ନୂଆଦିଲ୍ଲୀ ୦୫/୦୩: ଆମେରିକାରେ ନିକଟରେ ହୋଇଥିବା ଏକ ନିଲାମୀ ସାରା ବିଶ୍ୱରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଏହି ନିଲାମୀରେ ଅନେକ ଐତିହାସିକ ଓ ଚର୍ଚ୍ଚିତ ସାମଗ୍ରୀକୁ ବିକ୍ରି ଲାଗି ରଖାଯାଇଥିଲା । ସେଥିମଧ୍ୟରେ ଦେଶର ପୂର୍ବତନ ରାଷ୍ଟ୍ରପତି ଜନ୍.ଏଫ୍ କେନେଡିଙ୍କର ଏକ ସର୍ଟସ୍, ଫେସବୁକ୍ର ସହ ପ୍ରତିଷ୍ଠାତା ମାର୍କ ଜୁକରବର୍ଗଙ୍କ ହୁଡି ଓ ଆପଲର ସହ ପ୍ରତିଷ୍ଠାତା ଷ୍ଟିଭ୍ ଜବ୍ସଙ୍କର ଟାଇ ସାମିଲ ଥିଲା । ପ୍ରସିଦ୍ଧ ବ୍ୟକ୍ତିବିଶେଷଙ୍କ ଦ୍ୱାରା ବ୍ୟବହୃତ ଏହି ସାମଗ୍ରୀଗୁଡି଼କ ଆଶାଠାରୁ ବହୁତ ଅଧିକ ଦାମ୍ରେ ବିକ୍ରି ହୋଇଛି ।
ଲସ୍ ଆଞ୍ଜେଲସ୍ରେ ଆୟୋଜିତ ଏହି ନିଲାମୀରେ ସବୁଠୁ ଅଧିକ ଚର୍ଚ୍ଚା ଜନ୍.ଏଫ୍ କେନେଡିଙ୍କର ଏକ ସର୍ଟସ୍କୁ ନେଇ ହୋଇଥିଲା । ତାକୁ ଭାରତୀୟ ମୁଦ୍ରାରେ ପ୍ରାୟ ୭.୫ ଲକ୍ଷ ଟଙ୍କାରେ ନିଲାମ କରାଯାଇଛି । ସର୍ଟସଟି ୧୯୪୦ ଦଶକର ହୋଇଥିବା କୁହାଯାଉଛି । ସେତେବେଳେ କେନେଡି ଆମେରିକୀୟ ନୌସେନାରେ ସେବା ଦେଉଥିଲେ ।
ସବୁଠୁ ବଡ଼ କଥା ହେଲା ଏହି ସର୍ଟସରେ ତାଙ୍କର ଶ୍ରଦ୍ଧା ନାମ ଜ୍ୟାକ୍ ଲେଖାଯାଇଛି । ନିଲାମୀରେ ସାମିଲ ହୋଇଥିବା ମାର୍କ ଜୁକରବର୍ଗଙ୍କର କଳା ରଙ୍ଗର ହୁଡିକୁ ସେ ୨୦୧୦ ମସିହାରେ ଅନେକ ଥର ପିନ୍ଧିଥିଲେ । ନିଲାମୀ ଲାଗି ତାର ମୂଳ ଦାମ୍ ପ୍ରାୟ ୮୭ ହଜାର ଟଙ୍କା ରଖାଯାଇଥିବାବେଳେ ହୁଡିଟି କିନ୍ତୁ ପ୍ରାୟ ୧୩ ଲକ୍ଷ ଟଙ୍କାରେ ବିକ୍ରି ହୋଇଛି । ତାକୁ କିଣିଥିବା ବ୍ୟକ୍ତି ଜୁକରବର୍ଗଙ୍କର ଲିଖିତ ଏକ ଚିଠି ମଧ୍ୟ ପାଇଛନ୍ତି ।
ସେଥିରେ ଜୁକରବର୍ଗ ଲେଖିଥିଲେ ଯେ, ଏହା ତାଙ୍କର ସବୁଠୁ ପସନ୍ଦର ହୁଡି ମଧ୍ୟରୁ ଅନ୍ୟତମ ଥିଲା । ଫେସବୁକ୍ର ଆରମ୍ଭ ଦିନମାନଙ୍କର ଏହାକୁ ସେ ବହୁତ ଥର ପିନ୍ଧିଥିଲେ । ନିଲାମୀରେ ସବୁଠୁ ଅଧିକ ଦାମ୍ରେ ବିକ୍ରି ହୋଇଛି ଆପଲର ସହ ପ୍ରତିଷ୍ଠାତା ଷ୍ଟିଭ୍ ଜବ୍ସଙ୍କର ଏକ ସବୁଜ-ଗୋଲାପୀ ରଙ୍ଗର ବୋ ଟାଇ । ସେ ଏହାକୁ ୧୯୮୪ ମସିହାରେ ମ୍ୟାକିଣ୍ଟୋସ୍ କମ୍ପ୍ୟୁଟରର ଲଞ୍ଚ ସମୟରେ ପିନ୍ଧିଥିଲେ । ଏହା ବ୍ୟତୀତ ଆଉ ୨ ଥର ଫଟୋସୁଟ୍ ଲାଗି ପିନ୍ଧିଥିଲେ ।
ନିଲାମୀ ଲାଗି ତାର ମୂଳ ଦାମ୍ ପ୍ରାୟ ୮୩ ହଜାର ଟଙ୍କା ରଖାଯାଇଥିଲା । ତେବେ ତାହା ୩୧ ଲକ୍ଷରେ ବିକ୍ରି ହୋଇଛି । ଷ୍ଟିଭ୍ ଜବ୍ସଙ୍କର ଟାଇ ସହିତ ସେ ଲେଖିଥିବା ଏକ ପୁରୁଣା ଚିଠି ମଧ୍ୟ ନିଲାମୀ ହୋଇଛି । ସେହି ଚିଠିଟିକୁ ସେ ନିଜର ୧୯ତମ ଜନ୍ମଦିନରେ ପିଲାଦିନର ବନ୍ଧୁ ଟିମ୍ ବ୍ରାଉନ୍ଙ୍କୁ ଲେଖିଥିଲେ । ସେଥିରେ ଭାରତରେ ହେଉଥିବା କୁମ୍ଭମେଳାରେ ସାମିଲ ହେବାକୁ ଚାହୁଁଥିବା ନେଇ ସେ ପ୍ରକାଶ କରିଥିଲେ ।
