ରାୟଗଡା ୧୯/୪: ରାୟଗଡା କୋରାପୁଟ କେ.ଆର ଲାଇନରେ ଟ୍ରେନ ଚଳାଚଳ ସ୍ବାଭାବିକ । ରେଲୱେ ବିଭାଗର ଟେକ୍ନିକାଲ ଟିମ୍ ପହଞ୍ଚି ମରାମତି କରିବା ପରେ ଟ୍ରେନ ଚଳାଚଳ ସ୍ବାଭାବିକ ହୋଇଛି । ରାଉରକେଲାରୁ ଜଗଦଲପୁର ଯାଉଥିବା ଇଣ୍ଟରସିଟି ଏକ୍ସପ୍ରେସର ଟ୍ରେନ ଇଞ୍ଜିନର ପେଣ୍ଟୋଗ୍ରାଫ ଅଚଳ ହୋଇଯାଇଥିଲା ।
ଭୋର୍ରୁ ଏପରି ଅବ୍ୟବସ୍ଥା ସାମ୍ନାକୁ ଆସିଛି । ଲିଲିଗୁମ୍ମା ରାଉଳି ମଧ୍ୟରେ ଇଣ୍ଟରସିଟି ଏକ୍ସପ୍ରେସ ଓ ଭୁବନେଶ୍ବରରୁ ଜଗଦଲପୁର ଯାଉଥିବା ହୀରାଖଣ୍ଡ ଏକ୍ସପ୍ରେସ ଲିଲିଗୁମ୍ମା ନିକଟରେ ଅଟକି ରହିଥିଲା । ଫଳରେ ସେଇ ଲାଇନରେ ପ୍ରାୟ ଦୀର୍ଘ ୪ ଘଣ୍ଟା ଧରି ଟ୍ରେନ ଚଲାଚଳ ବାଧାପ୍ରାପ୍ତ ହୋଇଥିଲା ।
ସକାଳୁ ସକାଳୁ ନାହିଁନଥିବା ଅସୁବିଧାର ସମ୍ମୁଖୀନ ହୋଇଥିଲେ ଯାତ୍ରୀ । ଟ୍ରେନ ଇଞ୍ଜିନକୁ ବିଦ୍ୟୁତ ଯୋଗାଣ ନହେବା ଯୋଗୁ ଟ୍ରେନ ଆଗକୁ ଗଡି ପାରିନଥିଲା । ଖବର ପାଇଁ ରେଲୱେ ବିଭାଗର ଟେକ୍ନିକାଲ ଟିମ୍ ଘଟଣାସ୍ଥଳରେ ପହଞ୍ଚି ମରାମତି ଆରମ୍ଭ କରିଥିଲେ । ୧୨ ଘଣ୍ଟା ମଧ୍ୟରେ ଏହି ରୁଟ୍ରେ ଦୁଇ ଦୁଇଟି ଟ୍ରେନର ପେଣ୍ଟୋଗ୍ରାଫ ଅଚଳ ହେବା ଘଟଣା ରେଳ ବିଭାଗକୁ ଚିନ୍ତାରେ ପକାଇଥିଲା । ଏହି ରୁଟ୍ରେ ପେଣ୍ଟୋଗ୍ରାଫ କାହିଁକି ଅଚଳ ହେଲା ସେ ସଂପର୍କରେ ତଦନ୍ତ ଚାଲିଥିବା କହିଥିଲେ ରାୟଗଡା ଷ୍ଟେସନ ମ୍ୟାନେଜର । ତେବେ ଦୀର୍ଘଘଣ୍ଟା ଧରି ମରାମତି ପରେ ଟ୍ରେନ ଚଳାଚଳ ସ୍ବାଭାବିକ ହୋଇଛି । ଆଉ ଆଶ୍ବସ୍ତ ହୋଇଛନ୍ତି ଯାତ୍ରୀ ।
