ନୂଆଦିଲ୍ଲୀ: ଅଶାନ୍ତ ହୋଇପାରେ ନୁହ। ଜିଲ୍ଲାରେ ଇଣ୍ଟରନେଟ୍ ଏବଂ SMS ସେବାକୁ ବନ୍ଦ କରିବାକୁ ହରିୟାଣା ସରକାରଙ୍କ ନିର୍ଦ୍ଦେଶ। ବ୍ରଜ ମଣ୍ଡଳ ଜଳାଭିଷେକ ଯାତ୍ରା ସମୟରେ କୌଣସି ପ୍ରକାରର ବିଶୃଙ୍ଖଳାକୁ ରୋକିବା ପାଇଁ ଏହି ପଦକ୍ଷେପ ନିଆଯାଇଛି। ଦୁଇ ବର୍ଷ ପୂର୍ବେ, ଏହି ଯାତ୍ରା ସମୟରେ, ଏହି ଅଞ୍ଚଳରେ ସାମ୍ପ୍ରଦାୟିକ ହିଂସା ଘଟିଥିଲା। ଯେଉଁଥିରେ ଦୁଇ ଜଣଙ୍କର ମୃତ୍ୟୁ ହୋଇଥିଲା ଏବଂ ଅନେକ ପୋଲିସ ଆହତ ହୋଇଥିଲେ।
ରାଜ୍ୟ ଗୃହ ବିଭାଗ ଦ୍ୱାରା ଜାରି କରାଯାଇଥିବା ଆଦେଶରେ କୁହାଯାଇଛି ଯେ ସମସ୍ତ ସୋସିଆଲ ମିଡିଆ ପ୍ଲାଟଫର୍ମ ଯେପରିକି ହ୍ୱାଟସଆପ, ଫେସବୁକ, ଟ୍ୱିଟର ଏବଂ ମୋବାଇଲ ଫୋନରେ ଏସଏମଏସ ସେବା ମଧ୍ୟ ଅସ୍ଥାୟୀ ଭାବରେ ବନ୍ଦ ରହିବ। ଏହି ସମୟ ମଧ୍ୟରେ, ବ୍ୟାଙ୍କିଙ୍ଗ ଏବଂ ମୋବାଇଲ୍ ରିଚାର୍ଜ ସୁବିଧା ଜାରି ରହିବ। ଏହି ନିଷେଧ ସୋମବାର ରାତି ୯ଟା ପର୍ଯ୍ୟନ୍ତ ବଳବତ୍ତର ରହିବ। ଏହା ଗୁଜବ ଏବଂ ଭ୍ରାମକ ସୂଚନା ପ୍ରସାରଣକୁ ରୋକିପାରିବ।
ସୋମବାର ଜିଲ୍ଲାର ସମସ୍ତ ସରକାରୀ ଏବଂ ବେସରକାରୀ ସ୍କୁଲ ବନ୍ଦ ରଖିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି। ପୋଲିସ ସୂଚନା ଦେଇଛି ଯେ ଏହି ଅଞ୍ଚଳରେ ପ୍ରାୟ 2,500 ଫୋର୍ସ ମୁତୟନ କରାଯିବ। ନୁହ ଜିଲ୍ଲାର ଅନେକ ସମ୍ବେଦନଶୀଳ ଅଞ୍ଚଳରେ କଡ଼ା ନଜର ରଖାଯାଇଛି ଏବଂ ସୋସିଆଲ ମିଡିଆ ଉପରେ ନଜର ରଖିବା ପାଇଁ ସ୍ୱତନ୍ତ୍ର ଦଳ ନିୟୋଜିତ କରାଯାଇଛି।
ନୁହ ପୋଲିସ ସ୍ପଷ୍ଟ କରିଛି ଯେ ଲୋକମାନେ କୌଣସି ପ୍ରକାରର ଗୁଜବରେ ଧ୍ୟାନ ଦିଅନ୍ତୁ ନାହିଁ ଏବଂ ଯେଉଁମାନେ ମିଥ୍ୟା ସୂଚନା ପ୍ରସାର କରିବାକୁ ଚେଷ୍ଟା କରିବେ ସେମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ। ବିଶେଷକରି ସୋସିଆଲ ମିଡିଆ ମାଧ୍ୟମରେ ପରିବେଶ ବିଗାଡ଼ିବାର ପ୍ରୟାସ ଉପରେ ନଜର ରଖିବା ପାଇଁ ପୋଲିସ ଏକ ଦଳ ଗଠନ କରିଛି।
ଏଗୁଡ଼ିକ ବ୍ୟତୀତ, ଯାତ୍ରା ରାସ୍ତାରେ ମାଂସ ବିକ୍ରୟ ଉପରେ ନିଷେଧ କରିଛି ସ୍ଥାନୀୟ ପ୍ରଶାସନ। ତୀର୍ଥଯାତ୍ରା ରାସ୍ତାରେ ଥିବା ସମସ୍ତ ମାଂସ ଦୋକାନକୁ ୨୪ ଜୁଲାଇ ପର୍ଯ୍ୟନ୍ତ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି। ସକାଳ ୬ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ପେଟ୍ରୋଲ ପମ୍ପଗୁଡ଼ିକରେ ଖୋଲା ପେଟ୍ରୋଲ କିମ୍ବା ଡିଜେଲ ବିକ୍ରି କରିବା ଉପରେ ମଧ୍ୟ ନିଷେଧ ରହିବ।
