ଟ୍ରମ୍ପଙ୍କ ସହ ଆଲୋଚନା କଲେ ପ୍ରଧାନମନ୍ତ୍ରୀ ମୋଦୀ, ଫୋକସରେ ବାଣିଜ୍ୟ ଓ ପ୍ରତିରକ୍ଷା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଫୋନ୍ ଯୋଗେ ଆଲୋଚନା କରିଛନ୍ତି । ଭାରତ-ଆମେରିକା ରଣନୈତିକ ସହଭାଗୀତାର ପ୍ରଗତି ବିଷୟରେ ବିସ୍ତୃତ ଆଲୋଚନା କରିଛନ୍ତି । ଉଭୟ ନେତା ଦୁଇ ପ୍ରମୁଖ ଗଣତନ୍ତ୍ର ମଧ୍ୟରେ ଦ୍ରୁତ ଗତିରେ ସୁଦୃଢ଼ ହେଉଥିବା ସମ୍ପର୍କ ଏବଂ ବିଶ୍ୱ ରାଜନୀତିରେ ଏହାର ଭୂମିକାକୁ ସ୍ୱୀକାର କରିଛନ୍ତି । ଆଲୋଚନାରେ ପ୍ରତିରକ୍ଷା, ଶକ୍ତି, ସୁରକ୍ଷା ଏବଂ ବାଣିଜ୍ୟ ଭଳି କ୍ଷେତ୍ରରେ ସହଯୋଗକୁ ଦୃଢ଼ କରିବା ଉପରେ ଗୁରୁତ୍ବାରୋପ କରାଯାଇଛି । ମୋଦି ଏବଂ ଟ୍ରମ୍ପ ଭାରତ-ଆମେରିକା ବ୍ୟାପକ ବିଶ୍ୱ ରଣନୈତିକ ସହଭାଗୀତା ସମୀକ୍ଷା କରିଛନ୍ତି ଏବଂ ଦ୍ୱିପାକ୍ଷିକ ସହଯୋଗର ନିରନ୍ତର ଶକ୍ତି ଉପରେ କଥା ହୋଇଛନ୍ତି ।

ବାଣିଜ୍ୟ ବିସ୍ତାର ପାଇଁ ଗତି ବଜାୟ ରଖିବା ଉପରେ ଉଭୟ ନେତା ଗୁରୁତ୍ୱାରୋପ କରିଛନ୍ତି । ନୂତନ ପ୍ରଯୁକ୍ତିବିଦ୍ୟା, ପ୍ରତିରକ୍ଷା ଏବଂ ସୁରକ୍ଷା କ୍ଷେତ୍ରରେ ଦୁଇ ଦେଶ ମଧ୍ୟରେ ସହଯୋଗ ବୃଦ୍ଧିର ଆବଶ୍ୟକତାକୁ ମଧ୍ୟ ସେମାନେ ପ୍ରାଥମିତା ଦେବା ଉପରେ କଥା ହୋଇଛନ୍ତି । ଆଲୋଚନା ସମୟରେ, ଦୁଇ ନେତା କମ୍ପାକ୍ଟ କାର୍ଯ୍ୟକ୍ରମ ବିଷୟରେ ମଧ୍ୟ ଆଲୋଚନା କରିଛନ୍ତି ।

ଦୁଇ ନେତା ଆଞ୍ଚଳିକ ଏବଂ ବିଶ୍ୱ ପରିସ୍ଥିତି ଉପରେ ମଧ୍ୟ ମତାମତ ଆଦାନପ୍ରଦାନ କରିଛନ୍ତି। ଆଲୋଚନାରେ ବିଶ୍ୱ ସୁରକ୍ଷା, ଆର୍ଥିକ ସ୍ଥିରତା ଏବଂ ସହଯୋଗୀ ଢାଞ୍ଚାକୁ ଆଗକୁ ବଢ଼ାଇବା ଉପରେ ଗୁରୁତ୍ୱାରୋପ କରାଯାଇଛି । ଏକାଠି କାମ କରିବା ଦ୍ୱାରା ଅନେକ ପ୍ରସଙ୍ଗର ପ୍ରଭାବଶାଳୀ ସମାଧାନ ହୋଇପାରିବ। ମୋଦି ଏବଂ ଟ୍ରମ୍ପ ସମାନ ଚ୍ୟାଲେଞ୍ଜର ମୁକାବିଲା ପାଇଁ ସମନ୍ୱୟ ବୃଦ୍ଧି କରିବାକୁ ସହମତ ହୋଇଛନ୍ତି । ସମ୍ପର୍କକୁ ଆହୁରି ମଜଭୁତ କରିବାକୁ ଦୁଇ ନେତା ପ୍ରାଥମିକତା ଦେଇଛନ୍ତି । ଭାରତ ଏବଂ ଆମେରିକା ମଧ୍ୟରେ ଏକ ଦୃଢ଼ ଏବଂ ବିଶ୍ୱାସଯୋଗ୍ୟ ସମ୍ପର୍କ ରହିଛି ।

ଦୁଇ ନେତା ଯୋଗାଯୋଗ ବଜାୟ ରଖିବା ଏବଂ ନିୟମିତ ଆଲୋଚନା ଜାରି ରଖିବାକୁ ଉପରେ ନିଷ୍ପତ୍ତି ନେଇଛନ୍ତି । ସେମାନଙ୍କ ଅନୁସାରେ, ନିରନ୍ତର ଆଲୋଚନା ଦ୍ୱିପାକ୍ଷିକ ସମ୍ପର୍କକୁ ଆହୁରି ଉନ୍ନତ କରିବ ଏବଂ ଉଭୟ ଦେଶର ସମାନ ସ୍ୱାର୍ଥକୁ ମଜଭୁତ କରିବ।

Had a very warm and engaging conversation with President Trump. We reviewed the progress in our bilateral relations and discussed regional and international developments. India and the U.S. will continue to work together for global peace, stability and prosperity.…

— Narendra Modi (@narendramodi) December 11, 2025

ଟ୍ରମ୍ପଙ୍କ ସହ କଥା ହେବା ପରେ ପ୍ରଧାନମନ୍ତ୍ରୀ ମୋଦୀ ଟ୍ବିଟ୍ କରିଛନ୍ତି । ସେ ଲେଖିଛନ୍ତି,‘ରାଷ୍ଟ୍ରପତି ଟ୍ରମ୍ପଙ୍କ ସହ ସକାରାତ୍ମକ ଆଲୋଚନା ହୋଇଛି । ଆମେ ଆମର ଦ୍ୱିପାକ୍ଷିକ ସମ୍ପର୍କରେ ଅଗ୍ରଗତି ସମୀକ୍ଷା କରିଛୁ । ଆଞ୍ଚଳିକ ଓ ଆନ୍ତର୍ଜାତୀୟ ବିକାଶ ବିଷୟରେ ଆଲୋଚନା କରିଛୁ। ଭାରତ ଏବଂ ଆମେରିକା ବିଶ୍ୱ ଶାନ୍ତି, ସ୍ଥିରତା ଏବଂ ସମୃଦ୍ଧି ପାଇଁ ଏକାଠି କାମ କରିବା ଜାରି ରଖିବେ।’