ଡାକ୍ତରଖାନା ପାଇଁ ୨୭ତମ ଦିନରେ ପହଞ୍ଚିଲା ଅନଶନ, ପ୍ରଶାସନ ନିରବଦ୍ରଷ୍ଟା

ଦେବଗଡ଼: ୨୪ ଘଣ୍ଟିଆ ଚିକିତ୍ସା ସେବା ଯୋଗାଇ ଦେବା ପାଇଁ ପୁରୁଣା ଜିଲ୍ଲା ମୁଖ୍ୟ ଚିକିତ୍ସାଳୟ ସମ୍ମୁଖରେ ଅନଶନ। ଦେବଗଡ଼ର ପୁରୁଣା ଜିଲ୍ଲା ମୁଖ୍ୟ ଚିକିତ୍ସାଳୟରେ ୨୪ ଘଣ୍ଟିଆ ଚିକିତ୍ସାସେବା ଯୋଗାଇ ଦେବା ପାଇଁ ଯୁବ ସମାଜସେବୀ ଅର୍ଣ୍ଣବ ପଣ୍ଡା ଅନଶନରେ ବସିଥିବା ବେଳେ ଏହା ୨୭ତମ ଦିନରେ ପହଞ୍ଚିଛି। ଶନିବାରଠାରୁ ଅର୍ଣ୍ଣବ ମୁହଁରେ କଳାପଟି ବାନ୍ଧି ଅନଶନରେ ବସିଛନ୍ତି। ତାଙ୍କୁ ସମର୍ଥନ କରି ବହୁ ସଂଖ୍ୟରେ ମହିଳା ତାଙ୍କ ସହ ଅନଶନରେ ବସିଛନ୍ତି।

ନୂତନ ଜିଲ୍ଲା ମୁଖ୍ୟ ଚିକିତ୍ସାଳୟ କୋଠାକୁ ସମସ୍ତ ଆସବାବ ପତ୍ର ସ୍ଥାନାନ୍ତରିତ ହୋଇ କାର୍ଯ୍ୟକ୍ଷମ ହେବା ପରେ ସହର ମଝିରେ ଥିବା ପୁରୁଣା କୋଠାରେ କେବଳ ଜଣେ ଡାକ୍ତର ସକାଳେ ଚାରି ଘଣ୍ଟା ଓ ଅପରାହ୍ନ ସମୟରେ ଦୁଇ ଘଣ୍ଟା ବସି ଚିକିତ୍ସାସେବା ଯୋଗାଉଛନ୍ତି। କିନ୍ତୁ ସହରବାସୀ ଏହି କୋଠାରେ ୨୪ ଘଣ୍ଟିଆ ସହରାଞ୍ଚଳ ଡାକ୍ତରଖାନା ଆରମ୍ଭ କରି ଚିକିତ୍ସାସେବା ଯୋଗାଇ ଦେବାପାଇଁ ଦାବି କରୁଛନ୍ତି। ବିଭିନ୍ନ ସଂଗଠନ ପକ୍ଷରୁ ଏନେଇ ଅନେକ ଦାବିପତ୍ର ଦିଆଯିବା ସହ ସହର ବନ୍ଦ ପାଳନ ମଧ୍ୟ କରାଯାଇଛି।

ଯୁବ ସମାଜସେବୀ ଅର୍ଣ୍ଣବ ପଣ୍ଡା ଏନେଇ ପଦଯାତ୍ରାରେ ଭୁବନେଶ୍ବର ଯାଇ ମୁଖ୍ୟମନ୍ତ୍ରୀଙ୍କୁ ଭେଟିବା ସହ ଦାବିପତ୍ର ମଧ୍ୟ ଦେଇଥିଲେ। ମାତ୍ର କୌଣସି ପ୍ରକାର କାର୍ଯ୍ୟାନୁଷ୍ଠାନ ଗ୍ରହଣ ନହେବାରୁ ସେ ଅନିର୍ଦ୍ଦିଷ୍ଟ କାଳ ପାଇଁ ପୁରୁଣା ଡାକ୍ତରଖାନା କୋଠା ସମ୍ମୁଖରେ ଅନଶନରେ ବସିଛନ୍ତି। ରବିବାର ଏହି ଅନଶନ ୨୭ ଦିନରେ ପହଞ୍ଚିଥିବା ବେଳେ ଏହି ସମସ୍ୟାର କୌଣସି ପ୍ରକାର ସମାଧାନ ହୋଇପାରିନାହିଁ। ଜିଲ୍ଲା ପ୍ରଶାସନଠୁ ନେଇ ଉଚ୍ଚସ୍ତରୀୟ ଅଧିକାରୀ ଏ ପର୍ଯ୍ୟନ୍ତ ନିରବଦ୍ରଷ୍ଟା ସାଜିଛନ୍ତି।