ବିହାରର ୪ ପୋଲିଂ ବୁଥରେ ଭୋଟରଙ୍କ ସଂଖ୍ୟା ଶୂନ୍ୟ, କାହିଁକି ପଡିନି ଭୋଟ ଜାଣନ୍ତୁ କାରଣ....

ବିହାର ୦୬/୧୧: ଭୋଟ୍ ଦେଉଛି ବିହାର । ନେତାଙ୍କ ଭାଗ୍ୟ ନିର୍ଦ୍ଧାରଣ କରୁଛନ୍ତି ହଜାର ହଜାର ଜନତା । ଆମ ଦେଶର ନାଗରିକକୁ ନିଜ ନେତା ବାଛିବାର ଅଧିକାର ଦେଇଛି ଭାରତୀୟ ସମ୍ବିଧାନ । ହେଲେ ନେତା ଯଦି ଫେଲ୍ ମାରେ, ପ୍ରତିଶୃତି ପୂରଣ କର, ତେବେ ସାଧାରଣ ଲୋକ କରିବେ କଣ? ପ୍ରତି ଥର ନିର୍ବାଚନ ହେଲେ ଲୋକଙ୍କ ପାଖକୁ ଯାଆନ୍ତି ନେତା । ଅଜାଡି ଦିଅନ୍ତି ପ୍ରତିଶୃତିର ଗନ୍ତାଘର । ତେବେ ନିର୍ବାଚନ ସରିଲେ କିଏ କାହାର । କାରଣ ନେତା ଭୁଲିଯାଆନ୍ତି ସେମାନଙ୍କ ପ୍ରତିଶ୍ରୁତି ।

ଯାହାର ଫଳସ୍ୱରୂପ ଲୋକଙ୍କ ମନରେ ବଢେ ଆକ୍ରୋଶ । ବେଳେବେଳେ ଲୋକମାନେ ଭୋଟ୍ ବର୍ଜନ କରିବାକୁ ନିଷ୍ପତ୍ତି ବି ନିଅନ୍ତି । ଏସବୁ ବିଷୟରେ ଆପଣଙ୍କୁ କହିବାର କାରଣ ବି ଅଛି । କାରଣ ହେଉଛି, ବିହାରରେ ମତଦାନ ପ୍ରକ୍ରିୟା ଜାରି ରହିଥିବାବେଳେ, ଦିନ ୧୨ଟା ପରେ ବି ୪ଟି ବୁଥରେ ଗୋଟିଏ ବି ଭୋଟ୍ ପଡ଼ିନି । ଯାହାକି ଅନେକଙ୍କୁ ଆଶ୍ଚର୍ଯ୍ୟ କରିଛି ।

ବିହାରର ଦରଭଙ୍ଗା ଜିଲ୍ଲାର କୁଶେଶ୍ୱର ସ୍ଥାନ ବିଧାନସଭା ନିର୍ବାଚନମଣ୍ଡଳୀର ସୁଘରାଇନ ପଞ୍ଚାୟତରେ ଆଜି ଭୋଟଦାନ ସମ୍ପୂର୍ଣ୍ଣ ବନ୍ଦ ରହିଛି । ଗ୍ରାମବାସୀମାନେ କ୍ରମାଗତ ଅବହେଳା ଏବଂ ରାସ୍ତା ନିର୍ମାଣ ଅଭାବର ପ୍ରତିବାଦରେ ଭୋଟଦାନ ପ୍ରକ୍ରିୟାକୁ ବର୍ଜନ କରିଛନ୍ତି । ତେବେ ଗ୍ରାମବାସୀଙ୍କ ପ୍ରତିବାଦ ଏତେ ତୀବ୍ର ଥିଲା ଯେ ବୁଥ ନମ୍ବର ୨୮୪, ୨୮୫, ୨୮୬ ଏବଂ ୨୮୭ରେ ଗୋଟିଏ ବି ଭୋଟ୍ ପଡ଼ିନି ।

ସ୍ଥାନୀୟ ଲୋକମାନେ କହିଛନ୍ତି ଯେ ସେମାନେ ବର୍ଷ ବର୍ଷ ଧରି ରାସ୍ତା ନିର୍ମାଣ ପାଇଁ ଦାବି କରିଆସୁଛନ୍ତି, କିନ୍ତୁ ସରକାର ଏବଂ ଜନପ୍ରତିନିଧିଙ୍କ ଦ୍ୱାରା ଲଗାତାର ଅବହେଳା ଯୋଗୁଁ ସେମାନେ କ୍ଷୁବ୍ଧ ଅଛନ୍ତି । ଫଳସ୍ୱରୂପ, ସମଗ୍ର ଗାଁ ସର୍ବସମ୍ମତି ଭାବରେ ଭୋଟ୍ ବର୍ଜନ କରିଛି। ଗାଁ ଲୋକେ ଚେତାବନୀ ଦେଇଛନ୍ତି ଯେ ରାସ୍ତା ନିର୍ମାଣ ସମ୍ପର୍କରେ ଏକ ଠୋସ୍ ଘୋଷଣା ନହେବା ପର୍ଯ୍ୟନ୍ତ ସେମାନେ ସେମାନଙ୍କର ଗଣତାନ୍ତ୍ରିକ ପ୍ରତିବାଦ ଜାରି ରଖିବେ। ତେବେ ପ୍ରଶାସନ ପରିସ୍ଥିତିକୁ ବୁଝି ସମାଧାନ ପାଇଁ ଆଲୋଚନା କରିବାକୁ ପ୍ରୟାସ କରୁଛି ।