କୋଲକାତା: ଓ୍ବାକଫ୍ ସଂଶୋଧନ ଆଇନକୁ ବିରୋଧ କରି ପଶ୍ଚିମବଙ୍ଗରେ ହିଂସା । ଶନିବାର ମୁର୍ଶିଦାବାଦରେ ବାପା ଓ ପୁଅଙ୍କୁ ହତ୍ୟା କରାଯାଇଛି । ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଶମଶେରଗଞ୍ଜ ଅଞ୍ଚଳର ଜାଫରାବାଦର ଏହି ହିଂସାତ୍ମକ ଘଟଣା ଘଟିଛି । ଭିଡ଼ ଭିତରେ ଜଣେ ବାପା ଓ ପୁଅଙ୍କୁ ହତ୍ୟା କରାଯାଇଛି । ବିକ୍ଷୋଭକାରୀମାନେ ଆଜି ସକାଳୁ ଏକ ଗାଁ ଉପରେ ମିଳିତ ଭାବେ ଆକ୍ରମଣ କରିଥିଲେ । ଏହା ପୂର୍ବରୁ ଅର୍ଥାତ୍ ଶୁକ୍ରବାର ମୁର୍ଶିଦାବାଦରେ ମୁସଲମାନ ସମ୍ପ୍ରଦାୟର ଲୋକେ ନମାଜ ପଢ଼ିସାରିବା ପରେ ହିଂସାତ୍ମକ ଘଟଣା ଭିଆଇଥିଲେ । ପୋଲିସ ଘଟଣାସ୍ଥଳରେ ଆଇନଶୃଙ୍ଖଳା ପରିସ୍ଥିତି ବଜାୟ ରଖିବାକୁ ୧୬୩ ଧାରା ଲାଗୁ କରିବା ସହିତ ଇଣ୍ଟରନେଟ୍ ବନ୍ଦ କରିଦେଇଛି ।
ପ୍ରଦର୍ଶନକାରୀ ମାନେ ପୋଲିସ ଗାଡ଼ି ଓ ଆମ୍ବୁଲାନ୍ସକୁ ଟାର୍ଗେଟ୍ କରିଛନ୍ତି । ମୁର୍ଶିଦାବାଦରେ ଲୋକଙ୍କ ମଧ୍ୟରେ ଶାନ୍ତି ବଜାୟ ରଖିବା ପାଇଁ ସ୍ଥାନୀୟ ପ୍ରଶାସନ ଅପିଲ୍ କରିଛି । ସେହିପରି ସ୍ଥାନୀୟ ଅଞ୍ଚଳରେ ଉତ୍ତେଜନାକୁ କମ୍ କରିବା ପାଇଁ ପୋଲିସ-ବିଏସଏଫ ଯବାନ ମୁତୟନ ହୋଇଛନ୍ତି । ଅନ୍ୟପଟେ ମୁର୍ଶିଦାବାଦରେ କେନ୍ଦ୍ରୀୟ ସୁରକ୍ଷାବଳ ମୁତୟନ ପାଇଁ ବିଜେପି ନେତା ଶୁଭେନ୍ଦୁ ଅଧିକାରୀ କୋଲକାତା ହାଇକୋର୍ଟଙ୍କ ଦ୍ବାରସ୍ଥ ହୋଇଛନ୍ତି ।
ଶୁକ୍ରବାର ମୁର୍ଶିଦାବାଦରେ ହୋଇଥିବା ହିଂସା ଶାନ୍ତ ପଡ଼ିନାହିଁ । ମାତ୍ର ଏହା ପୂର୍ବରୁ ଅର୍ଥାତ୍ ଶନିବାର ପୁଣି ଥରେ ହିଂସାତ୍ମକ ଘଟଣା ସାମ୍ନାକୁ ଆସିଛି । ପ୍ରଦର୍ଶନକାରୀମାନେ ଭିଡ଼ ଭିତରେ ଜଣେ ବାପା ଓ ପୁଅଙ୍କୁ ବୀଭତ୍ସ ଭାବେ ହତ୍ୟା କରିଥିବା ଅଭିଯୋଗ ହୋଇଛି । ପୂର୍ବ ଦିନ ବା ଶୁକ୍ରବାର ମୁର୍ଶିଦାବାଦର ସୁତିରେ ହିଂସା ଆରମ୍ଭ ହୋଇଥିଲା । ନମାଜ ପରେ ଓ୍ବାକଫ ଆଇନକୁ ବିରୋଧ କରି ହଜାର ହଜାର ଲୋକ ପ୍ରଦର୍ଶନ କରିଥିଲେ । ପରେ ସେମାନେ ଏନଏଚ-୩୪ରୁ ବ୍ଲକ୍ କରି ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ରାସ୍ତା ଅବରୋଧକୁ ହଟାଇବାକୁ ପ୍ରୟାସ କରିଥିଲା । ଏହି ସମୟରେ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା । ତେବେ ଆଜି ଏହି ହିଂସା ଭୟଙ୍କର ରୂପ ଧାରଣ କରିଥିଲା । ଭିଡ଼ ହିଂସା ଜଣେ ବାପା ଓ ପୁଅଙ୍କର ଜୀବନ ନେଇଛି ।...
