ନୂଆଦିଲ୍ଲୀ: ଥାଇଲ୍ୟାଣ୍ଡ ରାଜନୀତିରେ ବଡ଼ ସଙ୍କଟ। ପୈଟୋଙ୍ଗଟାର୍ଣ୍ଣ ସିନାୱାତ୍ରାଙ୍କୁ ପ୍ରଧାନମନ୍ତ୍ରୀ ପଦରୁ ବହିଷ୍କାର କରିଛନ୍ତି ଦେଶର ସାମ୍ବିଧାନିକ ଅଦାଲତ। ଦାୟିତ୍ୱ ଗ୍ରହଣ କରିବାର ମାତ୍ର ଗୋଟିଏ ବର୍ଷ ପରେ ସେ ଏହି ବିପର୍ଯ୍ୟୟର ସମ୍ମୁଖୀନ ହୋଇଛନ୍ତି। କାମ୍ବୋଡିଆର ପୂର୍ବତନ ନେତାଙ୍କ ସହ ଫୋନ୍ କଲ୍ ଲିକ୍ କରିବା ଅଭିଯୋଗରେ ଏହି ନିଷ୍ପତ୍ତି ନେଇଛନ୍ତି କୋର୍ଟ। କହିଛନ୍ତି- ଏହା ଏକ ଗୁରୁତର ଅପରାଧ। ପ୍ରଧାନମନ୍ତ୍ରୀ ପଦବୀରେ ଥିବା ସମୟରେ ଏପରି କାର୍ଯ୍ୟ ସମ୍ବିଧାନ ବିରୁଦ୍ଧ। ସିନାୱାତ୍ରା ନୈତିକ ସଂହିତା ଉଲ୍ଲଂଘନ କରିଛନ୍ତି। ସାମ୍ବିଧାନିକ ଯୋଗ୍ୟତା ପୂରଣ କରିବାରେ ବିଫଳ ହୋଇଛନ୍ତି ବୋଲି କହିଛନ୍ତି କୋର୍ଟ।
ମାତ୍ର ବର୍ଷକ ତଳେ ସିନାୱାତ୍ରା ଥାଇଲ୍ୟାଣ୍ଡର ପ୍ରଧାନମନ୍ତ୍ରୀ ହୋଇଥିଲେ। କୋର୍ଟଙ୍କ ଏପରି ନିଷ୍ପତ୍ତି ଶିନାବାତ୍ରା ପରିବାର ପ୍ରତି ମଧ୍ୟ ଶକ୍ତ ଝଟକା। ସିନାୱାତ୍ରା ଦେଶର ସର୍ବକନିଷ୍ଠ ପ୍ରଧାନମନ୍ତ୍ରୀ ହେବାର ରେକର୍ଡ କରିଥିଲେ। ଏବେ ସେ ସିନାୱାତ୍ରା ପରିବାରରୁ କିମ୍ବା ପରିବାର ସମର୍ଥନରେ ପ୍ରଧାନମନ୍ତ୍ରୀ ହୋଇଥିବା ୬ଷ୍ଠ ସଦସ୍ୟ ଭାବେ ନ୍ୟାୟପାଳିକା କିମ୍ବା ସାମାରିକ କାର୍ଯ୍ୟାନୁଷ୍ଠାନ ଦ୍ୱାରା ପଦ ହରାଇଛନ୍ତି।
ଏହା ପରେ ଉପ-ପ୍ରଧାନମନ୍ତ୍ରୀ ମନ୍ତ୍ରୀ ଫୁମଥାମ୍ ଭେଚାୟଚାଇଙ୍କ ହାତରେ କ୍ଷମତା ଆସିଛି। ସେ ବର୍ତ୍ତମାନର କ୍ୟାବିନେଟ ସହିତ କାମଚଳା ସରକାର ପରିଚାଳନା କରିବେ। ତଥାପି, ଏହା କେବଳ ସଂସଦ ନୂତନ ପ୍ରଧାନମନ୍ତ୍ରୀ ଚୟନ କରି ଦେଶର କମାଣ୍ଡ ହସ୍ତାନ୍ତର କରିବା ପର୍ଯ୍ୟନ୍ତ ସେ ହିଁ ଚଲାଇବେ। ନୈତିକ ଉଲ୍ଲଂଘନର ଅଭିଯୋଗ ମଧ୍ୟରେ, ଦେଶରେ ଏବେ କ୍ଷମତାର ଏକ ନୂତନ ସମୀକରଣ ସୃଷ୍ଟି ହେଉଛି।
କିଏ ହେବେ ଥାଇଲ୍ୟାଣ୍ଡର ପରବର୍ତ୍ତୀ ପ୍ରଧାନମନ୍ତ୍ରୀ? ରେସ୍ରେ ଅଛନ୍ତି ୫ ଜଣଙ୍କ ନାମ-
ଚୈକାସେମ୍ ନୀତିସିରି। ବୟସ ୭୭ ବର୍ଷ। ପୂର୍ବତନ ନ୍ୟାୟ ମନ୍ତ୍ରୀ ଏବଂ ଆଟର୍ଣ୍ଣି ଜେନେରାଲ। ସେ ଜଣେ ଶାନ୍ତ ଓ ସରଳ ନେତା କିନ୍ତୁ ସେ କହିଛନ୍ତି ଯେ ସେ ଆଗକୁ ଆସିବାକୁ ପ୍ରସ୍ତୁତ। ଅନୁତିନ୍ ଚାର୍ଣ୍ଣଭିରାକୁଲ୍ । ବୟସ ୫୮ ବର୍ଷ। ପୂର୍ବତନ ଉପ-ପ୍ରଧାନମନ୍ତ୍ରୀ ଏବଂ ଗୃହ ମନ୍ତ୍ରୀ। ତାଙ୍କୁ ଜଣେ ମହତ୍ୱାକାଂକ୍ଷୀ ନେତା ଭାବରେ ବିବେଚନା କରାଯାଏ। ତାଙ୍କ ଭୂମିଜୈଥାଇ ପାର୍ଟି ଜୁନ୍ ମାସରେ ପାଥୋଙ୍ଗଟାର୍ଣ୍ଣଙ୍କ ମେଣ୍ଟ ସରକାରରୁ ଅଲଗା ହେବା ପାଇଁ ଏକ ବଡ଼ ନିଷ୍ପତ୍ତି ନେଇଥିଲା।
ପ୍ରୟୁଥ୍ ଚାନ୍-ଓ-ଚା। ବୟସ ୭୧ ବର୍ଷ। ପୂର୍ବତନ ପ୍ରଧାନମନ୍ତ୍ରୀ ଏବଂ ୨୦୧୪ ସାମରିକ ବିଦ୍ରୋହର ନେତା। ଯଦିଓ ସେ ଏବେ ରାଜନୀତିରୁ ଅବସର ନେଇସାରିଛନ୍ତି ଏବଂ ଜଣେ ରାଜକୀୟ ପରାମର୍ଶଦାତାଙ୍କ ଭୂମିକା ନିର୍ବାହ କରୁଛନ୍ତି, ତଥାପି ତାଙ୍କ ନାମ ରେସ୍ରେ ରହିଛି।ତାଲିକାରେ ସାମିଲ ଅଛି। ସେହିପରି ବର୍ତ୍ତମାନର ଶକ୍ତି ମନ୍ତ୍ରୀ ପିରାପାନ୍ ସାଲିରଥବିଭାଗ ଓ ପୂର୍ବତନ ଉପପ୍ରଧାନମନ୍ତ୍ରୀ ଜୁରିନ୍ ଲକ୍ଷନାୱିସିଟ୍ ମଧ୍ୟ ପ୍ରଧାନମନ୍ତ୍ରୀ ଦୌଡ଼ରେ ଅଛନ୍ତି।
ନୂତନ ପ୍ରଧାନମନ୍ତ୍ରୀ ହେବା ପାଇଁ, ପ୍ରାର୍ଥୀଙ୍କୁ ପ୍ରଥମେ ଅତି କମରେ ୫୦ ଜଣ ସାଂସଦଙ୍କ ସମର୍ଥନ ସଂଗ୍ରହ କରିବାକୁ ପଡିବ। ଏହା ପରେ ହିଁ ସଂସଦରେ ଭୋଟିଂ ହେବ। ଏହି ଭୋଟିଂରେ ବିଜୟୀ ହେବା ପାଇଁ, ମୋଟ ୪୯୨ ଜଣ ସାଂସଦଙ୍କ ମଧ୍ୟରୁ ଅତି କମରେ ୨୪୭ ଜଣ ଭୋଟ୍ ଆବଶ୍ୟକ ହେବ।
ଯଦି କୌଣସି ପ୍ରାର୍ଥୀ ବହୁମତ ହାସଲ କରିପାରିବେ ନାହିଁ, ତେବେ ସଂସଦ ପୁଣି ଥରେ ବୈଠକ କରିବ ଏବଂ ପରବର୍ତ୍ତୀ ପ୍ରାର୍ଥୀମାନଙ୍କ ପାଇଁ ଏହି ପ୍ରକ୍ରିୟା ପୁନରାବୃତ୍ତି କରାଯିବ। ଏହି ସମ୍ପୂର୍ଣ୍ଣ ପ୍ରକ୍ରିୟା ପାଇଁ କୌଣସି ସମୟ ସୀମା ନାହିଁ। ଏହାର ଅର୍ଥ ଥାଇଲ୍ୟାଣ୍ଡରେ କ୍ଷମତା ସଂଘର୍ଷ ଦୀର୍ଘ ସମୟ ଲାଗିପାରେ।
ପାଥୋଙ୍ଗଟାର୍ଣ୍ଣ ସିନାୱାତ୍ରାଙ୍କ କ୍ଷମତା ଚାଲିଯିବା ଗତ କିଛି ମାସ ଧରି ଏହାର ସଙ୍କେତ ଦୃଶ୍ୟମାନ ହେଉଥିଲା। ବିରୋଧୀ ଦଳ ତାଙ୍କୁ ସାମ୍ବିଧାନିକ ମାନଦଣ୍ଡ ଭଙ୍ଗ ଏବଂ ରାଜନୀତିରେ ସ୍ୱଚ୍ଛତାର ଅଭାବ ପାଇଁ ଲଗାତାର ଅଭିଯୋଗ କରୁଥିଲେ। କୋର୍ଟରେ ଏହା ମଧ୍ୟ ଯୁକ୍ତି ଦିଆଯାଇଥିଲା ଯେ ସେ ଯେଉଁ ଫୋନ୍ କଲ୍ ସାର୍ବଜନୀନ କରିଥିଲେ ତାହା ଜାତୀୟ ସୁରକ୍ଷା ଏବଂ କୂଟନୈତିକ ବିଶ୍ୱାସକୁ ପ୍ରଭାବିତ କରିଛି।
ବର୍ତ୍ତମାନ ଥାଇଲ୍ୟାଣ୍ଡରେ ରାଜନୈତିକ ଅସ୍ଥିରତା ଆହୁରି ଗଭୀର ହେବାର ସମ୍ଭାବନା ରହିଛି। ସଂସଦରେ ସଂଖ୍ୟା ଏବଂ ଦଳଗୁଡ଼ିକ ମଧ୍ୟରେ ବିବାଦରେ କିଏ ପ୍ରଧାନମନ୍ତ୍ରୀ ହେବେ, ତାହା ଦେଖିବାକୁ ବାକି ରହିଲା।
