ନୂଆଦିଲ୍ଲୀ: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ରେ ଅନେକ ବିବାଦ ଦେଖା ଦେଇଛି। ତେବେ ସବୁଠୁ ବଡ଼ ବିବାଦ ଥିଲା ଏସ ଶ୍ରୀସନ୍ଥଙ୍କୁ ହରଭଜନ ସିଂ ଚାପୁଡ଼ା ମାରିବା। ଏହି ଘଟଣା କ୍ରିକେଟ୍ ଜଗତକୁ ସ୍ତବ୍ଧକ କରିଥିଲା। ଏହି ବିବାଦ ଆଇପିଏଲ୍ର ଉଦଘାଟନୀ ସିଜିନ(୨୦୦୮)ରେ ହୋଇଥିଲା। ଉକ୍ତ ସିଜିନରେ କିଙ୍ଗ୍ସ ଇଲେଭେନ ପଞ୍ଜାବ ଏବଂ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଖେଳା୍ଯାଇଥିବା ୧୦ତମ ମୁକାବିଲାରେ ଏହି ଘଟଣା ଘଟିଥିଲା। ଏହି ବିବାଦ ଆଇପିଏଲ୍ ଇତିହାସରେ ସବୁଠୁ ବଡ଼ ବିବାଦ ମଧ୍ୟରୁ ଅନ୍ୟତମ।
ସେହି ସମୟରେ ଏହି ଘଟଣା କ୍ୟାମେରାରେ କଏଦ ହୋଇଥିଲା। ମାତ୍ର ବିସିସିଆଇ ଏବଂ ବ୍ରଡକାଷ୍ଟର୍ସ ଉକ୍ତ ଭିଡିଓକୁ ଛାଡ଼ି ନ ଥିଲେ। ଘଟଣା ଘଟିବା ସମୟରେ ପ୍ରସାରଣକାରୀ ବିଜ୍ଞାପନ ଚଲାଇଥିଲେ। ବ୍ରେକ ପରେ ପୁଣି ଥରେ ସିଧା ପ୍ରସାରଣ ହେବାରୁ ଏସ ଶ୍ରୀସନ୍ଥ କାନ୍ଦୁଥିବା ଏବଂ ବାକି ଖେଳାଳି ଆଚମ୍ବିତ ଥିବା ଦେଖିବାକୁ ମିଳିଥିଲା।
Also read: ଶୁଭମନ ଗିଲ୍ଙ୍କ କୀର୍ତ୍ତିମାନ; ଏହି ରେକର୍ଡରେ ସଚିନ-ବିରାଟଙ୍କୁ ପକାଇଲେ ପଛରେ
ପ୍ରାୟ ୧୮ ବର୍ଷ ପରେ ଆଇପିଏଲର ପୂର୍ବତନ କମିଶନର ଲଳିତ ମୋଦୀ ଏକ ପଡକାଷ୍ଟରେ ଏହି ଘଟଣାର କ୍ଲିପ ସେୟାର କରିଛନ୍ତି। ଏଥିରେ ସ୍ପଷ୍ଟ ଭାବେ ଦେଖିବାକୁ ମିଳିଛି ଯେ, ହରଭଜନ ସିଂ ଶ୍ରୀସନ୍ଥଙ୍କୁ ଚାପୁଡ଼ା ମାରୁଛନ୍ତି। ଅଷ୍ଟ୍ରେଲିଆର ପୂର୍ବତନ ଅଧିନାୟକ ମାଇକେଲ୍ କ୍ଲାର୍କଙ୍କ ସହିତ ପଡକାଷ୍ଟ ସମୟରେ ଲଳିତ ମୋଦୀ ଏହି ଘଟଣାର ଭିଡିଓ କ୍ଲିପକୁ ଦୁନିଆ ସାମ୍ନାକୁ ଆଣିଛନ୍ତି।
ଲଳିତ ମୋଦୀ ପଡକାଷ୍ଟରେ କହିଛନ୍ତି ଯେ, ସେହି ସମୟରେ ଟିଭି କ୍ୟାମେରାକୁ ବନ୍ଦ କରି ଦିଆଯାଇଥିଲା। ଏହି ଘଟଣା କେବଳ ତାଙ୍କ ସୁରକ୍ଷାକର୍ମୀଙ୍କ କ୍ୟାମେରାରେ କଏଦ ହୋଇଥିଲା। ସେ ଏହି ଭିଡିଓକୁ ନିଜ ପାଖରେ ସୁରକ୍ଷିତ ରଖିଥିଲେ। ଲଳିତ ମୋଦୀ କହିଛନ୍ତି ହରଭଜନ ସିଂ ମୋର ବହୁତ ଭଲ ବନ୍ଧୁ। ମ୍ୟାଚ୍ ସରିବା ପରେ ଦୁଇ ଦଳର ଖେଳାଳି ପରସ୍ପରକୁ ହାତ ମିଳାଇବା ସମୟରେ ହିଁ ଏହି ଘଟଣା ଘଟିଥିଲା। ହରଭଜନ ହାତ ମିଳାଇବା ସମୟରେ ଶ୍ରୀସନ୍ଥଙ୍କୁ ସିଆଡ଼େ ଯାଆନ୍ତୁ କହି ଚାପୁଡ଼ା ମାରିଥିଲେ।
One of the wildest moments in IPL history, Unseen footage of the Bhajji–Sreesanth slapgate that never been aired#IPL pic.twitter.com/E9Ux8bodOW
— Vishal (@Fanpointofviews) August 29, 2025
ଏହି ଘଟଣା ପରେ ହରଭଜନ ସିଂଙ୍କୁ ଆଇପିଏଲ୍ର ୧୧ଟି ମ୍ୟାଚ୍ରୁ ବାସନ୍ଦ କରାଯାଇଥିଲା। ଘଟଣା ପରେ ଶ୍ରୀସନ୍ଥଙ୍କ ଆଖିରେ ଲୁହ ଥିଲା ଏବଂ ସେ ହରଭଜନଙ୍କୁ କିଛି କହିବାକୁ ଚେଷ୍ଟା କରିଥିଲେ। ଶ୍ରୀଲଙ୍କାର ପୂର୍ବତନ ଅଧିନାୟକ ମହେଲା ଜୟବର୍ଦ୍ଧନେ ମଝିରେ ଆସି ଶ୍ରୀସନ୍ଥଙ୍କୁ ଅଟକାଇ ମାମଲା ଶାନ୍ତ କରାଇଥିଲେ। ଇରଫାନ ପଠାନ ମଧ୍ୟ ଶ୍ରୀସନ୍ଥଙ୍କୁ ବୁଝାଇବାକୁ ପହଞ୍ଚିଥିଲେ। ହରଭଜନ ଏହା ପରେ ଶ୍ରୀସନ୍ଥଙ୍କ ଆଡ଼କୁ ଚାହିଁ କ୍ରୋଧରେ ଇସାରା କରିଥିଲେ, ଯେଉଁଥିରେ ଉତ୍ତେଜନା ଆହୁରି ବଢିଥିଲା। ପଞ୍ଜାବର ଖେଳାଳିମାନେ ଶ୍ରୀସନ୍ଥଙ୍କୁ କୌଣସି ପ୍ରତିକ୍ରିୟା ନ ଦେବାକୁ ବୁଝାଇ ଥିଲେ।
ହରଭଜନ ସିଂ ଉକ୍ତ ଘଟଣା ପରେ ଏସ ଶ୍ରୀସନ୍ଥଙ୍କୁ ଅନେକ ଥର କ୍ଷମା ମାଗି ସାରିଛନ୍ତି। ହରଭଜନ ନିକଟରେ ରବିଚନ୍ଦ୍ରନ ଅଶ୍ଵିନଙ୍କୁ ଦେଇଥିବା ସାକ୍ଷାତକାରରେ କହିଥିଲେ ଯେ, ଯଦି ମୋତେ ଜୀବନରେ କିଛି ବଦଳାଇବାକୁ ସୁଯୋଗ ମିଳେ ତେବେ ମୁଁ ଉକ୍ତ ଭୁଲକୁ ସୁଧାରିବି। ଏହା ମୋର ଭୁଲ୍ ଥିଲା ଏବଂ ମୋତେ ଏମିତି କରିବାର ନ ଥିଲା। ଘଟଣାକୁ ନେଇ ମୋ ମନରେ ବହୁତ ବେଦନା ଏବଂ ଅବଶୋଷ ରହିଛି।
ବର୍ତ୍ତମାନ ହରଭଜନ ସିଂ ଓ ଏସ ଶ୍ରୀସନ୍ଥଙ୍କ ମଧ୍ୟରେ ସଂପର୍କରେ ସୁଧାର ଆସିଛି। ଉଭୟ ପରବର୍ତ୍ତୀ ସମୟରେ ଭାରତୀୟ ଦଳ ପାଇଁ ଏକତ୍ର କ୍ରିକେଟ୍ ଖେଳିଛନ୍ତି। ଉଭୟ ୨୦୧୧ରେ ଦିନିକିଆ ବିଶ୍ଵକପ୍ ଜିତିଥିବା ଭାରତୀୟ ଦଳର ସଦସ୍ୟ ଥିଲେ। ହରଭଜନ ଏବଂ ଶ୍ରୀସନ୍ଥଙ୍କୁ ଏକତ୍ର କମେଣ୍ଟ୍ରି କରୁଥିବା ଦେଖିବାକୁ ମିଳିଛି।
