ଇସ୍ରାଏଲର ଏୟାର ଷ୍ଟ୍ରାଇକ୍ : ଶରଣାର୍ଥୀଙ୍କ ଉପରେ ମିସାଇଲ ମାଡ

ନୂଆଦିଲ୍ଲୀ, ୧୯|୧୧: ଲେବାନନରେ ଇସ୍ରାଏଲର ଏୟାର ଷ୍ଟ୍ରାଇକ୍ । ଶରଣାର୍ଥୀ ଶିବିର ଉପରେ ଆକ୍ରମଣ କଲା ଇସ୍ରାଏଲ ମିସାଇଲ ଏବଂ ଡ୍ରୋନ୍ । ଯେଉଁଥିରେ ୧୩ରୁ ଅଧିକ ଶରଣାର୍ଥୀ ପ୍ରାଣ ହରାଇଥିବା ସୂଚନା ମିଳିଛି ।

ରିପୋର୍ଟ ଅନୁସାରେ, ଲେବାନନର ଉପକୂଳରେ ଥିବା ସିଡନ ସହରରେ ପାଲେଷ୍ଟାଇନର ଶରଣାର୍ଥୀ ରହୁଛନ୍ତି । ଏଠାରେ ମଙ୍ଗଳବାର ବିଳମ୍ବିତ ରାତ୍ରରେ ଇସ୍ରାଏଲ ପକ୍ଷରୁ ଏୟାର ଷ୍ଟ୍ରାଇକ୍ କରାଯାଇଥିଲା । ତେବେ ଶରଣାର୍ଥୀ ଶିବିରରେ ହମାସ ଆତଙ୍କବାଦୀ ଥିବା ଇସ୍ରାଏଲ କହିଛି । କିନ୍ତୁ ହମାସ ଏହାକୁ ଖଣ୍ଡନ କରିଛି ।

ହମାସ କହିଛି ଯେ, ଇସ୍ରାଏଲ ବାରମ୍ବାର ସାଧାରଣ ଲୋକଙ୍କ ଉପରେ ଆକ୍ରମଣ କରୁଛି । ସେମାନେ ଶିବିରରେ ହମାସର ତାଲିମ କେନ୍ଦ୍ର ଥିବା କହୁଛନ୍ତି । ଯାହା ସମ୍ପୂର୍ଣ୍ଣ ମିଛ । ପ୍ରକୃତରେ ଇସ୍ରାଏଲ ଆକ୍ରମଣାତ୍ମକ ଆଭିମୁଖ୍ୟ ଆପଣାଇଛି ।

ହମାସ ଆହୁରି କହିଛି ଯେ, ଷ୍ଟ୍ରାଇକ୍ ଯେଉଁଠି ହୋଇଛି ତାହା ଏକ ଖେଳ ପଡିଆ । ଏଠାରେ ଅନେକ ଶରଣାର୍ଥୀ ରହୁଥିଲେ । ଯାହାକୁ ଇସ୍ରାଏଲ ଆକ୍ରମଣ କରି ବରବାଦ କରିଦେଇଛି ।