ପୁଅ କମ୍ପାନୀର ଜମି ଦୁ୍ର୍ନୀତି ନେଇ ମୁହଁ ଖୋଲିଲେ ଅଜିତ ପାୱାର, ସେପଟେ ମାମଲାର ତଦନ୍ତ ନିର୍ଦ୍ଦେଶ ଦେଇସାରିଲେଣି ମୁଖ୍ୟମନ୍ତ୍ରୀ

ମୁମ୍ବାଇ ୬।୧୧:  ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାର ଗୁରୁବାର ତାଙ୍କ ପୁଅ ପାର୍ଥ ପାୱାର ସମ୍ପର୍କିତ କମ୍ପାନୀର ପୁଣେ ଜମି କାରବାର ବିବାଦରୁ ନିଜକୁ ପୃଥକ କରିଦେଇଛନ୍ତି। କହିଛନ୍ତି ଏହି ପ୍ରସଙ୍ଗ ସହ ତାଙ୍କର କୌଣସି ସମ୍ପର୍କ ନାହିଁ କି କୌଣସି ଭୁଲ କାମକୁ ସେ ବରଦାସ୍ତ କରିବେ ନାହିଁ। ମୁମ୍ବାଇରେ ସାମ୍ବାଦିକଙ୍କ ସହ ଆଲୋଚନାରେ ପାୱାର କହିଛନ୍ତି ଯେ ମୋର ଏହି କାରବାର ସହ ଆଦୌ କୌଣସି ସମ୍ପର୍କ ନାହିଁ। ତେବେ ମୁଁ କେବଳ ଏତିକି କହିବାକୁ ଚାହୁଁଛି ଗଣମାଧ୍ୟମରେ ଯାହା ବି ରିପୋର୍ଟ ପ୍ରକାଶିତ ହେଉଛି ସେ ସମ୍ପର୍କରେ ମୋତେ କିଛି ଜଣା ନାହିଁ।

ଅଜିତ ପାୱାର କହିଛନ୍ତି ପୂର୍ବରୁ କହିରଖିଛି କୌଣସି ପ୍ରକାରର ଗଡ଼ବଡିକୁ ମୁଁ ବରଦାସ୍ତ କରିବି ନାହିଁ। ମୁଁ ଏବେ ବ୍ୟକ୍ତିଗତ ଭାବେ ମାମଲାର ବିସ୍ତୃତ ସୂଚନା ବିଶ୍ଳେଷଣ କରିବି। ମୁଁ କେବେ କୌଣସି ଅଧିକାରୀଙ୍କୁ କୌଣସି ସମ୍ପର୍କିୟ ଅଥବା ପାର୍ଟି କାର୍ଯ୍ୟକର୍ତ୍ତାଙ୍କୁ ଲାଭ ଦେବା ପାଇଁ ଡକାଇ ନାହିଁ। ସେ କହିଛନ୍ତି ଯଦି କେହି ଭୁଲ କାମ କରୁଛି ଓ ମାନଦଣ୍ଡ ବିପକ୍ଷରେ ଯାଉଛି ତେବେ ମୁଁ କେବେ ତାଙ୍କୁ ସମର୍ଥନ କରିବି ନାହିଁ। ମୁଁ ଅଧିକାରୀମାନଙ୍କୁ ମଧ୍ୟ ସ୍ପଷ୍ଟ କରିଦେଉଛି ଯେ ମୁଁ ନିଜ କାମ କରାଇବା ଲାଗି ମୋ ନାମରେ କରାଯାଉଥିବା କୌଣସି ଭୁଲ କାମକୁ ସମର୍ଥନ କରିବି ନାହିଁ।

ଏନସିପି ନେତା କହିଛନ୍ତି ଯେ ଯେବେ ଆପଣଙ୍କ ପିଲା ବଡ଼ ହୋଇ ଯାଆନ୍ତି ସେମାନେ ନିଜେ ନିଜର ବ୍ୟବସାୟ କରନ୍ତି। ରାଜ୍ୟ ସରକାର ପାର୍ଥ ପାୱାର ସମ୍ପର୍କିତ କମ୍ପାନୀ ଆମାଡିଆ ଏଣ୍ଟରପ୍ରାଇଜର୍ସ ସମ୍ପର୍କିତ ୩୦୦ କୋଟି ଟଙ୍କାର ଜମି କିଣାବିକାରେ କଥିତ ଅନିୟମିତତାର ଯାଞ୍ଚ ନିମନ୍ତେ ଏକ କମିଟି ଗଠନ କରିଛନ୍ତି। ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀଶ ଅତିରିକ୍ତ ମୁଖ୍ୟ ସଚିବ (ରାଜସ୍ୱ) ବିକାଶ ଖଡଗେଙ୍କୁ କମିଟିର ମୁଖ୍ୟ ନିଯୁକ୍ତ କରିଛନ୍ତି। ଏହି ମାମଲାରେ ସରକାର ଜଣେ ତହସିଲଦାର ଓ ଜଣେ ସବ ରେଜିଷ୍ଟ୍ରାରଙ୍କୁ ଚାକିରୀରୁ ନିଲମ୍ବନ କରିଛନ୍ତି। କାରଣ ୧,୮୦୦ କୋଟି ଟଙ୍କାର ଜମିକୁ ମାତ୍ର ୩୦୦ କୋଟି ଟଙ୍କାରେ ବିକ୍ରି କରି ଦିଆଯାଇଥିବା ବିରୋଧୀ ଦଳ ଅଭିଯୋଗ କରିଥିଲେ। ଏହା ପୂର୍ବରୁ ଫଡନବୀଶ ନାଗପୁରରେ ସାମ୍ବାଦିକଙ୍କୁ ଏହା  ପ୍ରଥମ ଦୃଷ୍ଟ୍ୟା ଏକ ଗୁରୁତର ମାମଲା ଲାଗୁଛି ବୋଲି କହିଥିଲେ। ଏଣୁ ସେ ସମ୍ପର୍କିତ ବିଭାଗ ମାନଙ୍କୁ ମାମଲା ସମ୍ପର୍କିତ ସମସ୍ତ ସୂଚନା ମାଗିବା ସହ ମାମଲାର ତଦନ୍ତ ନିର୍ଦ୍ଦେଶ ଦେଇଥିବା କହିଛନ୍ତି। ଏଥିରେ ପାୱାର କହିଛନ୍ତି ମୁଖ୍ୟମନ୍ତ୍ରୀଙ୍କୁ ନିଶ୍ଚିତ ଭାବେ ଯାଞ୍ଚ କରିବା ଦରକାର ଓ ଏହା ପଛରେ ଥିବା ସତ୍ୟତା ସାମ୍ନାକୁ ଆସିବା ଦରକାର।

ତେବେ ଅଧିକାରୀଙ୍କ ଅନୁସାରେ ପୁଣେର ସବୁଠୁ ଗୁରୁତ୍ୱପୂର୍ଣ୍ଣ ଅଞ୍ଚଳ ମୁନ୍ଧୱାରେ ଥିବା ସରକାରୀ ମାଲିକାନାଧିନ ୪୦ ଏକର ମହାରବତନ ଜମି ଏକ ଘରୋଇ କମ୍ପାନୀ ଆମାଡିଆ ଏଣ୍ଟରପ୍ରାଇଜର୍ସ ଏଲଏଲପିକୁ ୩୦୦ କୋଟି ଟଙ୍କାରେ ବିକ୍ରି କରିଦିଆଯାଇଛି। ଏହି କାରବାର ଏବେ କଥିତ ଅନିୟମିତତା କାରଣରୁ ଯାଞ୍ଚ ପରିସରରେ ରହିଛି। ଅଧିକାରୀମାନେ କହିଛନ୍ତି ଯେ ଯେହେତୁ ଏହା ଏକ ସରକାରୀ ଜମି ଏଥି ପାଇଁ ଆଇନଗତ ଭାବେ କୌଣସି ଘରୋଇ ସଂସ୍ଥାକୁ ବିକ୍ରି କରାଯାଇ ପାରିବ ନାହିଁ।