ନ୍ୟାୟପାଳିକା ଉପରେ ସମ୍ପୂର୍ଣ୍ଣ ଭରସା ଅଛି, 'ମୁଁ ଯାତ୍ରାକୁ ନେଇ ବଞ୍ଚିଛି, ମଞ୍ଚ ଛାଡିବିନି'

କଟକ ୦୯/୦୧: ରାତିର ରଙ୍ଗମଞ୍ଚ ତାତି । ସକାଳେ ପୀୟୁଷ ତାତି । ରାଜ୍ୟରେ ଥଣ୍ଡାରେ ଥାର୍ଡ ଡିଗ୍ରୀ । ହେଲେ ଶୀତକୁ ଗରମ କରିଛି ଜଲିଉଡ୍ ବ୍ୟାଡ ବୟଙ୍କ ପ୍ରତିକ୍ରିୟା । ଆଉ ଜଣାଇଦେଇଛନ୍ତି, ମଞ୍ଚ ବିନା ପୀୟୁଷଙ୍କ ଜୀବନ ଅସମ୍ଭବ । ଯାତ୍ରା ସହ ପୀୟୁଷଙ୍କ ସଂପର୍କ ବି ନିବିଡ । ଯେବେ ଯାଏଁ ଯାତ୍ରା ଅଛି, ସେବେଯାଏଁ ପୀୟୁଷ ତ୍ରୀପାଠି ଅଛି । ସେ ନିଜେ ବି ଏନେଇ ଖୁଲାସା କରିଛନ୍ତି । ଛାତି ବାଡାଇ କହିଛନ୍ତି ମଞ୍ଚ ଛାଡିବାର ପ୍ରଶ୍ନ ଉଠୁନି । କୋର୍ଟଙ୍କ ନୋଟିସ୍ ମିଳିନି, ନ ମିଳିବା ପର୍ଯ୍ୟନ୍ତ ଅଭିନୟ କରିବି। ଆଇନକୁ ସମ୍ମାନ ଦେଉଛି, ନୋଟିସ୍ ମିଳିଲେ ନିଷ୍ପତ୍ତି ନେବି । ​​​​​​​

ବୁଧବାର କଟକ ଜିଲ୍ଲା ଟାଙ୍ଗିରେ ଯାତ୍ରା ସିଂହବାହୀନି ତୁ ମୋ ବଜରଙ୍ଗି ନାଟକ ପରିବେଷଣ କରିବାର ଥିଲା । ଯାହାକୁ ନେ଼ଇ ପୀୟୂଷ ଦେଖିବା ପାଇଁ ବହୁ ଦର୍ଶକ ଙ୍କ ଭିଡ଼ ଦେଖିବାକୁ ମିଳିଥିଲା । ପାଖାପାଖି ୧୦୦୦ ରୁ ଅଧିକ ଟିକଟ ବିକ୍ରି ହୋଇଥିବା କଥା କମିଟି ତରଫରୁ ସୂଚନା ମିଳିଥିବା ବେଳେ ଦର୍ଶକଙ୍କ ମଧ୍ୟରେ ବହୁ ଉତ୍ସାହିତ ଥିବା ଦେଖାଦେଇଥିଲା । ତେବେ ସବୁ ଚର୍ଚ୍ଚାରେ ପୂର୍ଣ୍ଣଛେଦ ପକାଇ ପାଖାପାଖି ରାତି ୧୨.୪୫ ମିନିଟ୍ ରେ ମଞ୍ଚରେ ଚଢିଥିଲେ ସେ । ଏମିତିକି ସେ ଅଭିନୟ ବି କରିଥିଲେ ।

ଆଉ ନାଟକ ଶେଷରେ ମଞ୍ଚରେ ଓହ୍ଲାଇ ପ୍ରତିକ୍ରିୟା ବି ରଖିଥିଲେ । କହିଥିଲେ ଯେପର୍ଯ୍ୟନ୍ତ ତାଙ୍କ ପାଖକୁ କୌଣସି ନୋଟିସ୍ ନ ଆସିଛି ସେ ମଞ୍ଚରେ ନାଟକ ପରିବେଷଣ କରିବେ । ପୀୟୂଷ କହିଛନ୍ତି, ଆଇନକୁ ସମ୍ମାନ ଦେଉଛି । ନୋଟିସ୍ ମିଳିଲେ ଯାତ୍ରା ମାଲିକ ଏବଂ ଓକିଲଙ୍କ ସହ ପରାମର୍ଶ କରି ଆଗାମୀ ପଦକ୍ଷେପ ପାଇଁ ନିଷ୍ପତ୍ତି ନେବି । ସେ ଆହୁରି କହିଛନ୍ତି ନ୍ୟାୟପାଳିକା ଉପରେ ସମ୍ପୂର୍ଣ୍ଣ ଭରସା ଅଛି । ନିଜ ଉପରେ ମଧ୍ୟ ବିଶ୍ୱାସ ଅଛି, ମଞ୍ଚ ଛଡିବିନି। ବାସ, କିଛି ଦିନର କଥା । ଏବେସୁଦ୍ଧା କୋର୍ଟ ନୋଟିସ ପାଇନି ।