ନୂଆଦିଲ୍ଲୀ – ଆମେରିକା ଦ୍ୱାରା ଇରାନର ପରମାଣୁ ସ୍ଥାନ ଉପରେ କରାଯାଇ ଥିବା ଏୟାର ଷ୍ଟ୍ରାଇକ୍‌କୁ ନେଇ ଅନ୍ତର୍ଜାତୀୟ ଚିନ୍ତା ବୃଦ୍ଧି ପାଇଛି। ଏହି କାରଣରୁ ସଂଯୁକ୍ତ ରାଷ୍ଟ୍ରର ସୁରକ୍ଷା ପରିଷଦ (UNSC) ରବିବାର ଜରୁରୀ ବୈଠକ ଡାକିବାକୁ ନିଷ୍ପତ୍ତି ନେଇଛି। ଏହି ବୈଠକ ଆମେରିକାର ସଦ୍ୟ ହମଲାର କ୍ଷେତ୍ରୀୟ ଓ ବୈଶ୍ୱିକ ପ୍ରଭାବ ଉପରେ ଆଲୋଚନା ପାଇଁ ଡକାଯାଇଛି। 

ସଂଯୁକ୍ତ ରାଷ୍ଟ୍ରର ଜଣେ ପ୍ରବକ୍ତା ଶନିବାର ବିଳମ୍ୱିତ ରାତିରେ କହିଛନ୍ତି, ଆମେରିକାର ଏୟାରଷ୍ଟ୍ରାଇକ୍‌ ଓ ଏହାର ସମ୍ଭାବ୍ୟ ପ୍ରଭାବକୁ ନେଇ ସୁରକ୍ଷା ପରିଷଦ ରବିବାର ବୈଠକ କରିବ। 

ଶୁକ୍ରବାର ରାତିରେ ଆମେରିକା ନିଜର ଟମହକ୍‌ କ୍ରୁଜ୍ ମିସାଇଲ ଓ ବି-୨ ବମ୍ୱର୍ସର ସାହାଯ୍ୟରେ ଇରାନର ନତାଞ୍ଜ , ଫୋର୍ଦୋ ଓ ଅରାକ୍‌ ସ୍ଥିତ ପରମାଣୁ ସ୍ଥଳୀ ଉପରେ ଲକ୍ଷ୍ୟଭେଦୀ ହମଲା କରି ଥିଲା। ଆମେରିକାର କହିବାନୁସାରେ ଏହି ପଦକ୍ଷେପ ଇରାନ ଦ୍ୱାରା ପରମାଣୁ ବିପଦ ବୃଦ୍ଧିକୁ ରୋକିବା ପାଇଁ ନିଆ ଯାଇଛି। ହେଲେ ଇରାନ ଏହାକୁ ଆକ୍ରମଣାତ୍ମକ ଓ ଅନ୍ତର୍ଜାତୀୟ ଆଇନର ଉଲ୍ଲଂଘନ ଦର୍ଶାଇ ଜବାବୀ କାର୍ଯ୍ୟାନୁଷ୍ଠାନର ଚେତାବନୀ ଦେଇଛି।

ରୁଷ୍‌ ଓ ଚୀନ ଆମେରିକାର କାର୍ଯ୍ୟାନୁଷ୍ଠାନକୁ ନିନ୍ଦା କରି କହିଛନ୍ତି ଯେ, ଏହି ହମଲା କ୍ଷେତ୍ରୀୟ ଅସ୍ଥିରତାକୁ ଆହୁରି ବଢାଇ ପାରେ। ୟୁରୋପୀୟ ସଂଘ (ଇୟୁ) ସବୁ ପକ୍ଷକୁ ସଂଯମତା ଅବଲମ୍ୱନ କରିବାକୁ ଅପିଲ କରିଛି। ଇରାନ କହିଛି ଯେ, ସେ ସଂଯୁକ୍ତ ରାଷ୍ଟ୍ରରେ ମାମଲାକୁ ଉଠାଇବ ଏବଂ ଆତ୍ମରକ୍ଷାର ଅଧିକାରୀ ସୁରକ୍ଷିତ ରଖିଥାଏ। ପାକିସ୍ତାନ ଓ ଅନେକ ମଧ୍ୟ ପୂର୍ବୀୟ ଦେଶ ମଧ୍ୟ ଆମେରିକାର କାର୍ଯ୍ୟାନୁଷ୍ଠାନର ସମାଲୋଚନା କରିଛନ୍ତି।