ନୂଆଦିଲ୍ଲୀ ୧୫/୦୪: ଏପ୍ରିଲ୍ ୧୪ । ୧୧୩ ବର୍ଷ ତଳର ଇତିହାସ । ସେଦିନ ଘଟଣା ମନେ ପଡିଲେ ଆଜି ବି ଟାଙ୍କୁରି ଉଠେ ଲୋମମୂଳ । ବଢିଯାଏ ହୃଦ୍ସ୍ପନ୍ଦନ । କାରଣ କଳା ମଟମଚ ପ୍ରଶାନ୍ତ ମହାସାଗରର ମଚମଚ ପାଣିରେ ବୁଡ଼ିଯାଇଥିଲା ବିଶ୍ୱର ସବୁଠୁ ବଡ଼ ଜାହାଜ ଟାଇଟନିକ୍ । ହେଲେ କାହିଁକି ବୁଡିଲା ଏପରି ବିରାଟକାୟ ଜାହାଜ? ଘଟଣାର ପ୍ରକୃତ କାରଣ କଣ ସେନେଇ ଆଜି ବି ଚର୍ଚ୍ଚା ଚାଲେ । କେହି କେହି ପ୍ରତିକୂଳ ପରିସ୍ଥିତିକୁ ଦୋଷ ଦିଅନ୍ତି ତ ଆଉ କେହି କେହି କ୍ୟାପଟେନ୍ଙ୍କ ଭୁଲ୍କୁ ଦାୟୀ କରନ୍ତି । କାରଣ ରାତିରେ ଶୋଇଥିବା ବେଳେ ଚିରନିଦ୍ରାରେ ଶୋଇ ପଡ଼ିଥିଲେ ୧୫ ଶହରୁ ଅଧିକ ଲୋକ । ଆସନ୍ତୁ ଜାଣିବା ପୁରା ଘଟଣା ।
୧୯୧୨ ମସି, ୧୦ ଏପ୍ରିଲ । ଇଂଲଣ୍ଡର ସାଉଥହାଂପଟନରୁ ନ୍ୟୁୟର୍କ ଅଭିମୁଖେ ଯାତ୍ରା କରିଥିଲା ଟାଇଟନିକ୍ । ସେଦିନ ବି ସମୁଦ୍ର ଅନ୍ୟଦିନ ଅପେକ୍ଷା ବେଶ୍ ଶାନ୍ତ ଥିଲା । ସତେ ଯେମିତି କିଛି ଝଡ ପୂର୍ବର ନୀରବତା ଥିଲା । ତେଣୁ ଫୁଲ ସ୍ପିଡରେ ଲକ୍ଷ୍ୟସ୍ଥଳରୁ ବଢୁଥିଲା ଟାଇଟନିକ୍ । ହେଲେ ଆଟଲାଣ୍ଟିକ ମହାସାଗରରେ ବିରାଟକାୟ ବରଫ ପାହାଡ ବା ଆଇସବର୍ଗର ଉପସ୍ଥିତି ନେଇ ଟାଇଟନିକର କର୍ମଚାରୀଙ୍କୁ ଅବଗତ କରାଯାଇଥିଲା । ହେଲେ କ୍ୟାପଟେନ୍ ସ୍ମିଥ୍ ଏହାକୁ ଅଣଦେଖା କରିଦେଇଥିଲେ । ପୂରା ଦମ୍ରେ ଆଗକୁ ବଢୁଥିଲା ଜାହଜ । ରାତି ଠିକ୍ ୧୧.୪୦ ମିନିଟ୍ରେ ଜାହଜ ସାମ୍ନାରେ ବିରାଟ ବରଫ ଖଣ୍ଡ ଦେଖିବାକୁ ମିଳିଥିଲା । ସଙ୍ଗେ ସଙ୍ଗେ ଜାହଜର ଗତିପଥ ବଦଳାଇବାକୁ ନିଷ୍ପତ୍ତି ନିଆଯାଇଥିଲା କିନ୍ତୁ ସବୁ ସରିଯାଇଥିଲା ସେତେବେଳକୁ ।
ବରଫ ସହ ଧକ୍କା ଖାଇବା ପରେ କ୍ଷତିଗ୍ରସ୍ତ ହୋଇଥିଲା ଜାହାଜ । ଖାଲି କ୍ଷତିଗ୍ରସ୍ତ ହୋଇଥିଲା ତାହା ନୁହେଁ ବରଂ ସବୁ କିଛି ଆଖି ଆଗରେ ମାଟିରେ ମିଶିବାକୁ ଅପେକ୍ଷା ରତ ଥିଲା । ସମୟ ବଢୁଥିଲା, ଜାହାଜର ଗୋଟିଏ ପରେ ଗୋଟିଏ ଭାଗରେ ପାଣି ପଶୁଥିଲା । ଜୀବନ ବଞ୍ଚାଇବାକୁ ଆକୁଳ ନିବେଦନ କରୁଥିଲେ ଯାତ୍ରୀ । ଅନ୍ଧାର ରାତିରେ ପୁଣି ମଝି ସମୁଦ୍ରରେ କିଏ ବା କୁଆଡ଼େ ଯିବ । ଅନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ଜାହଜ ବୁଡ଼ିବ ନାହିଁ ବିଶ୍ବାସ ଥିବାରୁ ସେତେ ପରିମାଣରେ ବୋଟ୍ କି ଲାଇଫ୍ ଜ୍ୟାକେଟ୍ ବି ନଥିଲା । ତେଣୁ ଯାତ୍ରୀମାନେ ଅଧିକ ସଂଖ୍ୟାରେ ପ୍ରାଣ ହରାଇଥିଲେ । ଅବଶ୍ୟ ୱୟାରଲେସ୍ରେ ଖବର ମିଳିବା ପରେ ଅନ୍ୟ ଜାହାଜ ସାହାଯ୍ୟ ପାଇଁ ପହଞ୍ଚିଥିଲେ । କିନ୍ତୁ ସେତେବେଳକୁ ସବୁ ସରିଯାଇଥିଲା ।
ଜାହାଜ ଦୁର୍ଘଟଣାକୁ ନେଇ ଫିଲ୍ମ ବି ତିଆରି ହେଲା । ହେଲେ ସେ ଦିନ ପ୍ରକୃତ ଘଟଣା କଣ ଘଟିଥିଲା ସେନେଇ ଆଜି ବି ଚର୍ଚ୍ଚା ଚାଲେ । କିନ୍ତୁ ଜାହଜ ବୁଡ଼ିବା ଘଟଣାକୁ ଆଜି ବି କେହି ଭୁଲିନାହାନ୍ତି କି କାଲି ବି କେହି ଭୁଲିବେ ନାହିଁ । ସେହି ସମୟରେ ବିଶ୍ୱର ସବୁଠୁ ବିଳାସପୂର୍ଣ୍ଣ କ୍ରୁଜ୍ ଥିଲା ସିପ୍ ଟାଇଟନିକ୍ । ଯେକୌଣସି ପ୍ରତିକୂଳ ପରିସ୍ଥିତିରେ ବି ଜାହାଜ ବୁଡିବ ନାହିଁ । ସେଇ ଢାଞ୍ଚାରେ ତିଆରି ହୋଇଥିଲା ଏହି ଲଗ୍ଜୁରୀ ଜାହଜ । ଜାହଜରେ ଯାତ୍ରା କରୁଥିଲେ ୨୨୨୪ ଜଣ ଯାତ୍ରୀ । ପ୍ରାୟତଃ ସମସ୍ତେ ଥିଲେ ଉଚ୍ଚ ଓ ସଂଭ୍ରାନ୍ତ ଶ୍ରେଣୀ ପରିବାରର ।
ବ୍ରିଟିଶ କମ୍ପାନି ହର୍ଲାଣ୍ଡ ଆଣ୍ଡ ଉଲ୍ଫ । ଟାଇଟନିକର ନିର୍ମାଣ କରିବା ବେଳେ ହ୍ୱାଇଟ ଷ୍ଟାର ଲାଇନ କମ୍ପାନି ଏହାର ପରିଚାଳନା ଦାୟିତ୍ୱରେ ଥିଲା । ୩ ବର୍ଷ ଧରି ୩ ହଜାର ଶ୍ରମିକଙ୍କ ଅକ୍ଲାନ୍ତ ପରିଶ୍ରମରେ ତିଆରି ହୋଇଥିଲା ଟାଇଟନିକ । ଜାହଜର ନିର୍ମାଣରେ ୪୮ କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ ସମସ୍ତ ଅତ୍ୟାଧୁନିକ ବ୍ୟବସ୍ଥା ମହଜୁଦ ଥିଲା ।
ସେହି ବର୍ଷ ସି-ଟ୍ରାଏଲ୍ ପରେ ସମାନବର୍ଷ ଏପ୍ରିଲ ୨ରେ ସମୁଦ୍ରରେ ଯାତ୍ରା କରିବାକୁ ଟାଇଟନିକ୍କୁ ମିଳିଥିଲା ଗ୍ରୀନ ସିଗ୍ନାଲ । ଯାତ୍ରୀଙ୍କ ଲାଗି ଜାହଜରେ A,B ଓ C ଭଳି ବିଭିନ୍ନ ଶ୍ରେଣୀର କକ୍ଷ ଥିଲା । ଜାଣି ଆଶ୍ଚର୍ଯ୍ୟ ହେବେ କି ପ୍ରଥମ ଶ୍ରେଣୀରେ ଯାତ୍ରା କରିବାକୁ ସେହି ସମୟରେ ୨ ଲକ୍ଷ ୭୦ ହଜାର, ଦ୍ୱିତୀୟ ଶ୍ରେଣୀରେ ଯାତ୍ରା କରୁଥିବା ଯାତ୍ରୀଙ୍କୁ ଦେବକୁ ପଡିଥିଲା ପ୍ରାୟ ଲକ୍ଷେ ଟଙ୍କା । ଯାହା ମହଙ୍ଗା କହିଲେ ଅତ୍ୟୁକ୍ତି ହେବ ନାହିଁ ।
