ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ସାମରିକ ସଂଘର୍ଷକୁ ରୋକିଛି ଆମେରିକା। ଏନେଇ ପୁଣି ଥରେ ଦାବି କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଟ୍ରମ୍ପ ଉଭୟ ଦେଶକୁ କହିଛନ୍ତି ଯେ ଗୁଳି ଚଳାଇଥିବା ଲୋକ କିମ୍ବା ଦେଶଙ୍କ ସହିତ ବ୍ୟବସାୟ କରିପାରିବ ନାହିଁ ଆମେରିକା। ଆମେ ଭାରତ ଏବଂ ପାକିସ୍ତାନକୁ ଯୁଦ୍ଧ କରିବାରୁ ରୋକିଛୁ। ମୁଁ ବିଶ୍ୱାସ କରେ ଏହା ଏକ ପରମାଣୁ ବିପର୍ଯ୍ୟୟରେ ପରିଣତ ହୋଇପାରିଥାନ୍ତା ବୋଲି କହିଛନ୍ତି ଟ୍ରମ୍ପ। ଟେସଲା ସିଇଓ ଏଲୋନ ମସ୍କଙ୍କ ସହିତ ଓଭାଲ ଅଫିସରେ ଏକ ସାମ୍ବାଦିକ ସମ୍ମିଳନୀ ସମୟରେ ଏହା କହିଥିଲେ ଟ୍ରମ୍ପ।
ଟ୍ରମ୍ପ କହିଛନ୍ତି ଯେ ସେ ଭାରତ ଓ ପାକିସ୍ତାନର ନେତାମାନଙ୍କୁ ଧନ୍ୟବାଦ ଦେବାକୁ ଚାହୁଁଛି। ବାଣିଜ୍ୟକୁ ନେଇ ଉଭୟ ଦେଶ ସହିତ କଥା ହୋଇଥିଲୁ। ଆମେ ପରସ୍ପର ଉପରେ ଗୁଳି ଚଳାଇଥିବା ଏବଂ ପରମାଣୁ ଅସ୍ତ୍ର ବ୍ୟବହାର କରିବାର ସମ୍ଭାବନା ଥିବା ଲୋକଙ୍କ ସହିତ ବ୍ୟବସାୟ କରିପାରିବୁ ନାହିଁ।
ଟ୍ରମ୍ପ୍ କହିଥିଲେ ଯେ ଭାରତ ଏବଂ ପାକିସ୍ତାନର ନେତାମାନେ 'ମହାନ' ଏବଂ 'ସେମାନେ ଜ୍ଞାନ ଦେଖାଇ ରାଜି ହୋଇଥିଲେ, ଯାହା ପରେ ଏହା ସବୁ ବନ୍ଦ ହୋଇଗଲା।' ଟ୍ରମ୍ପ୍ ଆହୁରି କହିଛନ୍ତି, 'ଆମେ ଅନ୍ୟମାନଙ୍କୁ ଯୁଦ୍ଧ କରିବାରୁ ମଧ୍ୟ ବାରଣ କରୁଛୁ, କାରଣ ସର୍ବୋପରି ଆମେ ସମସ୍ତଙ୍କ ଅପେକ୍ଷା ଭଲ ଭାବରେ ଲଢ଼ିପାରିବୁ। ଆମର ବିଶ୍ୱର ସର୍ବଶ୍ରେଷ୍ଠ ସେନା ଅଛି। 'ଆମ ପାଖରେ ବିଶ୍ୱର ସର୍ବଶ୍ରେଷ୍ଠ ନେତା ଅଛନ୍ତି।'
୨୨ ଏପ୍ରିଲରେ ଜମ୍ମୁ ଏବଂ କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣର ପ୍ରାୟ ଦୁଇ ସପ୍ତାହ ପରେ, ଯେଉଁଥିରେ ୨୬ ଜଣ ଲୋକ ପ୍ରାଣ ହରାଇଥିଲେ। ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀର (ପିଓକେ)ରେ ଆତଙ୍କବାଦୀ ଆଡ୍ଡାଗୁଡ଼ିକୁ ଟାର୍ଗେଟ କରି ଅପରେସନ ସିନ୍ଦୂର ଆରମ୍ଭ କରିଥିଲା ଭାରତ। ସୀମାର ଉଭୟ ପାର୍ଶ୍ୱରୁ ଚାରି ଦିନ ଧରି ଡ୍ରୋନ୍ ଏବଂ ମିଶାଇଲ ଆକ୍ରମଣ ପରେ ଭାରତ ଏବଂ ପାକିସ୍ତାନ ମେ ୧୦ ତାରିଖରେ ଅସ୍ତ୍ର ବିରତି ପାଇଁ ରାଜି ହୋଇଥିଲେ।
ଭାରତ ସ୍ପଷ୍ଟ କରିଛି ଯେ ଦୁଇ ଦେଶର DGMO ମଧ୍ୟରେ ଆଲୋଚନା ସମୟରେ ସାମରିକ କାର୍ଯ୍ୟାନୁଷ୍ଠାନ ତୁରନ୍ତ ବନ୍ଦ କରିବା ପାଇଁ ଏକ ଚୁକ୍ତି ହୋଇଥିଲା। ଏଥିରେ କୌଣସି ତୃତୀୟ ପକ୍ଷ ଜଡିତ ନୁହେଁ ବୋଲି ସେ କହିଥିଲେ।
