ନୂଆଦିଲ୍ଲୀ:ପାକିସ୍ତାନକୁ ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଚେତାବାନୀ। ଆମ ଧୈର୍ଯ୍ୟର ପରୀକ୍ଷା କରନି। ନହେଲେ ଭାରତ କ୍ୱାଲିଟି ଜବାବ ଦେବ। ଗୁରୁବାର ପାକିସ୍ତାନକୁ ଏଭଳି ଧମକ ଦେଇଛନ୍ତି ପ୍ରତିରକ୍ଷା ମନ୍ତ୍ରୀ। ସେ କହିଛନ୍ତି ଯେ ଆମକୁ ଉସୁକାଇଲେ ଭାରତ "କ୍ୱାଲିଟି ଜବାବ" ଦେବାକୁ ସମ୍ପୂର୍ଣ୍ଣ ପ୍ରସ୍ତୁତ। ଦିଲ୍ଲୀରେ ନ୍ୟାସ୍ଲନାଲ କ୍ୱାଲିଟି କନକ୍ଲେଭ୍କୁ ସମ୍ବୋଧିତ କରି ଏପରି କହିଛନ୍ତି ରାଜନାଥ ସିଂହ।
ଅପରେସନ ସିନ୍ଦୂରରେ ପାଗଳ ହୋଇଯାଇଛି ପାକିସ୍ତାନ। ଏହାର ଜବାବରେ ପାକିସ୍ତାନ ଭାରତରେ ୧୫ ସାମରିକ ଲକ୍ଷ୍ୟସ୍ଥଳ ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା। ହେଲେ ଭାରତର ଏୟାର ଡିଫେନ୍ସ ସିଷ୍ଟମ ଏହାକୁ ନିଷ୍ଟ କରିଦେଇଛି। ଜବାବରେ, ଭାରତ ଗୁରୁବାର ପାକିସ୍ତାନର ଅନେକ ସ୍ଥାନରେ ବାୟୁ ପ୍ରତିରକ୍ଷା ରାଡାରକୁ ଟାର୍ଗେଟ କରିଛି। ଏଥିରେ ଲାହୋରରେ ସିଷ୍ଟମକୁ ନଷ୍ଟ କରି ଦିଆଯାଇଛି।
ପଢନ୍ତୁ- ପିଏସ୍ଏଲ୍ ମ୍ୟାଚ୍ ପୂର୍ବରୁ ଡ୍ରୋନ୍ ମାଡ଼ରେ ଥରିଲା ପାକିସ୍ତାନର ରାୱଲପିଣ୍ଡି କ୍ରିକେଟ ଷ୍ଟାଡିୟମ
ଏନେଇ ରାଜନାଥ ସିଂହ କହିଛନ୍ତି “ଆମେ ସର୍ବଦା ଏକ ଦାୟିତ୍ୱବାନ ରାଷ୍ଟ୍ର ପରି ବହୁତ ସଂଯମତାର ସହିତ କାର୍ଯ୍ୟ କରିଆସିଛୁ। ଆମେ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାରେ ବିଶ୍ୱାସ କରୁ। କିନ୍ତୁ ଏହାର ଅର୍ଥ ନୁହେଁ ଯେ କେହି ଆମର ଧର୍ଯ୍ୟର ଅପବ୍ୟବହାର କରିବେ। ଯଦି କେହି ଏହାର ଅଯଥା ଫାଇଦା ନେବାକୁ ଚେଷ୍ଟା କରନ୍ତି, ତେବେ ସେମାନଙ୍କୁ ଗତକାଲିର(ଅପରେସନ୍ ସିନ୍ଦୂରକୁ ଉଲ୍ଲେଖ କରି) ପରି ' କ୍ୱାଲିଟି ଜବାବର'ର ସମ୍ମୁଖୀନ ହେବାକୁ ପ୍ରସ୍ତୁତ ରହିବାକୁ ପଡିବ।”
ପ୍ରତିରକ୍ଷା ମନ୍ତ୍ରୀ ଭାରତୀୟ ସଶସ୍ତ୍ର ବାହିନୀ ଦ୍ୱାରା ପାକିସ୍ତାନ ଏବଂ ପାକ ଅଧିକୃତ କାଶ୍ମୀରରେ ହୋଇଥିବା ଅପରେସନ ସିନ୍ଦୂର ବିଷୟରେ ସୂଚନା ଦେଇଥିଲେ। ଯେଉଁଥିରେ ବହୁ ଆତଙ୍କବାଦୀ ଶିବିର ଧ୍ୱଂସ କରାଯାଇଥିଲା। ପିଓକେ ଏବଂ ପାକିସ୍ତାନରେ ଥିବା ୯ଟି ଆତଙ୍କବାଦୀ ଠିକଣା ଉପରେ ଆକ୍ରମଣ କରାଯାଇଥିଲା। ଏଥିରେ ଏକାଧିକ ଆତଙ୍କବାଦୀଙ୍କର ମୃତ୍ୟୁ ହୋଇଛି। ଭାରତୀୟ ସଶସ୍ତ୍ର ବାହିନୀ ବୀରତ୍ୱ ନେଇ ଆମେ ଗର୍ବ କରିବା କଥା ବୋଲି ରାଜନାଥ କହିଛନ୍ତି। ତେବେ ଏଥିରେ କୌଣସି ସାଧାରଣ ଲୋକଙ୍କର କ୍ଷତି ହୋଇ ନାହିଁ ବୋଲି ସେ କହିଛନ୍ତି।
