ନୂଆଦିଲ୍ଲୀ: ପାଲଟା ଶୁଳ୍କ ଲଗାଇ ସାରା ବିଶ୍ୱକୁ ଚମକାଇଲେ, ପୁଣି ୯୦ ଦିନ ପାଇଁ ଶୁଳ୍କ ସ୍ଥଗିତ ରଖି ଆଶ୍ୱସ୍ତି ଦେଲେ, ଆଉ ଏବେ ପୁଣି ଏକ ନୂଆ ଘୋଷଣା କରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ସ୍ମାର୍ଟଫୋନ୍, ଲାପଟପ୍ ଏବଂ ସେମିକଣ୍ଡକ୍ଟର ଚିପ୍ସ ସମେତ ବିଭିନ୍ନ ଇଲେକ୍ଟ୍ରୋନିକ୍ ଉତ୍ପାଦଗୁଡ଼ିକ ଉପରେ ପାଲଟା ଶୁଳ୍କ ଲାଗୁ ହେବ ନାହିଁ, ଏମିତିକି ଏଗୁଡ଼ିକ ୧୦ ପ୍ରତିଶତ ବେସ୍ଲାଇନ୍ ଶୁଳ୍କ ଅଧୀନରେ ବି ଆସିବେ ନାହିଁ ବୋଲି ଟ୍ରମ୍ପ ସରକାର ଘୋଷଣା କରିଛନ୍ତି।
ଶୁକ୍ରବାର ଡୋନାଲ୍ଡ ଟ୍ରମ୍ପ ପ୍ରଶାସନ ଘୋଷଣା କରିଛି ଯେ ସ୍ମାର୍ଟଫୋନ୍, ଲାପଟପ୍ ଏବଂ ସେମିକଣ୍ଡକ୍ଟର ଚିପ୍ସ ସମେତ ବିଭିନ୍ନ ଇଲେକ୍ଟ୍ରୋନିକ୍ ଉତ୍ପାଦଗୁଡ଼ିକୁ ପାଲଟା ଶୁଳ୍କରୁ ମୁକ୍ତ କରାଯିବ। ଆମେରିକାର କଷ୍ଟମ୍ସ ଏବଂ ସୀମା ସୁରକ୍ଷାର ଏକ ନୋଟିସ ଅନୁଯାୟୀ, ଏହି ଉତ୍ପାଦଗୁଡ଼ିକ ଚୀନ୍ ଉପରେ ଲାଗୁ ହୋଇଥିବା ବର୍ତ୍ତମାନର ୧୪୫ ପ୍ରତିଶତ ଶୁଳ୍କ କିମ୍ବା ଅନ୍ୟ କୌଣସି ସ୍ଥାନରେ ୧୦ ପ୍ରତିଶତ ବେସଲାଇନ୍ ଶୁଳ୍କ ପରିସରଭୁକ୍ତ ହେବ ନାହିଁ। ଶୁକ୍ରବାର ବିଳମ୍ବିତ ରାତ୍ରୀରେ ଜାରି ହୋଇଥିବା ନୋଟିସ୍ ଅନୁଯାୟୀ, ଏହି ଛାଡ଼ଗୁଡ଼ିକ ଏପ୍ରିଲ ୫ ତାରିଖ ପାଖରୁ ଲାଗୁ ହେବ।
ଟ୍ରମ୍ପ ଏଭଳି ଘୋଷଣା, ଆପଲ୍, ସାମସଙ୍ଗ୍ ଏବଂ ଏନଭିଡିଆ ଭଳି ଚିପ୍ ନିର୍ମାତାଙ୍କ ପାଇଁ ଲାଭପ୍ରଦ ହେବ। କାରଣ ଟ୍ରମ୍ପଙ୍କ ଟାରିଫ ପରେ ଗ୍ୟାଜେଟ୍ଗୁଡ଼ିକର ମୂଲ୍ୟ ଆକାଶଛୁଆଁ ହୋଇପାରେ ବୋଲି ଟେକ୍ ଜାଏଣ୍ଟମାନେ ଚିନ୍ତା ପ୍ରକାଶ କରିଥିଲେ। ଯେଉଁଥିରେ ଅଧିକାଂଶ ଆମେରିକା କମ୍ପାନୀର କ୍ଷତି ହେଉଥିଲା। ଏନେଇ ଟ୍ରମ୍ପ ସରକାରଙ୍କ ଉପରେ ପ୍ରବଳ ଚାପ ମଧ୍ୟ ପଡ଼ୁଥିଲା। ତେଣୁ ଟ୍ରମ୍ପ ସରକାର ଏଭଳି ନିଷ୍ପତ୍ତି ନେଇଥାଇ ପାରନ୍ତି ବୋଲି କୁହାଯାଉଛି। ତେବେ ଟ୍ରମ୍ପ ପ୍ରଶାସନ ପକ୍ଷରୁ ଜାରି ହୋଇଥିବା ନୋଟିସ୍ରେ କିନ୍ତୁ ପଦକ୍ଷେପ ସମ୍ପର୍କରେ କୌଣସି ସ୍ପଷ୍ଟୀକରଣ ନାହିଁ।
ଏକ ଆମେରିକୀୟ ଏଜେନ୍ସି ଆକଳନ ଅନୁଯାୟୀ ଆପଲର ଆଇଫୋନ ଉତ୍ପାଦନ ଏବଂ ଆସେମ୍ବଲିର ପ୍ରାୟ ୮୦ ପ୍ରତିଶତ ଚୀନରେ ହୋଇଥାଏ ଏବଂ ବାକି ୨୦ ପ୍ରତିଶତ ଭାରତରେ ତିଆରି ହୋଇଥାଏ। ଟେଲିକମ୍ ଉପକରଣ, ଚିପ୍ ତିଆରି ଯନ୍ତ୍ରପାତି, ରେକର୍ଡିଂ ଡିଭାଇସ୍, ଡାଟା ପ୍ରୋସେସିଂ ମେସିନ୍ ଏବଂ ପ୍ରିଣ୍ଟେଡ୍ ସର୍କିଟ୍ ବୋର୍ଡ ଆସେମ୍ବଲି ଭଳି ଅନ୍ୟାନ୍ୟ ଟେକ୍ନୋଲୋଜି ଉତ୍ପାଦଗୁଡ଼ିକ ମଧ୍ୟ ଆମେରିକାରେ ବହୁତ କମ୍ ଉତ୍ପାଦିତ ହୁଏ। ଏଗୁଡ଼ିକୁ ବି ଟାରିଫରୁ ବାଦ ଦିଆଯାଇଛି।
ବିଶେଷଜ୍ଞମାନେ ସୂଚନା ଅନୁଯାୟୀ ଏହି ଉତ୍ପାଦଗୁଡ଼ିକୁ ଆମେରିକାରେ ଉତ୍ପାଦନ କରିବାକୁ ହେଲେ କିଛି ବର୍ଷ ଲାଗିଯିବ। ଏପଟେ ଆମେରିକାର ଲେବର କଷ୍ଟ ଅଧିକ ଯୋଗୁ କୌଣସି କମ୍ପାନୀ ନିଜ ଦେଶର ଫ୍ୟାକ୍ଟ୍ରି ଲଗାଇବାକୁ ହିଁ ଚାହୁ ନାହାନ୍ତି। ତେବେ ଏହି ଶୁଳ୍କ ଛାଡ଼ ଅଳ୍ପଦିନ ପାଇଁ ଲାଗୁ ହୋଇପାରେ। ଚୀନ ପାଇଁ ଏକ ନୂଆ ଟାରିଫ ନୀତି ଲାଗୁ କରାଯାଇପାରେ ବୋଲି ଶୁଣିବାକୁ ମିଳୁଛି।
ଆମେରିକା ସହିତ ବାଣିଜ୍ୟ ଅସନ୍ତୁଳନ ଅଭିଯୋଗ ଆଣି ଟ୍ରମ୍ପ ନିଜ ବାଣିଜ୍ୟିକ ପାର୍ଟନ ଦେଶଗୁଡ଼ିକ ଉପରେ ବ୍ୟାପକ ପାଲଟା ଶୁଳ୍କ ଘୋଷଣା କରିଥିଲେ। ଏପ୍ରିଲ ୯ ତାରିଖରେ, ଶୁଳ୍କ ଲାଗୁ କରିବାର ମାତ୍ର ୧୩ ଘଣ୍ଟା ପରେ, ଚୀନ୍ ବ୍ୟତୀତ ଅଧିକାଂଶ ଦେଶ ପାଇଁ ୯୦ ଦିନର ରହିତାଦେଶ ଘୋଷଣା କରିଥିଲେ।
