ଜାତୀୟ ରାଜପଥ ନମ୍ବର ୨ ପାର୍ଶ୍ୱବର୍ତ୍ତୀ ଅଞ୍ଚଳଗୁଡ଼ିକରେ ଉତ୍ତେଜନା ବୃଦ୍ଧି ପାଇବାରୁ ବାଧ୍ୟ ହୋଇ ସ୍ଥାନୀୟ କର୍ତ୍ତୃପକ୍ଷଙ୍କୁ ପୁଣିଥରେ କର୍ଫ୍ୟୁ ଜାରି କରିବାକୁ ପଡ଼ିଛି।
ଆଜି ସକାଳେ, ପ୍ରଦର୍ଶନକାରୀମାନେ ଏକ ବସ୍ ଉପରେ ଆକ୍ରମଣ କରିଥିଲେ ଏବଂ ସରକାରୀ ଯାନବାହାନ ଚଳାଚଳରେ ବାଧା ସୃଷ୍ଟି କରିବା ପାଇଁ ଟାୟାର ଜାଳି ଏନ୍ଏଚ-2 (ଇମ୍ଫାଲ-ଦିମାପୁର ରାଜପଥ) ଅବରୋଧ କରିଥିଲେ। ସେମାନଙ୍କୁ ଘଉଡ଼ାଇବା ପାଇଁ ସୁରକ୍ଷା ବାହିନୀକୁ ଲୁହ ବୁହା ଗ୍ୟାସ୍ ସେଲ୍ ପୁଟାଇଥିଲା ।
କୁକିମାନଙ୍କର ଏକ ଗୋଷ୍ଠୀ ଏକ ସାଧାରଣ ପରିବହନ ବସ୍କୁ ଅଟକାଇବା ପରେ ଉତ୍ତେଜନା ଆରମ୍ଭ ହୋଇଥିଲା ଏବଂ ମଣିପୁରର ଉପତ୍ୟକା ଏବଂ ପାହାଡ଼ି ଜିଲ୍ଲା ମଧ୍ୟରେ ରାଜ୍ୟ ସରକାରଙ୍କ ସରକାରୀ ବସ୍ ସେବା ଚଳାତଳକୁ ସେମାନେ ବିରୋଧ କରି ପ୍ରତିବାଦ କରିଥିଲେ। ଏହାପରେ ସୁରକ୍ଷା ବାହିନୀ ଓ ଆନ୍ଦୋଳନକାରୀଙ୍କ ମଧ୍ୟରେ ସଂଘର୍ଷ ହୋଇଥିଲା। ଏଥିରେ ଆନ୍ଦୋଳନକାରମାନେ ଜଣଙ୍କ ଗାଡ଼ି ପୋଡ଼ି ଦେଇଛନ୍ତି। ତା ସହିତ ଟାୟାର ଜାଳି ରାସ୍ତା ଅବରୋଧ କରିଥିଲେ।
ଏଥିରେ କାଙ୍ଗପୋକପିର କିଥେଲମାନବି ଅଞ୍ଚଳରେ ସେହଖୋଲେନ ସିଂଶିଟ ନାମକ ଜଣେ ବ୍ୟକ୍ତି ସୁରକ୍ଷା କର୍ମୀଙ୍କ ଗୁଳିରେ ଆହତ ହୋଇଥିଲେ। ଏହାପରେ ତାଙ୍କୁ ନିକଟସ୍ଥ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି।
