ନୂଆଦିଲ୍ଲୀ: ଆମେରିକା ରାଷ୍ଟ୍ରପତିଙ୍କୁ ଡୋନାଲ୍ଡ ଟ୍ରମ୍ପଙ୍କୁ ଲାଗିଛି ଶକ୍ତ ଝଟକା। ଏହି ଝଟକା ଦେଇଛନ୍ତି ଆମେରିକା ଅପିଲ୍ କୋର୍ଟ।  ବିଭିନ୍ନ ଦେଶ   ଖାସ୍ କରି  ଭାରତ ଉପରେ ୫୦% ଟାରିଫ୍ ଘୋଷଣା ପରେ ଏବେ ତାଙ୍କୁ କଡ଼ା ଜବାବ ମିଳିଛି।  ଶୁକ୍ରବାର ଦିନ ଆମେରକାର ଏକ ଅପିଲ୍ କୋର୍ଟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫକୁ ବେଆଇନ ଘୋଷଣା କରିଛନ୍ତି। ଏହି ଘୋଷଣା ପରେ  ଆମେରିକାର ରାଜନୀତି ଏବଂ ଅର୍ଥବ୍ୟବସ୍ଥାରେ ହଇଚଇ ସୃଷ୍ଟି କରିଛି।  ଆମେରିକାର ଅପିଲ୍ କୋର୍ଟ  ଫେଡେରାଲ୍ ସର୍କିଟ୍ କହିଛନ୍ତି ଯେ, ରାଷ୍ଟ୍ରପତିଙ୍କ ପାଖରେ ଜରୁରୀକାଳୀନ କ୍ଷମତା ଅଛି, କିନ୍ତୁ ତାଙ୍କ ପାଖରେ ଶୁଳ୍କ କିମ୍ବା ଟିକସ ଲଗାଇବାର ଅଧିକାର ନାହିଁ।

ଏହି ନିଷ୍ପତ୍ତିକୁ ଟ୍ରମ୍ପଙ୍କ ଅର୍ଥନୈତିକ ନୀତି ପାଇଁ ଏକ ବଡ଼ ଆଘାତ ବୋଲି ବିବେଚନା କରାଯାଉଛି। ଏକ ରିପୋର୍ଟ ଅନୁଯାୟୀ, କୋର୍ଟ ଅକ୍ଟୋବର 14 ପର୍ଯ୍ୟନ୍ତ ଶୁଳ୍କକୁ ବଳବତ୍ତର ରଖିବାକୁ ଅନୁମତି ଦେଇଛନ୍ତି, ଯାହା ଟ୍ରମ୍ପ ପ୍ରଶାସନକୁ ସୁପ୍ରିମକୋର୍ଟକୁ ମାମଲା ନେବାର ସୁଯୋଗ ଦେଇଛି। ଅନ୍ୟପକ୍ଷରେ, ରାଷ୍ଟ୍ରପତି ଟ୍ରମ୍ପ କୋର୍ଟଙ୍କ ନିର୍ଦ୍ଦେଶକୁ ସିଧାସଳଖ ପ୍ରତ୍ୟାଖ୍ୟାନ କରିଛନ୍ତି ଏବଂ କହିଛନ୍ତି ଯେ ଆଗକୁ ମଧ୍ୟ ସମସ୍ତ ଶୁଳ୍କ ବଳବତ୍ତର ରହିବ। ସେ କୋର୍ଟଙ୍କ ନିଷ୍ପତ୍ତିକୁ ଭୁଲ୍ ଏବଂ ପକ୍ଷପାତିତା ବୋଲି କହିଛନ୍ତି।  ଟ୍ରମ୍ପ ଆହୁରି କହିଛନ୍ତି ଯେ ଯଦି ଏହାକୁ ଏପରି ରହିବାକୁ ଦିଆଯାଏ, ତେବେ ଏହି ନିଷ୍ପତ୍ତି ଆମେରିକାକୁ ନଷ୍ଟ କରିବ। ଆମେ ସୁପ୍ରିମକୋର୍ଟଙ୍କ ସହାୟତାରେ ଆମ ରାଷ୍ଟ୍ରର ସ୍ୱାର୍ଥ ପାଇଁ ଶୁଳ୍କ ବ୍ୟବହାର କରିବୁ।

ଟ୍ରମ୍ପ୍ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ଲେଖିଛନ୍ତି, "ସମସ୍ତ ଶୁଳ୍କ ଏବେ ବି ବଳବତ୍ତର ଅଛି। ଆଜି ଏକ ପକ୍ଷପାତ କରୁଥିବା ଅପିଲ୍ କୋର୍ଟ ଭୁଲ ଭାବରେ ନିଜ ମନ୍ତବ୍ୟ ରଖିଛନ୍ତି। କୋର୍ଟ କହିଛନ୍ତି ଯେ ଆମର ଶୁଳ୍କ ହଟାଇବା ଉଚିତ, କିନ୍ତୁ ସେମାନେ ଜାଣନ୍ତି ଯେ ଶେଷରେ ଆମେରିକା ଜିତିବ। ଯଦି ଏହି ଶୁଳ୍କ କେବେ ହଟାଇ ଦିଆଯାଏ, ତେବେ ଏହା ଦେଶ ପାଇଁ ଏକ ବଡ଼ ବିପର୍ଯ୍ୟୟ ଆଣିବ।"

ଟ୍ରମ୍ପ୍ ଆହୁରି କହିଛନ୍ତି ଯେ, ଶ୍ରମିକ ଦିବସ ସପ୍ତାହ ଆରମ୍ଭରେ, ଆମେ ସମସ୍ତେ ମନେ ରଖିବା ଉଚିତ ଯେ ଶୁଳ୍କ ହେଉଛି ଆମର ଶ୍ରମିକମାନଙ୍କୁ ସାହାଯ୍ୟ କରିବାକୁ। ଆମେରିକା ଉତ୍ପାଦ ପ୍ରସ୍ତୁତ କରୁଥିବା କମ୍ପାନୀଗୁଡ଼ିକୁ ସମର୍ଥନ କରିବାର ଏହା ସର୍ବୋତ୍ତମ ଉପାୟ। ବହୁ ବର୍ଷ ଧରି ଆମର ଅସାବଧାନ ଏବଂ ମୂର୍ଖ ରାଜନେତାମାନେ ଆମ ବିରୁଦ୍ଧରେ ଶୁଳ୍କକୁ ବ୍ୟବହାର କରାଯାଉଥିଲା। ଏବେ, ଆମେରିକା ସୁପ୍ରିମକୋର୍ଟଙ୍କ ସହାୟତାରେ, ଆମେ ଆମ ଜାତିର ସ୍ୱାର୍ଥରେ ଟାରିଫକୁ ବ୍ୟବହାର କରିବୁ। ଆଉ ଆମେରିକାକୁ ପୁଣି ଥରେ ସମୃଦ୍ଧ, ସଶକ୍ତ ଏବଂ ଶକ୍ତିଶାଳୀ କରିବୁ।