ଘରୁ ଅପହରଣ କରିନେଲେ ସଶସ୍ତ୍ର ମାଓବାଦୀ, ଜଙ୍ଗଲରେ ଗଳାକାଟି କଲେ ହତ୍ୟା

ମାଲକାନଗିରି ୨୫।୧୦: କିଛିଦିନର ବ୍ୟବଧାନ ପରେ ସକ୍ରିୟ ହେଲେ ମାଓବାଦୀ । ମାଲକାନଗିରି ଛତିଶଗଡ ସୀମାନ୍ତ ବିଜାପୁର ଜିଲ୍ଲାରେ ପୁଣି ମାଓବାଦୀଙ୍କ ବର୍ବରକାଣ୍ଡ ଦେଖିବାକୁ ମିଳିଛି । ଦୁଇ ଆଦିବାସୀ ଯୁବକଙ୍କୁ ହତ୍ୟା କଲେ ସଶସ୍ତ୍ର ମାଓବାଦୀ । ପୋଲିସ ଇନଫର୍ମର ସନ୍ଦେହରେ ହତ୍ୟା କରାଯାଇଥିବା ପୋଷ୍ଟରରେ ଉଲ୍ଲେଖ ।

ସୂଚନାଯୋଗ୍ୟ ଯେ, ଶୁକ୍ରବାର ବିଳମ୍ବିତ ରାତିରେ ଉସୁର ଥାନା ଅନ୍ତର୍ଗତ ନେଲାକାଙ୍କେର ଗାଁରେ ୪୦ରୁ ୫୦ ଜଣ ସଶସ୍ତ୍ର  ମାଓବାଦୀ ଆସି ଦୁଇ ଜଣ ଆଦିବାସୀ ଯୁବକଙ୍କୁ ଅତି ନିର୍ମମ ଭାବେ ହତ୍ୟା କରିଛନ୍ତି । ମୃତ ଦୁଇ ଯୁବକ ହେଲେ ୨୫ ବର୍ଷ ବୟସ୍କ ରବି କଟମ ଓ ୩୮ ବର୍ଷ ବୟସ୍କ ତିରୁପତି ସୋଡି । ମାଓବାଦୀ ମାନେ ପ୍ରଥମେ ନେଲାକାଙ୍କେର ଗାଁରେ ପହଞ୍ଚି ଉଭୟଙ୍କୁ ଅପହରଣ କରି ଜଙ୍ଗଲ ଭିତରକୁ ନେଇଯାଇଥିଲେ । ପରେ ସେଠାରେ କୌଣସି ଏକ ଧାରୁଆ ଅସ୍ତ୍ରରେ ଉଭୟଙ୍କ ଗଳାକାଟି ହତ୍ୟା କରିଛନ୍ତି । ଶନିବାର ସକାଳେ ଗାଁ ଲୋକେ ଜଙ୍ଗଲକୁ ଯାଉଥିବା ବେଳେ ମୃତଦେହ ଦେଖିବାକୁ ପାଇଥିଲେ । ପୋଲିସ ଇନଫର୍ମର ସନ୍ଦେହରେ ସେମାନଙ୍କୁ ହତ୍ୟା କରାଯାଇଛି ବୋଲି ଏକ ହାତ ଲେଖା ପୋଷ୍ଟରରେ ଉଲ୍ଲେଖ ରହିଛି । ଉସୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।