ନାଁ ଗୋପନ ରଖି ରାମ ମନ୍ଦିରକୁ ୩୦ କୋଟି ଟଙ୍କାର ପ୍ରତିମା ଦାନ ଦେଲେ ଭକ୍ତ; ଖଚ୍ଚିତ ହୋଇଛି ହୀରା, ନୀଳା, ମୋତି, ମାଣିକ୍ୟ

ଅଯୋଧ୍ୟା: ଅଯୋଧ୍ୟାର ଶ୍ରୀ ରାମ ଜନ୍ମଭୂମି ମନ୍ଦିର ପରିସରରେ ଖୁବଶୀଘ୍ର ଏକ ଭବ୍ୟ ଏବଂ ମୂଲ୍ୟବାନ ପ୍ରତିମା ସ୍ଥାପନ କରାଯିବ। ହୀରା ଭଳି ଚମକୁଥିବା ଏହି ପ୍ରତିମାରେ ମୋତି, ମାଣିକ୍ୟ ଖଚ୍ଚିତ ହୋଇଛି । ମୂଲ୍ୟବାନ ରତ୍ନ ପଥରରେ ଖଚ୍ଚିତ ଏହି ପ୍ରତିମା ଅତ୍ୟନ୍ତ ସୁନ୍ଦର ଦେଖାଯାଉଛି । ଏହି ପ୍ରତିମା ରାମ ଜନ୍ମଭୂମିରେ ପୂର୍ବରୁ ସ୍ଥାପିତ ରାମ ଲଲ୍ଲାଙ୍କ ପ୍ରତିମାର ଏକ ଅବିକଳ ପ୍ରତିକୃତି ।

କର୍ଣ୍ଣାଟକର ଜଣେ ଅଜ୍ଞାତ ଭକ୍ତ ଏହି ମୂଲ୍ୟବାନ ପ୍ରତିମାକୁ ଦାନ କରିଛନ୍ତି। ଏହି ପ୍ରତିମାର ମୂଲ୍ୟ ୨୫ ରୁ ୩୦ କୋଟି ଟଙ୍କା ହେବ । ଏହା କର୍ଣ୍ଣାଟକ ଶୈଳୀରେ ଦକ୍ଷିଣ ଭାରତୀୟ ଶିଳ୍ପକଳାରେ ନିର୍ମିତ । ଏହି ପ୍ରତିମାର ଉଚ୍ଚତା ୧୦ ଫୁଟ , ପ୍ରସ୍ଥ ୮ ଫୁଟ ଏବଂ ଓଜନ ପ୍ରାୟ ୫ କ୍ୱିଣ୍ଟାଲ । କର୍ଣ୍ଣାଟକରୁ ଅଯୋଧ୍ୟାର ଦୂରତା ପ୍ରାୟ ୧୭୫୦ କିଲୋମିଟର। ଏହାକୁ ଏକ ସ୍ୱତନ୍ତ୍ର ଭ୍ୟାନରେ ଅଯୋଧ୍ୟା ଆଣିବାକୁ ୫ରୁ ୬ ଦିନ ଲାଗିଥିଲା । ପ୍ରତିମାଟି ମଙ୍ଗଳବାର (୨୩ ଡିସେମ୍ବର, ୨୦୨୫) ଦିନ ଅପରାହ୍ନ ପ୍ରାୟ ୩:୩୦ ସମୟରେ ରାମ ମନ୍ଦିର ପରିସରରେ ପହଞ୍ଚିଥିଲା ।

ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ସଦସ୍ୟ ଅନିଲ ମିଶ୍ର କହିଛନ୍ତି ଯେ, ଦାତାଙ୍କ ସମ୍ପୂର୍ଣ୍ଣ ବିବରଣୀ ଏପର୍ଯ୍ୟନ୍ତ ମିଳିନାହିଁ । ପ୍ରତିମାର ଓଜନ ଏବଂ ଅନ୍ୟାନ୍ୟ ସୂଚନା ଖୁବଶୀଘ୍ର ଦିଆଯିବ। ମନ୍ଦିର ପରିସର ମଧ୍ୟରେ ସନ୍ଥ ତୁଳସୀଦାସ ମନ୍ଦିର ନିକଟ ଅଙ୍ଗଦ ଟିଲାରେ ଏହି ପ୍ରତିମା ସ୍ଥାପନ ପାଇଁ ବିଚାର କରାଯାଉଛି। ସ୍ଥାପନ ପୂର୍ବରୁ, ଏହାକୁ ଉନ୍ମୋଚନ କରାଯିବ ଏବଂ ପରେ ଏକ ପବିତ୍ର ସମାରୋହ ଅନୁଷ୍ଠିତ ହେବ । ସାରା ଦେଶରୁ ସନ୍ଥ ଏବଂ ମହନ୍ତମାନେ ଯୋଗଦେବେ। ଏହି ଦାନ ପ୍ରଭୁ ରାମଙ୍କ ପ୍ରତି ଭକ୍ତିର ଏକ ଅନନ୍ୟ ଉଦାହରଣ । ଖୁବଶୀଘ୍ର ଶ୍ରଦ୍ଧାଳୁ ପ୍ରତିମାକୁ ଦର୍ଶନ କରିପାରିବେ।