ଭୁବନେଶ୍ୱର ୧୨।୦୪ : ଫ୍ରାଇଡେରେ ରିଲିଜ୍ ହୋଇଛି ୩ ଓଡ଼ିଆ ଚଳଚ୍ଚିତ୍ର । ଅଫ୍ ସିଜିନରେ ବି ପରଦାକୁ ଆସିଲା ୩ ଟି ୟୁନିକ ଓଡ଼ିଆ କାହାଣୀ। ଅଭିନେତ୍ରୀ ଶୀତଲଙ୍କ ଆଜିର ରେବତୀ, ଅର୍ଚ୍ଚିତାଙ୍କ ପାଦେ ଆକାଶ ଏବଂ ପପୁ ପମପମଙ୍କ ଡଷ୍ଟବିନ। ମୌଳିକ ତଥା ନିଛକ କାହାଣୀ ସହ କଳାକାର ମାନେ ଦମଦାର ଅଭିନୟ କରିଥିବା ବେଳେ ଲୋକଙ୍କ ଖଚାଖଚ ଗହଳି ଭୁବନେଶ୍ବରର ବିଭିନ୍ନ ସିନେମା ହଲରେ ଦେଖିବାକୁ ମିଳିଛି ।
ପ୍ରେକ୍ଷାଳୟରେ ରିଲିଜ ହେଲା "ଆଜିର ରେବତୀ" । ଓଡ଼ିଆ ପରମ୍ପରା ଓ ସମାଜଚେତନା ଭିତ୍ତିକ ଓଡ଼ିଆ ସିନେମା "ଆଜିର ରେବତୀ" ୧୧ରେ ମୁକ୍ତିଲାଭ କରିଛି। ଗାଳ୍ପିକ ତଥା ଗୀତିକାର ଡ଼. ବଦ୍ରି ମିଶ୍ର ଦୀର୍ଘ ୨୫ ବର୍ଷ ପୂର୍ବେ ସୃଷ୍ଟି କରିଥିବା କ୍ଷୁଦ୍ର ଗଳ୍ପ ରେବତୀର କାହାଣୀ ଏବେ ଓଡ଼ିଆ ଚଳଚ୍ଚିତ୍ରରେ ଭିନ୍ନ ଢଙ୍ଗରେ ସଜାଯାଇଛି । ସଂଳାପକାର ଶ୍ୟାମା ପ୍ରସାଦ ମିଶ୍ର "ଆଜିର ରେବତୀ" ସିନେମାର ସଂଳାପ ରଚନା କରି ସମସ୍ତଙ୍କ ଦୃଷ୍ଟି ଆକର୍ଷଣ କରିପାରିଛନ୍ତି l ହେଲେ ଏହି ରେବତୀ ଫିଲ୍ମ ଫକିର ମୋହନଙ୍କ ରେବତୀ ନୁହଁ, ନୂତନ ଯୁଗର ରେବତୀ। ଏପର୍ଯ୍ୟନ୍ତ ୨୫ଟି ସିନେମାର ପ୍ରଯୋଜନା କରିଥିବା ଯୁବ ପ୍ରଯୋଜକ ରମେଶ ବାରିକ ଆଜିର ରେବତୀ ସିନେମାର ପ୍ରଯୋଜନା କରିଛନ୍ତି l ଏହି ସିନେମାକୁ ନିର୍ଦ୍ଦେଶନା ଦେଇଛନ୍ତି ଶୁଭ୍ରାଂଶୁ ଦାସ l ଭାଙ୍ଗିଯାଉଥିବା ସମାଜକୁ ଗଢି ତୋଳିବା, ଉଜୁଡି ଯାଉଥିବା ସଂସାରକୁ ସଜାଡି ଦେବା ସହିତ ନାରୀ ଶିକ୍ଷାକୁ ନେଇ ଓଡ଼ିଆ ସିନେମା "ଆଜିର ରେବତୀ" ଓଡ଼ିଆ ଚଳଚ୍ଚିତ୍ର ଇଣ୍ଡଷ୍ଟ୍ରି ପାଇଁ ଏକ ଆନ୍ଦୋଳନ ଓ ବିପ୍ଳବ ସୃଷ୍ଟି କରିବ ବୋଲି ଆଶା କରାଯାଇଛି। ଦର୍ଶକ ମଧ୍ୟ ଫିଲ୍ମକୁ ଢେର୍ ପ୍ରସଂଶା କରିଛନ୍ତି ।
ସେହିପରି ବଡ ପରଦାରେ ରିଲିଜ୍ ହୋଇଛି ପାଦେ ଆକାଶ । ପ୍ରଖ୍ୟାତ ସମାଜସେବୀ ଡକ୍ଟର ଶୃତି ମହାପାତ୍ରଙ୍କ ସଂଘର୍ଷମୟ ଜୀବନ ଉପରେ ଆଧାରିତ 'ପାଦେ ଆକାଶ' ରିଲିଜ୍ ହୋଇଯାଇଛି। ଚଳଚ୍ଚିତ୍ରରେ ଅଭିନେତ୍ରୀ ଅର୍ଚ୍ଚିତା ଖୁବ୍ ସୁନ୍ଦର ଭାବେ ଅଭିନୟ କରିଥିବା ବେଳେ ପ୍ରଥମ ଦିନରେ ହାଉସଫୁଲ ହୋଇଥିଲା । ପ୍ରିମିୟରରେ ଡ. ସୃତି ମହାପାତ୍ରଙ୍କ ସମେତ ଅଭିନେତ୍ରୀ ଅର୍ଚ୍ଚିତା, ଅଭିନେତା ସବ୍ୟସାଚୀ ମିଶ୍ର ଓ ଅନ୍ୟ ସମସ୍ତ କଳାକାରମାନେ ଉପସ୍ଥିତ ଥିଲେ। ଅନ୍ୟପଟେ ଅଭିନେତା ପପୁ ପମ ପମଙ୍କ ନିର୍ଦ୍ଦେଶିତ ଡଷ୍ଟ ବିନ୍ ଚଳଚ୍ଚିତ୍ର ବେଶ୍ କ୍ରେଜ ସୃଷ୍ଟି କରିଥିଲା । ସସ୍ପେନ୍ସ ଥ୍ରିଲର ଓ ମର୍ଡର ମିଷ୍ଟ୍ରି ‘ଡଷ୍ଟବିନ୍’ର ପ୍ରିମିୟର ସୋ ଲାଗିଥିଲା। ଏଥିରେ କାହାଣୀ, ଚିତ୍ରନାଟ୍ୟ ଓ ସଙ୍ଗୀତ ନିର୍ଦ୍ଦେଶନା ଦେଇଥିବା ପପୁ ପମ୍ ପମ୍, ନାୟିକା ପ୍ରାଚୀ ଓ ଅନ୍ୟ କଳାକାରମାନେ ଏକାଠି ହୋଇଥିଲେ।
ଶ୍ରୀୟା, ସ୍ତୁତି ଓ ସ୍ବାତୀରେ ସତେ ଯେମିତି ଓଡ଼ିଆ ଚଳଚ୍ଚିତ୍ରର ମେଳା ଲାଗିଥିଲା । ଏହି ୩ଟି ଫିଲ୍ମକୁ ପ୍ରୋତ୍ସାହନ ଦେବା ପାଇଁ ଓଡ଼ିଆ ସିନେମା ଜଗତର ଅଧିକାଂଶ କଳାକାର ଏକାଠି ହୋଇଥିଲେ।
