ନୂଆଦିଲ୍ଲୀ ୦୬/୦୮: ଦିନକୁ ଦିନ କଠୋର ହେଉଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ବିଶେଷ କରି ପ୍ରବାସୀଙ୍କ ପ୍ରତି ଟ୍ରମ୍ପ ପ୍ରଶାସନ କଠୋର ନୀତି ଅବଲମ୍ବନ କରିଆସିଛି । ପୂର୍ବରୁ ବି କଠୋର ଭିସା ନିୟମ ଲାଗୁ କରିବା ପାଇଁ ଜଣାଶୁଣା । ଏହି ସମୟରେ, ଆମେରିକା ଏବେ ଏକ ନୂତନ ପାଇଲଟ୍ କାର୍ଯ୍ୟକ୍ରମ ଆଣିଛି ।
ପାଇଲଟ ପ୍ରୋଜେକ୍ଟ ଅଧୀନରେ ପର୍ଯ୍ୟଟନ ଓ ବ୍ୟବସାୟିକ ଭିସାରେ ଆମେରିକା ଆସୁଥିବା ଲୋକମାନଙ୍କୁ ଭିସା ବଣ୍ଡ ଭାବରେ $ ୧୫,୦୦୦ ଅର୍ଥାତ୍ ୧୩ ଲକ୍ଷ ୧୬ ହଜାର ଟଙ୍କାରୁ ଅଧିକ ଜମା କରିବାକୁ କୁହାଯାଇପାରେ। ଆମେରିକାର ବୈଦେଶିକ ବିଭାଗର ଏହି କାର୍ଯ୍ୟକ୍ରମର ଉଦ୍ଦେଶ୍ୟ ହେଉଛି ଭିସା ଶେଷ ହେବା ପରେ ମଧ୍ୟ ଦେଶରେ ରହୁଥିବା ଲୋକଙ୍କ ସଂଖ୍ୟା ହ୍ରାସ କରିବା।
କାର୍ଯ୍ୟକ୍ରମ ଅନୁଯାୟୀ, ପର୍ଯ୍ୟଟନ ଭିସା (B1 ଭିସା) ଏବଂ ବ୍ୟବସାୟ ଭିସା (B2 ଭିସା)ରେ ଆମେରିକା ଆସୁଥିବା ଲୋକଙ୍କଠାରୁ ଏକ ଭିସା ବଣ୍ଡ ନିଆଯିବ। ଏହି କାର୍ଯ୍ୟକ୍ରମ ସମ୍ପର୍କରେ ଏକ ସାର୍ବଜନୀନ ନୋଟିସରେ କୁହାଯାଇଛି ଯେ ଗତ କିଛି ବର୍ଷ ଧରି ଲକ୍ଷ ଲକ୍ଷ ବିଦେଶୀ ସମୟସୀମା ମଧ୍ୟରେ ଆମେରିକା ଛାଡିନାହାଁନ୍ତି । ଭିସା ଶେଷ ହେବା ପରେ ମଧ୍ୟ ଆମେରିକାରେ ରହୁନାହାଁନ୍ତି। ତଥାପି, ନୋଟିସରେ ସ୍ପଷ୍ଟ କରାଯାଇ ନାହିଁ ଯେ ସମସ୍ତ ଦେଶ ଏହି ଭିସା କାର୍ଯ୍ୟକ୍ରମର ପରିସରଭୁକ୍ତ ହେବେ କି କିଛି ଦେଶ ଛାଡ ପାଇବେ।
ଏହି କାର୍ଯ୍ୟକ୍ରମ ଅଧୀନରେ କେଉଁ ଦେଶ ଆସିବେ ସେ ବିଷୟରେ ବର୍ତ୍ତମାନ କୌଣସି ସ୍ପଷ୍ଟ ସୂଚନା ନାହିଁ, କିନ୍ତୁ ଭାରତୀୟମାନେ ଭିସା ନିୟମ ଉଲ୍ଲଂଘନ କରିବାର ଇତିହାସକୁ ଦୃଷ୍ଟିରେ ରଖି, ଭାରତକୁ ଏହି କାର୍ଯ୍ୟକ୍ରମରେ ସାମିଲ କରାଯିବାର ସମ୍ଭାବନା ବହୁତ ଅଧିକ। ଏହି ବଣ୍ଡ ସେହି ଦେଶର ଲୋକମାନଙ୍କୁ ପୂରଣ କରିବାକୁ ପଡିବ ଯେଉଁମାନେ ସେମାନଙ୍କର ଭିସା ମିଆଦ ଶେଷ ହେବା ପରେ ମଧ୍ୟ ଆମେରିକାରେ ରହୁଛନ୍ତି । ଯେଉଁମାନଙ୍କ ପାଖରେ ପର୍ଯ୍ୟାପ୍ତ କାଗଜପତ୍ର ନାହିଁ ।
ସାର୍ବଜନୀନ ନୋଟିସରେ କୁହାଯାଇଛି ଯେ କାର୍ଯ୍ୟକ୍ରମ କାର୍ଯ୍ୟକାରୀ ହେବାର ଅତି କମରେ ୧୫ ଦିନ ପୂର୍ବରୁ କେଉଁ ଦେଶ ଏହି କାର୍ଯ୍ୟକ୍ରମ ଅଧୀନରେ ଆସିବେ ସେ ବିଷୟରେ ସୂଚନା ଦିଆଯିବ । ଏହି ସମୟ ମଧ୍ୟରେ ଦେଶଗୁଡ଼ିକର ନାମ ମଧ୍ୟ ସଂଶୋଧନ କରାଯାଇପାରିବ।
ଆମେରିକାର ବୈଦେଶିକ ବିଭାଗ କହିଛି ଯେ ଏହି ଭିସା କାର୍ଯ୍ୟକ୍ରମ ମଧ୍ୟ କାର୍ଯ୍ୟକାରୀ କରାଯାଉଛି । ଯାହା ଦ୍ୱାରା ବିଦେଶୀ ସରକାରମାନେ ମଧ୍ୟ ସେମାନଙ୍କର ଘରୋଇ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିପାରିବେ । ନିଶ୍ଚିତ କରିପାରିବେ ଯେ ସେମାନଙ୍କର ନାଗରିକମାନେ ବୈଧ କାଗଜପତ୍ର ବିନା ଅନ୍ୟ ଦେଶକୁ ନ ଯାଆନ୍ତି।
ଏଥିରେ ଆହୁରି କୁହାଯାଇଛି, 'ପାଇଲଟ୍ କାର୍ଯ୍ୟକ୍ରମକୁ ଏକ କୂଟନୈତିକ ଉପକରଣ ଭାବରେ ଡିଜାଇନ୍ କରାଯାଇଛି । ଯାହା ବିଦେଶୀ ସରକାରଙ୍କୁ ପରିଚୟ ଯାଞ୍ଚ କରିବାକୁ ଏବଂ ସାର୍ବଜନୀନ ସୁରକ୍ଷା କ୍ଷେତ୍ରରେ ସମସ୍ତ ନାଗରିକଙ୍କ କଠୋର ତଦନ୍ତ କରିବାକୁ ଉତ୍ସାହିତ କରିବ। ଏହି କାର୍ଯ୍ୟକ୍ରମର ଲକ୍ଷ୍ୟ ଦେଶଗୁଡ଼ିକୁ ସେମାନଙ୍କର ନାଗରିକମାନଙ୍କୁ ଆମେରିକା ଗସ୍ତରୁ ସମୟ ମଧ୍ୟରେ ପ୍ରସ୍ଥାନ କରିବାକୁ ଉତ୍ସାହିତ କରିବା।
