ମୁମ୍ବାଇ ୧୩।୪: ଭାରତୀୟ କ୍ରିକେଟ ଟିମର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ପୁଣି ଥରେ ଆଇସିସି ପୁରୁଷ କ୍ରିକେଟ କମିଟିର ଅଧ୍ୟକ୍ଷ ମନୋନୀତ ହୋଇଛନ୍ତି। ସେହିପରି ପୂର୍ବତନ ଭାରତୀୟ ବ୍ୟାଟସମ୍ୟାନ ଭି.ଭି.ଏସ ଲକ୍ଷ୍ମଣ କମିଟିର ପ୍ୟାନେଲ ସଦସ୍ୟ ରୂପେ କାୟମ ଅଛନ୍ତି। କ୍ରିକେଟର ବୈଶ୍ୱିକ ସଂସ୍ଥା ରବିବାର ଏହି ସୂଚନା ଦେଇଛି। ୨୦୦୦ରୁ ୨୦୦୫ ମସିହା ପର୍ଯ୍ୟନ୍ତ ଭାରତୀୟ ଟିମ୍ର ନେତୃତ୍ୱ ନେଇଥିବା ଗାଙ୍ଗୁଲି ୨୦୨୧ରେ ପ୍ରଥମ ଥର ଏହି କମିଟିର ଅଧ୍ୟକ୍ଷ ହୋଇଥିଲେ।
୫୨ ବର୍ଷ ବୟଷ୍କ ଗାଙ୍ଗୁଲି ସେତେବେଳେ ଅନୀଲ କୁମ୍ବଲେଙ୍କ ସ୍ଥାନରେ ଏହି ଦାୟିତ୍ୱ ଗ୍ରହଣ କରିଥିଲେ। କୁମ୍ବଲେ ତାଙ୍କର ୩ ବର୍ଷର କାର୍ଯ୍ୟକାଳ ପରେ ଏହି ପଦବୀ ଛାଡିଥିଲେ। ଗାଙ୍ଗୁଲି ଓ ଲକ୍ଷ୍ମଣଙ୍କ ବ୍ୟତୀତ ଆଫଗାନିସ୍ତାନର ପୂର୍ବତନ ଖେଳାଳି ହମିଦ ହସନ ୱେଷ୍ଟଇଣ୍ଡିଜର ଡେସମଣ୍ଡ ହେନସ୍, ଦକ୍ଷିଣ ଆଫ୍ରିକାର ଟେଷ୍ଟ ଏବଂ ୱାନଡେ କ୍ୟାପ୍ଟେନ ତେମ୍ବା ବାଭୂମା ଓ ଇଂଲଣ୍ଡର ପୂର୍ବତନ ବ୍ୟାଟସ୍ ମ୍ୟାନ ଜୋନାଥନ ଟ୍ରଟଙ୍କୁ କମିଟିରେ ନିଯୁକ୍ତ କରାଯାଇଥିଲା।
ଉଲ୍ଲେଖଯୋଗ୍ୟ ଯେ ଗାଙ୍ଗୁଲିଙ୍କ ଅଧ୍ୟକ୍ଷତାରେ ଏହି କମିଟି ୱାନଡେ କ୍ରିକେଟରେ ଗୋଟିଏ ବଲ ବ୍ୟବହାର କରିବାକୁ ସୁପାରିଶ କରିଛି। ୱାନଡେ ରେ ଦୀର୍ଘ ସମୟରୁ ୨ଟି ନୂଆ ବଲର ପ୍ରଥା ପ୍ରଚଳିତ ହୋଇ ଆସୁଛି। ଏହି ସୁପାରିଶକୁ ଆଇସିସି ନିର୍ଦ୍ଦେଶକ ବୋର୍ଡ ଦ୍ୱାରା ଅନୁମୋଦନ କରାଯିବା ଦରକାର। ଏହା ପରେ ହିଁ ସଂଶୋଧିତ ଖେଳ ସର୍ତ୍ତ ଲାଗୁ ହୋଇ ପାରିବ। ଆଇସିସି ବୋର୍ଡ ଜିମ୍ବାୱେ ହରାରେ ଠାରେ ଏହି ପ୍ରସଙ୍ଗରେ ଚର୍ଚ୍ଚା ହୋଇପାରେ।
ନୂଆ ଆଇସିସି ମହିଳା କ୍ରିକେଟ କମିଟିରେ ନ୍ୟୁଜିଲ୍ୟାଣ୍ଡର ପୂର୍ବତନ ଅଫସ୍ପିନର କ୍ୟାଥେରିନ କ୍ୟାମ୍ପବେଲ ଅଧ୍ୟକ୍ଷା ଅଛନ୍ତି। ଏଥିରେ ପୂର୍ବତନ ଅଷ୍ଟ୍ରେଲିୟ ଖେଳାଳି ଏଭରିଲ ଫାହେ ଓ କ୍ରିକେଟ ଦକ୍ଷିଣ ଆଫ୍ରିକା (ସିଏସଏ) ଫୋଲେତସୀ ମୋସିକୀ ଅନ୍ୟ ସଦସ୍ୟ ଅଛନ୍ତି।
