ନୂଆଦିଲ୍ଲୀ: ‘ଆମେ ପ୍ରଭୁ ହମୁମାନଙ୍କ ଆଦର୍ଶକୁ ପାଳନ କରିଛୁ ଓ ସେମାନଙ୍କୁ ମାରିଛୁ, ଯେଉଁମାନେ ନିରୀହଙ୍କୁ ମାରିଥିଲେ ।' 'ଅପରେସନ ସିନ୍ଦୂର' ପାଇଁ ଭାରତୀୟ ସେନାକୁ ଶୁଭେଚ୍ଛା ଜଣାଇ ଏଭଳି କହିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ପହଲଗାମ ଆତଙ୍କୀ ଆକ୍ରମଣର ପ୍ରତିଶୋଧ ନେଇଛି ଭାରତ । ପିଓକେ ଓ ପାକିସ୍ତାନରେ ୯ଟି ଆତଙ୍କୀ ଠିକଣାକୁ ମଙ୍ଗଳବାର ରାତିରେ ଧ୍ୱଂସ କରିଛି ଭାରତୀୟ ସେନା । ପ୍ରକୃତ ସଂଖ୍ୟା ସ୍ପଷ୍ଟ ହୋଇନଥିଲେ ବି, ଆକ୍ରମଣରେ ବହୁ ସଂଖ୍ୟାରେ ଆତଙ୍କୀଙ୍କ ମୃତ୍ୟୁ ହୋଇଥିବା କୁହାଯାଉଛି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ 'ଅପରେସନ ସିନ୍ଦୂର'ର ସଫଳତା ପାଇଁ ଭାରତୀୟ ସେନାକୁ ଶୁଭେଚ୍ଛା ଜଣାଇଛନ୍ତି ।
ଦିଲ୍ଲୀରେ ଏକ କାର୍ଯ୍ୟକ୍ରମରେ ରାଜନାଥ ସିଂହ କହିଛନ୍ତି, 'ଭାରତୀୟ ସେନା ଅଦ୍ଭୂତ ଶୌର୍ଯ୍ୟ ଓ ପରାକ୍ରମର ପରିଚୟ ଦେଇ ଏକ ନୂଆ ଇତିହାସ ରଚିଛି । ସେନା ସଠିକ୍, ସତର୍କତା ଓ ସମ୍ୱେଦନଶୀଳତା ସହ କାର୍ଯ୍ୟାନୁଷ୍ଠାନ କରିଛି । ଆମେ ଯେଉଁ ଲକ୍ଷ୍ୟ ସ୍ଥିର କରିଥିଲୁ, ତାକୁ ସଠିକ୍ ଭାବେ ଧ୍ୱଂସ କରିଛୁ ଓ କୌଣସି ନାଗରିକ ଠିକଣା ଯେପରି ପ୍ରଭାବିତ ହେବନି, ତାହା ଉପରେ ଗୁରୁତ୍ୱ ଦେଇଥିଲୁ । ଆମେ ପ୍ରଭୁ ହନୁମାନଙ୍କ ସେହି ଆଦର୍ଶର ପାଳନ କରିଛୁ, ଯାହା ସେ ଅଶୋକ ବାଟିକା ନଷ୍ଟ କରିବା ବେଳେ କରିଥିଲେ-ଜିହ୍ନ୍ ମୋହି ମାରା ତିନ୍ ମେ ମାରେ । ଆମେ କେବଳ ସେମାନଙ୍କୁ ମାରିଛୁ, ଯେଉଁମାନେ ଆମ ନିରୀହଙ୍କୁ ମାରିଥିଲେ ।'
#WATCH | #OperationSindoor | Delhi: Defence Minister Rajnath Singh says, "We followed the principle of Lord Hanuman that he followed while going into Ashok Vatika. Jinh mohi maara, tinh mohi maare. We targetted only those who killed our innocent." pic.twitter.com/jeDnlsi9aj
— ANI (@ANI) May 7, 2025
ରାଜନାଥ ସିଂହ କହିଛନ୍ତି ଯେ ପିଏମ ମୋଦୀଙ୍କ ନେତୃତ୍ୱରେ ଆମ ସେନା ଅପରେସନ ସିନ୍ଦୂର ଲଞ୍ଚ୍ କରି ଆତଙ୍କୀଙ୍କ ଟ୍ରେନିଂ କ୍ୟାମ୍ପକୁ ଧ୍ୱଂସ କରି ଜୋରଦାର ଜବାବ ଦେଇଛନ୍ତି । ଭାରତ ରାଇଟ୍-ଟୁ-ରିସ୍ପନର ବ୍ୟବହାର କରିଛି ଓ ଭାବି ଚିନ୍ତି ଏହି କାର୍ଯ୍ୟାନୁଷ୍ଠାନ ନିଆଯାଇଛି ।
