ନୂଆଦିଲ୍ଲୀ ୨୯।୦୮: ବିରାଟ କୋହଲି ଏବଂ ସଚିନ ତେନ୍ଦୁଲକର । ଉଭୟେ ODI କ୍ରିକେଟ ଇତିହାସର ସବୁଠାରୁ ସଫଳ ବ୍ୟାଟର । ସଚିନ ODIରେ ସର୍ବାଧିକ ରନ କରିଛନ୍ତି ଏବଂ କୋହଲି ODIରେ ସର୍ବାଧିକ ଶତକ ହାସଲ କରିଛନ୍ତି । ଭାରତର ଯୁବ ବ୍ୟାଟର ଶୁଭମନ ଗିଲ୍ ମଧ୍ୟ ଏବେ ସମାନ ରାସ୍ତାରେ । ଗିଲ୍ ତାଙ୍କର ପ୍ରାରମ୍ଭିକ ୫୫ ଓ୍ବାନଡେରେ ରନ ଦୃଷ୍ଟିରୁ କୋହଲି ଏବଂ ସଚିନଙ୍କୁ ପଛରେ ପକାଇଛନ୍ତି ।
ଗିଲ୍ ଏପର୍ଯ୍ୟନ୍ତ ଭାରତ ପାଇଁ ୫୫ଟି ODI ଖେଳିଛନ୍ତି । ଏହି ସମୟ ମଧ୍ୟରେ ଗିଲ୍ ୫୫ଟି ମ୍ୟାଚରେ ୫୯.୪ ଆଭରେଜରେ ୨୭୭୫ ରନ କରିଛନ୍ତି । ଗିଲ୍ ମଧ୍ୟ ODIରେ ୮ ଶତକ ହାସଲ କରିଛନ୍ତି ।
ସେହିପରି ଦିଗ୍ଗଜ କ୍ରିକେଟର ବିରାଟ କୋହଲି ୫୫ଟି ODIରେ ୪୨.୯ ଆଭରେଜରେ ୨୦୫୯ ରନ କରିଥିଲେ । ଏହି ସମୟ ମଧ୍ୟରେ କୋହଲି ୫ ଶତକ ହାସଲ କରିଥିଲେ । ବର୍ତ୍ତମାନ ସମୟରେ ଦିନିକିଆରେ ସର୍ବାଧିକ ଶତକ ହାସଲ କରିଥିବା ଖେଳାଳି ହେଉଛନ୍ତି କୋହଲି ।
ସେହିପରି କ୍ରିକେଟର ଗଡ଼ ସଚିନ ତାଙ୍କର ପ୍ରଥମ ୫୫ ଦିନିକିଆରେ ମାତ୍ର ୩୧.୭୬ ହାରରେ ୧୫୫୬ ରନ କରିଥିଲେ । ଏହି ସମୟ ମଧ୍ୟରେ ସଚିନଙ୍କ ବ୍ୟାଟରୁ ଗୋଟିଏ ବି ଶତକ ବାହାରି ନଥିଲା। କିନ୍ତୁ ବର୍ତ୍ତମାନ ସଚିନ ଦିନିକିଆ କ୍ରିକେଟ ଇତିହାସରେ ସର୍ବାଧିକ ରନ କରିଥିବା ଖେଳାଳି।
ପ୍ରଥମ ୫୫ ଦିନିକିଆରେ ସର୍ବାଧିକ ରନ କରିବା କ୍ଷେତ୍ରରେ ଗିଲ୍ କେବଳ ସଚିନ ଏବଂ ବିରାଟଙ୍କୁ ନୁହେଁ ବରଂ ସମସ୍ତଙ୍କ ଆଗରେ ଅଛନ୍ତି । ପୂର୍ବରୁ ଏହି ରେକର୍ଡ ଦକ୍ଷିଣ ଆଫ୍ରିକାର ବ୍ୟାଟର ହାସିମ ଆମଲାଙ୍କ ପାଖରେ ଥିଲା । ଆମଲା ୫୫ ମ୍ୟାଚରେ ୫୫.୩୭ ହାରରେ ୨୭୧୩ ରନ କରିଥିଲେ । ଏବେ ଏହି ରେକର୍ଡ ଗିଲଙ୍କ ପାଖରେ ରହିଛି । ଗିଲ୍ ୫୫ ମ୍ୟାଚରେ ୨୭୭୫ ରନ କରିଛନ୍ତି।
