ପଲ୍ୟୁସନ ସାର୍ଟିଫିକେଟ୍ ଅଛି କି ନାହିଁ ? ବିବ୍ରତ ହୁଅନ୍ତୁ ନାହିଁ, ଜାଣନ୍ତୁ ସରକାରଙ୍କ ନୂଆ ନିୟମ

ଭୁବନେଶ୍ଵର: ବୈଧ ପ୍ରଦୂଷଣପତ୍ର ସାର୍ଟିଫିକେଟ୍  ନ ଥିଲେ ପେଟ୍ରୋଲ ଟାଙ୍କିରେ ତେଲ ମିଳିବନି। ଏମିତି ଖବର ନେଇ ସାରା ରାଜ୍ୟରେ ଚର୍ଚ୍ଚାର ବିଷୟ ପାଲଟିଛି। ଏହି ପ୍ରସଙ୍ଗରେ ବିବ୍ରତ ନ ହେବାକୁ ଜନସାଧାରଣଙ୍କୁ ଅନୁରୋଧ କଲେ ରାଜ୍ୟ ସରକାର I ପ୍ରଦୂଷଣ ପ୍ରମାଣପତ୍ର ନ ଥିଲେ ଇନ୍ଧନ ମନା ପ୍ରସଙ୍ଗରେ କୌଣସି ଗୁଜବର ଶିକାର ହୋଇ ବିବ୍ରତ ନ ହେବାକୁ ଜନସାଧାରଣଙ୍କୁ ଅନୁରୋଧ କରାଯାଇଛି। ନିୟମର ଅନୁପାଳନ କରୁଥିବା ମୋଟରଯାନ ବ୍ୟବହାରକାରୀଙ୍କ ପାଇଁ କିଛି ବି ଚିନ୍ତା କରିବାର ଆବଶ୍ୟକ ନାହିଁ। ଏହା କେବଳ ନିୟମ ଉଲ୍ଲଙ୍ଘନକାରୀଙ୍କ ଉପରେ ଅଙ୍କୁଶ ଲଗାଇବାକୁ ପଦକ୍ଷେପ।

ପରିବେଶ ସୁରକ୍ଷା ଭଳି ମହତ୍ ଉଦ୍ଦେଶ୍ୟକୁ ଦୃଷ୍ଟିରେ ରଖି ମୋଟର ଯାନ ଆଇନ ଆଧାରରେ ଏହି ପଦକ୍ଷେପ ଗ୍ରହଣ କରାଯାଇଛି। ତୈଳ ସଂସ୍ଥା, ଡିଲର ସଂଘ ପ୍ରମୁଖଙ୍କ ସହ ଆଲୋଚନା କରି ଜନସାଧାରଣଙ୍କ ସୁବିଧାକୁ ଦୃଷ୍ଟିରେ ରଖି ୧୫ ଦିନ ଧରି ଏ ଦିଗରେ ବ୍ୟାପକ ସଚେତନତା ସୃଷ୍ଟି ପାଇଁ ନିଷ୍ପତ୍ତି ହୋଇଛି। ଇ-ଚାଲାଣ ବକେୟା ଥିଲେ ପ୍ରଦୂଷଣ ଯାଞ୍ଚରେ ଯେଉଁ ପ୍ରତିବନ୍ଧକ କଥା କୁହାଯାଉଛି, ଏଠାରେ ସ୍ପଷ୍ଟ କରାଯାଉଛି ଯେ କେନ୍ଦ୍ରୀୟ ମୋଟର ଯାନ ନିୟମାବଳୀ (ନିୟମ ୧୬୭) ଅନୁଯାୟୀ ୯୦ ଦିନରୁ ଅଧିକ ଦିନ ଧରି ବଜେୟା ଥିବା ଇ-ଚାଲାଣ ପାଇଁ ଏହା ଲାଗୁ ହୋଇଥାଏ । ୯୦ ଦିନରୁ କମ୍ ଦିନ ବକେୟା ଥିବା ଚାଲାଣ ପାଇଁ ବୈଧ ପ୍ରଦୂଷଣ ପତ୍ର ପାଇବାରେ କୌଣସି ପ୍ରତିବନ୍ଧକ ନାହିଁ । ଏହାସହ ଇ-ଚାଲାଣରେ OTS ଯୋଜନାରେ ୩୧ ଜୁଲାଇ ୨୦୨୫ ପର୍ଯ୍ୟନ୍ତ ବକେୟା ଥିବା ଇ-ଚାଲାଣ ପୈଠରେ ରିହାତି ମଧ୍ୟ ପ୍ରଦାନ କରାଯାଉଛି । ଅନଲାଇନରେ ଇ-ଚାଲାଣ ପୈଠ ପାଇଁ https://echallan.parivahan.gov.in ୱେବସାଇଟ ରହିଛି।

ଜନସାଧାରଣଙ୍କ ସୁବିଧାକୁ ଦୃଷ୍ଟିରେ ରଖି ପ୍ରଥମ ଥର ପ୍ରଦୂଷଣ ନିୟମ ଉଲ୍ଲଙ୍ଘନ ଓ ପୂର୍ବରୁ କୌଣସି ଚାଲାଣ ବକେୟା ନ ଥିଲେ ଚାଲାଣ ଜାରିର ୭ ଦିନ ମଧ୍ୟରେ ପ୍ରଦୂଷଣ ଯାଞ୍ଚ କରି ଚାଲାଣ ଓ ବୈଧ ସାର୍ଟିଫିକେଟ ସହ ରାଜ୍ୟ ପରିବହନ ପ୍ରାଧିକରଣ, ଓଡ଼ିଶା କାର୍ଯ୍ୟାଳୟରେ ଏକ ଦରଖାସ୍ତ ଦାଖଲ କଲେ ଏ ଦିଗରେ ନିୟମ ଅନୁସାରେ ବିଚାର କରାଯିବ।

ପ୍ରଦୂଷଣ ଯାଞ୍ଚ ସର୍ବଦା ପରିବହନ ବିଭାଗ ଦ୍ବାରା ସ୍ବୀକୃତିପ୍ରାପ୍ତ କେନ୍ଦ୍ରରେ କରନ୍ତୁ । ସ୍ବୀକୃତିପ୍ରାପ୍ତ କେନ୍ଦ୍ରର คิ ด https://puc.parivahan.gov.in/puc/views/PUCCenterList.xhtm ରେ ଉପଲବ୍ଧ ରହିଛି । mParivahan ଆପ୍ଲିକେସନରେ ପ୍ରଦୂଷଣ ପ୍ରମାଣପତ୍ରର ବୈଧତା ଯାଞ୍ଚ କରିନିଅନ୍ତୁ । ଏହାସହ ଯାଞ୍ଚ କେନ୍ଦ୍ର ଦ୍ବାରା ପ୍ରଦୂଷଣ ପ୍ରମାଣପତ୍ର ବୈଧତା ଥିବା ଷ୍ଟିକର୍ ଗାଡ଼ିରେ ଲଗାଇବାକୁ କୁହନ୍ତୁ । ନକଲି ପ୍ରଦୂଷଣ ସାର୍ଟିଫିକେଟ୍ ପ୍ରତି ସତର୍କ ରୁହନ୍ତୁ।

ଗାଡ଼ିର ପଞ୍ଜିକରଣ ପ୍ରମାଣପତ୍ରରେ ସର୍ବଦା ନିଜର ମୋବାଇଲ ନମ୍ବର ଅପଡେଟ୍ ରହିବା ଆବଶ୍ୟକ। ଅନଲାଇନରେ https://vahan.parivahan.gov.in ୱେବସାଇଟରେ ଏହା କରାଯାଇପାରିବ। ନିୟମ ପାଳନ ସମସ୍ତଙ୍କ ଗୁରୁଦାୟିତ୍ବ, ଏହାସହ ପରିବେଶ ସୁରକ୍ଷା ମଧ୍ୟ ନୈତିକ କର୍ତ୍ତବ୍ୟ । ତେଣୁ ଏଥିରେ ସହଯୋଗ କରିବାକୁ ନିବେଦନ କରାଯାଉଛି । ସର୍ବଦା ସଡ଼କ ସୁରକ୍ଷା ନିୟମ ପାଳନ କରନ୍ତୁ, ସଡ଼କ ଦୁର୍ଘଟଣାରୁ ଦୂରେଇ ରୁହନ୍ତୁ। ପରିବହନ ସେବା ସମ୍ବନ୍ଧୀୟ କୌଣସି ସୂଚନା ପାଇଁ ଯୋଗାଯୋଗ କରନ୍ତୁ ୨୪ ଘଣ୍ଟିଆ ଟୋଲ୍ ଫ୍ରି ନମ୍ବର- ୧୮୦୦୩୪୫୧୦୭୩।