ରାଞ୍ଚିରେ ରୋମାଞ୍ଚକର ବିଜୟ: ଶେଷ ଓଭରରେ ଦକ୍ଷିଣ ଆଫ୍ରିକାକୁ ୧୭ ରନ୍‌ରେ ହରାଇ ମ୍ୟାଚ୍ ଜିତିଲା ଭାରତ,ସିରିଜ୍‌ରେ ୧-୦ରେ ଆଗୁଆ

ରାଞ୍ଚି: ରାଞ୍ଚିରେ ଖେଳା ଯାଇଥିବା ରୋମାଞ୍ଚକର ପ୍ରଥମ ଦିନିକିଆକୁ ଜିତି ନେଇଛି ଭାରତ। ବିରାଟ କୋହଲିଙ୍କ ଶତକ ଓ ରୋହିତଙ୍କ ଅର୍ଦ୍ଧଶତକ ପରେ ବୋଲରଙ୍କ ମିଳିତ ପ୍ରୟାସରେ ପ୍ରଥମ ଦିନିକିଆରେ ଭାରତ ଭ୍ରମଣକାରୀ ଦକ୍ଷିଣ ଆଫ୍ରିକାକୁ ୧୭ ରନରେ ହରାଇଛି। ବିଜୟ ସହ ଭାରତ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜରେ ୧-୦ରେ ଅଗ୍ରଣୀ ହାସଲ କରିଛି। ଭାରତ ଦ୍ଵାରା ଧାର୍ଯ୍ୟ ୩୫୦ ରନର ବିଜୟ ଲକ୍ଷ୍ୟ ପିଛା କରି ଦକ୍ଷିଣ ଆଫ୍ରିକା ୩୩୨ ରନ କରି ପାରିଛି। ମାଥ୍ୟୁ ବ୍ରିଟଜକେ ୭୨ ରନ ଓ ମାର୍କୋ ଜନସେନ ବିସ୍ଫୋରକ ୭୦ ରନ କରିଥିଲେ। ବୋଲିଂରେ କୁଲଦୀପ ଯାଦବ ୪ ଓ୍ଵିକେଟ୍ ନେଇ ଦଳ ବିଜୟରେ ଉଲ୍ଲେଖନୀୟ ଯୋଗଦାନ ଦେଇଛନ୍ତି। ଏହା ପୂର୍ବରୁ ଭାରତ ବିରାଟ କୋହଲିଙ୍କ ୧୩୫ ରନ,ରୋହିତଙ୍କ ୫୭ ରନ ଓ କେଏଲ ରାହୁଲଙ୍କ ୬୦ ରନ ବଳରେ ୮ ଓ୍ଵିକେଟ୍ ହରାଇ ୩୪୯ ରନ କରିଥିଲା। ସିରିଜର ଦ୍ଵିତୀୟ ଦିନିକିଆ ଡିସେମ୍ବର ୩ରେ ରାୟପୁରରେ ଖେଳାଯିବ।

୩୫୦ ରନର ବିଜୟ ଲକ୍ଷ୍ୟ ପିଛା କରିଥିବା ଦକ୍ଷିଣ ଆଫ୍ରିକା ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟ ଭୋଗିଥିଲା। ଦଳ ୧୧ ରନରେ ୩ ଓ୍ଵିକେଟ୍ ହରାଇଥିଲା। ଇନିଂସର ଦ୍ଵିତୀୟ ଓଭରରେ ହର୍ଷିତ ରାଣା ରିୟାନ ରିକଲଟନ ଓ କ୍ଵିଣ୍ଟନ ଡିକକଙ୍କୁ ଖାତା ଖୋଲିବାକୁ ଦେଇ ନ ଥିଲେ। ଅଧିନାୟକ ଆଡନ ମାରକ୍ରମ(୭)ଙ୍କ ଆଉଟ୍ କରିଥିଲେ ଅର୍ଶଦୀପ ସିଂ। ଏହା ପରେ ମାଥ୍ୟୁ ବ୍ରିଟଜକେ ଓ ଟୋନି ଡି ଜୋର୍ଜି ଦଳକୁ ମୁସ୍କିଲ ସ୍ଥିତିରୁ ବାହାର କରିବାକୁ ଚେଷ୍ଟା କରିଥିଲେ। ଉଭୟ ଚତୁର୍ଥ ଓ୍ଵିକେଟ୍ ପାଇଁ ୬୬ ରନ କରିଥିଲେ। ଜୋର୍ଜି ୩୯ ରନ କରି କୁଲଦୀପଙ୍କ ବଲରେ ଆଉଟ୍ ହୋଇଥିଲେ। ପୁଣି ବ୍ରିଟଜକେ ଓ ଡିଓ୍ଵାର୍ଲ୍ଡ ବ୍ରେଭିସ ପଞ୍ଚମ ଓ୍ଵିକେଟ୍ରେ ୫୩ ରନ ଯୋଡ଼ିଥିଲେ। ବ୍ରେଭିସ ୨୮ ବଲରୁ ୩୭ ରନ କରି ହର୍ଷିତଙ୍କ ତୃତୀୟ ଶିକାର ହୋଇଥିଲେ।

୧୩୦ ରନରେ ୫ ଓ୍ଵିକେଟ୍ ହରାଇବା ପରେ ଲାଗୁଥିଲା ଦକ୍ଷିଣ ଆଫ୍ରିକା ଇନିଂସ ଶୀଘ୍ର ସରିବ। କିନ୍ତୁ ମ୍ୟାଟଜକେ ଓ ମାର୍କୋ ଜନସେନ ପାଲଟା ଆକ୍ରମଣ କରିଥିଲେ। ବିଶେଷ କରି ଜନସେନ ଭାରତୀୟ ବୋଲରଙ୍କ ଧୁଲେଇ କରିଥିଲେ। ଦୁହେଁ ୯୭ ରନ ଯୋଡ଼ି ଦକ୍ଷିଣ ଆଫ୍ରିକାକୁ ମ୍ୟାଚର ପ୍ରତ୍ୟାବର୍ତ୍ତନ କରାଇଥିଲେ। ଦୁଇ ବ୍ୟାଟର ଅର୍ଦ୍ଧଶତକ ହାସଲ କରିଥିଲେ। ଏହି ଯୋଡ଼ି ଟିମ୍ ଇଣ୍ଡିଆ ପାଇଁ ମୁଣ୍ଡ ବିନ୍ଧାର କାରଣ ପାଲଟିଥିଲେ।ତେବେ ୩୪ ତମ ଓଭରରେ କୁଲଦୀପ ଯାଦବ ଭାରତକୁ ଆଶ୍ଵସ୍ତି ଦେଇଥିଲେ। ଜନସେନ ଓ ବ୍ରିଟଜକେ ଉଭୟ କୁଲଦୀପଙ୍କ ଶିକାର ହୋଇଥିଲେ। ଜନସେନ ମାତ୍ର ୩୯ ବଲରୁ ୮ ଚୌକା ଓ ୩ ଛକା ସହ ୭୦ ରନ କରିଥିଲେ। ବ୍ରିଟଜକେ ୭୨ ରନର ଇନିଂସ ଖେଳିଥିଲେ। ତଥାପି କୋର୍ବିନ ବୋଶ ନିଜ ଦଳକୁ ହାର ମାନିବାକୁ ଦେଇ ନ ଥିଲେ। ସେ ଶେଷପର୍ଯ୍ୟନ୍ତ ଲଢ଼େଇ ଜାରି ରଖି ଅର୍ଦ୍ଧଶତକ ହାସଲ କରିଥିଲେ। ହେଲେ ଶେଷ ଓଭରରେପ୍ରସିଦ୍ଧ କୃଷ୍ଣାଙ୍କ ବଲ୍ରେ କୋର୍ବିନ ବୋଶ ୬୭ଟି ରନ୍ କରି ରୋହିତଙ୍କ ହାତକୁ କ୍ୟାଚ୍ ଦେଇ ଆଉଟ ହୋଇଥିଲେ । ସଂଘର୍ଷ କରିବା ପରେ ଦକ୍ଷିଣ ଆଫ୍ରିକା ୩୩୨ ରନ କରିପାରିଥିଲା। ଫଳରେ ଭାରତ ଏହି ମ୍ୟାଚକୁ ୧୭ ରନରେ ଜିତି ନେଇଛି।

ଭାରତ ପକ୍ଷରୁକୁଲଦୀପ ଯାଦବ ସର୍ବାଧିକ ୱିକେଟ୍ ନେଇଥିଲେ। ସେ ୧୦ ଓଭର ବୋଲିଂ କରି ୬୮ ରନ୍ ଦେଇ ୪ ୱିକେଟ ହାସଲ କରିଥିଲେ। ସେହିପରି ତାଙ୍କ ପଛକୁ ୧୦ ଓଭର ବୋଲିଂ କରିବା ୬୫ ରନ୍ ଦେବା ସହିତ ୩ଟି ୱିକେଟ୍ ନେଇଥିଲେ। ଅର୍ଶଦୀପ ସିଂହ ଦୁଇଟି ୱିକେଟ୍ ନେଇଥିବା ବେଳେ ପ୍ରସିଦ୍ଧ କ୍ରିଷ୍ଣା ଶେଷ ଓଭର ବୋଲିଂ ଗୁରୁତ୍ୱପୂର୍ଣ୍ଣକୋର୍ବିନ ବୋଶଙ୍କ ୱିକେଟ୍ ନେଇଥିଲେ। ହେଲେୱାଶିଂଟନ ସୁନ୍ଦର, ଓ ରବିନ୍ଦ୍ର ଜାଡ଼େଜାଙ୍କୁ କୌଣସି ସଫଳତା ମିଳି ନଥିଲା।