ମୁମ୍ଵାଇ ୧୮।୦୪: ଛାଡ଼ପତ୍ର ସଂପର୍କିତ ଆଇନଗତ ପ୍ରକ୍ରିୟା ସାରା ବିଶ୍ୱରେ ଅଲଗା ଅଲଗା ହୋଇଥାଏ । କିଛି ଦେଶରେ ସହଜରେ ଛାଡ଼ପତ୍ର ମିଳିଯାଉଥିବାବେଳେ ଭାରତ ସମେତ କିଛି ଦେଶରେ ଏଥିଲାଗି ଦୀର୍ଘ ଦିନ ସମୟ ଲାଗିଥାଏ । ତେବେ ନିକଟରେ ବ୍ରିଟେନ୍ରୁ ଏକ ଅଜବ ମାମଲା ସାମ୍ନାକୁ ଆସିଛି । ସେଠାରେ ଏକ କୋର୍ଟ ଭୁଲ୍ରେ ଜଣେ ଦମ୍ପତିଙ୍କ ଛାଡ଼ପତ୍ରକୁ ଅନୁମୋଦନ କରିଛନ୍ତି ।
ମିଷ୍ଟର ଆଣ୍ଡ ମିସେସ୍ ୱିଲିୟମ୍ସ ନାମରେ ପରିଚିତ ଦମ୍ପତିଙ୍କ ବିବାହକୁ ୨୧ ବର୍ଷ ହୋଇସାରିଥିଲା । ଦୁହେଁ ଛାଡ଼ପତ୍ର ନେବାକୁ ଚାହୁଁଥିଲେ । କିନ୍ତୁ ତା’ ପୂର୍ବରୁ ଆର୍ଥିକ ବ୍ୟାପାର ନେଇ ସେମାନଙ୍କ ମଧ୍ୟରେ ବୁଝାମଣା ଚାଲିଥିଲା । ଇତିମଧ୍ୟରେ ମିସେସ୍ ୱିଲିୟମ୍ସଙ୍କ ପ୍ରତିନିଧିତ୍ୱ କରୁଥିବା ଲଣ୍ଡନର ଏକ ନାମୀଦାମୀ ଲ’ ଫାର୍ମ ବରଦାଗ୍ ପକ୍ଷରୁ ଭୁଲ୍ରେ ଏହି ଦମ୍ପତିଙ୍କ ଲାଗି ଚୂଡ଼ାନ୍ତ ଛାଡ଼ପତ୍ର ରାୟ ଦେବାକୁ ଏକ ପରିବାର କୋର୍ଟରେ ଆବେଦନ କରାଗଲା । କମ୍ପାନି ପକ୍ଷରୁ ଅନ୍ୟ ଜଣେ ଗ୍ରାହକଙ୍କ ଚୂଡ଼ାନ୍ତ ଛାଡ଼ପତ୍ର ଲାଗି ଆବେଦନ କରିବାକୁ ଥିବାବେଳେ ଅନଲାଇନ୍ ପୋର୍ଟାଲରେ ସେଠାକାର ଜଣେ କ୍ଲର୍କ ଭୁଲ୍ରେ ଏହି ଦମ୍ପତିଙ୍କ ନାମକୁ ଉଲ୍ଲେଖ କରିଥିଲେ ।
ଏହାପରେ ମାତ୍ର ୨୧ ମିନିଟ୍ ମଧ୍ୟରେ ୱିଲିୟମ୍ସ ଦମ୍ପତିଙ୍କ ଛାଡ଼ପତ୍ରକୁ ପରିବାର କୋର୍ଟରୁ ମଞ୍ଜୁରି ମିଳିଗଲା । ୨ ଦିନ ପରେ ଏ ସଂପର୍କରେ ଜଣାପଡି଼ବାରୁ ତାକୁ ରଦ୍ଦ କରିବାକୁ ପରିବାର କୋର୍ଟଙ୍କ ଦ୍ୱାରସ୍ଥ ହେଲା ଲ’ ଫାର୍ମ । ସେଥିରେ ଜଣେ କ୍ଲର୍କଙ୍କ ଭୁଲ୍ର ଦଣ୍ଡ କାହିଁକି ଦମ୍ପତି ଭୋଗିବେ ବୋଲି ଯୁକ୍ତି ଦର୍ଶାଯାଇଥିଲା । ଏଥିସହ ଦମ୍ପତି ଛାଡ଼ପତ୍ର ଲାଗି ମାନସିକ ଭାବେ ପ୍ରସ୍ତୁତ ନ ଥିବା ବି କୁହାଯାଇଥିଲା । ତେବେ ବିଚାରପତି ରାୟକୁ ପରିବର୍ତ୍ତନ କରିବାକୁ ମନା କରିଛନ୍ତି । କୋର୍ଟଙ୍କ ରାୟ ଉପରେ ଜନତାଙ୍କର ବିଶ୍ୱାସ ଅତୁଟ ରହିବା ଅଧିକ ଜରୁରି ବୋଲି ବିଚାରପତି କହିଛନ୍ତି ।
