ନୂଆଦିଲ୍ଲୀ ୦୫।୦୬: ଗ୍ରାହକଙ୍କୁ ଲାଗିବ ଝଟକା । ଏଣିକି ଟିଭି ଦେଖିବା ହେବ ମହଙ୍ଗା । ଟିଭି ପ୍ରିୟ ବ୍ୟକ୍ତିଙ୍କୁ ଏବେ ଗଣିବାକୁ ପଡିବ ମୋଟା ଅଙ୍କର ଟଙ୍କା । ଡିଜନି ଷ୍ଟାର, ଭାୟାକମ୍ ୧୮, ଜି ଏଣ୍ଟରଟେନମେଣ୍ଟ ଏବଂ ସୋନି ପିକ୍ଚର୍ସ ନେଟୱାର୍କ ବଢାଉଛନ୍ତି ଦାମ୍ । ଏହାର ପ୍ରଭାବ ସିଧାସଳଖ ସାଧାରଣ ଜନତାଙ୍କ ପକେଟରେ ପଡିବ । ରିପୋର୍ଟ ଅନୁଯାୟୀ ଟିଭି ସବ୍ସ୍କିପ୍ସନ୍ ୫ରୁ ୮ ପ୍ରତିଶତ ହେବ ମହଙ୍ଗା ।
ଟିଭି ରିଚାର୍ଜ ବଢାଇବାକୁ ନେଇ TRAI ଲୋକସଭା ନିର୍ବାଚନ ପର୍ଯ୍ୟନ୍ତ ଅପେକ୍ଷା କରିବାକୁ କହିଥିଲା । ବର୍ତ୍ତମାନ ଲୋକସଭା ନିର୍ବାଚନ ଶେଷ ହୋଇଥିବାରୁ ବର୍ତ୍ତମାନ ବଢିପାରେ ଟିଭି ଚ୍ୟାନେଲର ଦର ।
ସମସ୍ତ ପ୍ରସାରଣକାରୀ କମ୍ପାନୀ ନୂଆ ଚୁକ୍ତିନାମା କରିବାକୁ ଡିପିଓକୁ କହିଥିଲେ। ଏହାପରେ ଟେଲିକମ୍ ରେଗୁଲେଟରୀ ଅଥରିଟି ଅଫ୍ ଇଣ୍ଡିଆ ସମସ୍ତ ପ୍ରସାରଣକାରୀଙ୍କୁ କହିଥିଲେ ଯେ ଲୋକସଭା ନିର୍ବାଚନ ପର୍ଯ୍ୟନ୍ତ ସିଗନାଲ୍ ବନ୍ଦ କରନ୍ତୁ ନାହିଁ । ବର୍ତ୍ତମାନ TRAI ଏହାକୁ ଯେକୌଣସି ସମୟରେ ମଞ୍ଜୁରୀ ଦେଇପାରେ ।
ଚଳିତବର୍ଷ ଜାନୁଆରୀରେ ସମସ୍ତ ଚ୍ୟାନେଲ ଦାମ୍ ୧୦ ପ୍ରତିଶତ ବୃଦ୍ଧି କରିଥିଲେ । ଭାୟାକମ୍ ୧୮ ଦାମ୍କୁ ସର୍ବାଧିକ ୨୫ ପ୍ରତିଶତ ବୃଦ୍ଧି କରିଛି । କ୍ରିକେଟ୍ ଅଧିକାର ଏବଂ ମନୋରଞ୍ଜନ ଚ୍ୟାନେଲଗୁଡିକର ବଜାର ଅଂଶ ବୃଦ୍ଧି ହେତୁ ଏହି ବୃଦ୍ଧି କରାଯାଇଥିଲା । ଫେବୃଆରୀରୁ ଏହି ନୂଆ ରେଟ୍ କାର୍ଯ୍ୟକାରୀ ହୋଇଥିଲା ।
