ନୂଆଦିଲ୍ଲୀ୧୨।୪: ତହବୁର ରାଣା ଏବେ ୧୮ ଦିନିଆ ଏନଆଇଏ ରିମାଣ୍ଡରେ ଅଛି। ତାକୁ ମୁମ୍ବାଇ ଆତଙ୍କବାଦୀ ଆକ୍ରମଣ ମାମଲାରେ ଯାଞ୍ଚ ଏଜେନ୍ସୀ ପଚରା ଉଚରା କରୁଛନ୍ତି। ଏନଆଇଏର ଅଧିକାଂଶ ପ୍ରଶ୍ନକୁ ରାଣା ଟାଳିଯାଉଛି। ଏଜେନ୍ସୀର ପ୍ରଶ୍ନରେ ଭୟଭୀତ ରାଣା ଏବେ ଭାରତରେ ମକଦ୍ଦମାର ପ୍ରକ୍ରିୟା ଓ ଏଥି ପାଇଁ ଲାଗୁଥିବା ସମୟକୁ ନେଇ ଓକିଲଙ୍କୁ ପ୍ରଶ୍ନ ପଚାରିବା ଆରମ୍ଭ କରିଦେଇଛି। ଟାଇମ୍ସ ଅଫ ଇଣ୍ଡିଆ ରିପୋର୍ଟ ଅନୁସାରେ ଯେତେବେଳେ ରାଣା ନିଜ ସରକାରୀ ଓକିଲଙ୍କୁ ପଚାରିଲା ମାମଲା ବର୍ଷକରେ ସରିଯିବ? ଜାଣନ୍ତୁ କଣ ଜବାବ ଦେଲେ ଓକିଲ।
ତହବୁର ରାଣା ଏବେ ଯାଞ୍ଚ ଏଜେନ୍ସୀଙ୍କ ପଚରାଉଚରାରେ ଭୟଭୀତ ହୋଇପଡିଛି। ଏଣୁ ମାମଲା ଭାରତରେ କେତେ ସମୟ ଚାଲିବ ସେ ନେଇ ଓକିଲଙ୍କୁ ପଚାରିଛନ୍ତି। ବର୍ଷକରେ ମାମଲା ସରିଯିବକି ବୋଲି ସେ ପଚାରିବାରେ କେବଳ ଚାର୍ଜସିଟ ଦାଖଲ ହେବାକୁ ଏତିକି ସମୟ ଲାଗିବ ବୋଲି ତାକୁ ଓକିଲ କହିଛନ୍ତି। ଏଥିରେ ମାମଲା ସରିବାକୁ କେତେ ସମୟ ଲାଗିବ ବୋଲି ପଚାରିବାରୁ ୫ କି ୧୦ ବର୍ଷ ଯିବ ତାର ଠିକଣା ନାହିଁ ବୋଲି ଓକିଲ କହିବାରୁ ତା ମୁହଁ ଆମ୍ବିଳା ହୋଇଯାଇଛି।
ଏଥିରେ ରାଣା ଓକିଲଙ୍କୁ ଆମେରିକୀୟ ଆଇନର ଉଦାହରଣ ଦେଇ ପଚାରିଛି ମୁଁ ‘ଫିପଥ୍’ ନେଇ ପାରିବି କି? ଅର୍ଥାତ ମୁଁ ଏପରି ପ୍ରଶ୍ନ ସବୁକୁ ଟାଳିଯିବିକି ଯାହା ମୋତେ ଫଶେଇ ପାରିବ? ବୋଲି କହିବାରୁ ଓକିଲ ଭାରତରେ କାହାକୁ ନିଜ ବିରୋଧରେ ସାକ୍ଷ ଦେବାକୁ ବାଧ୍ୟ କରାଯାଏନା ବୋଲି କହିଛନ୍ତି। ତେବେ ରାଣାର ସବୁଠୁ ବଡ଼ ଚିନ୍ତା ଯେ ସେ ପୂର୍ବରୁ ଆମେରିକାରେ ଦୀର୍ଘ ଦଣ୍ଡ କାଟି ସାରିଛି। ୨୦୧୧ରେ ଆମେରିକା କୋର୍ଟ ତାକୁ ମୁମ୍ବାଇ ଆକ୍ରମଣ ମାମଲାରେ ମୁକ୍ତ କରିଦେଇଥିଲେ।
ଏଣୁ ଭାରତରେ ଦ୍ୱିତୀୟବାର ତା ଉପରେ ମକଦ୍ଦମା ଚଳାଯିବା କେତେଦୂର ଯୁକ୍ତିଯୁକ୍ତ ତା ଉପରେ ଏବେ କୋର୍ଟରେ ତର୍କ ହେବ। ତେବେ ଏନଆଇଏର କହିବା କଥା ହେଉଛି ରାଣାକୁ ଏବେ ଅନେକ ପ୍ରମାଣର ସାମ୍ନା କରିବା ବାକି ଅଛି। ତା ସାକ୍ଷରୁ ନୂଆ ସୂଚନା ମିଳିପାରେ। କୋର୍ଟ ଏନଆଇଏକୁ ରାଣାର ୧୮ ଦିନିଆ କଷ୍ଟଡି ଦେଇଛି। ଏହା ସହିତ କୋର୍ଟ କହିଛନ୍ତି ଯେ ରାଣା ପ୍ରତି ଦୁଇ ଦିନରେ ସେ ତାର ଓକିଲଙ୍କୁ ଦେଖା କରିପାରିବ। ତେବେ ଓକିଲଙ୍କ ସହ ତାର ସାକ୍ଷାତ ଏନଆଇଏର ପ୍ରତ୍ୟକ୍ଷ ତତ୍ୱାବଧାନରେ ହେବ।
