ଆମେରିକା ଟେକ୍ସାସରେ ଭୟଙ୍କର ବନ୍ୟା ସ୍ଥିତି; ୪୩ ମୃତ, ୨୩ ନିଖୋଜ, ଜାରି ରହିଛି ଉଦ୍ଧାର କାର୍ଯ୍ୟ

Published By : Prameya-News7 Bureau | July 06, 2025 IST

ନୂଆଦିଲ୍ଲୀ ୦୬।୦୭; ଆମେରିକାରେ ବର୍ଷା ତାଣ୍ଡବ । ଭୟଙ୍କର ବନ୍ୟାରେ ହନ୍ତସନ୍ତ ଲୋକେ । ଗତ ଶୁକ୍ରବାର ହୋଇଥିବା ବନ୍ୟାରେ ପାଖାପାଖି ୪୩ ଜଣଙ୍କ ଜୀବନ ଗଲାଣି । ମୃତକଙ୍କ ମଧ୍ୟରେ ୧୫ଜଣ ଶିଶୁ ରହିଛନ୍ତି । ଗତକାଲି ୨୪ଜଣଙ୍କ ମୃତ୍ୟୁ ନେଇ ଖବର ରହିଥିବାବେଳେ ମୃତକଙ୍କ ସଂଖ୍ୟା ୪୩କୁ ବୃଦ୍ଧି ପାଇଛି । ଅନ୍ତର୍ଜାତୀୟ ଗଣମାଧ୍ୟମ ପକ୍ଷରୁ ସୂଚନା ଅନୁସାରେ, ୱାଶିଂଟନର ଟେକ୍ସାସରେ ଶୁକ୍ରବାର ସକାଳେ ଭୟଙ୍କର ଝଡ଼ତୋଫାନ ହୋଇଥିଲା । ଏହାପରେ ଅଚାନକ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା । ଫଳରେ ୪୩ ଜଣଙ୍କ ଜୀବନ ଯାଇଥିବା ନେଇ ଖବର ରହିଛି । ସମର୍‌ କ୍ୟାମ୍ପ୍‌ କରିବାକୁ ଆସିଥିବା ୨୪ରୁ ଅଧିକ ଲୋକ ନିଖୋଜ ଥିବା ଜଣାପଡ଼ିଛି । ମୃତକଙ୍କ ସଂଖ୍ୟା ଆହୁରି ବଢିବା ନେଇ ଆଶଙ୍କା କରାଯାଉଛି। 

ହେଲିକପ୍ଟର ସାହାଯ୍ୟରେ ଉଦ୍ଧାର କାର୍ଯ୍ୟ ଜାରି ରହିଛି । ପାଖାପାଖି ୭୫୦ରୁ ଅଧିକ ଲୋକଙ୍କୁ ରେସ୍କ୍ୟୁ କରାଯାଇଥିବାର ସୂଚନା ରହିଛି । ଝଡ଼ ତୋଫାନ କାରଣରୁ ହୋଇଥିବା ପ୍ରବଳ ବର୍ଷା ଯୋଗୁ ଏପରି ସ୍ଥିତି ଉପୁଜିଛି । ଆହୁରି ବର୍ଷା ହେବା ନେଇ ମଧ୍ୟ ପାଣିପାଗ ବିଭାଗ ଆକଳନ କରିଛି । ଏହି ବିପର୍ଯ୍ୟୟକୁ ନେଇ ଦୁଃଖ ପ୍ରକାଶ କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଏହା ବହୁତ ଭୟାନକ ବୋଲି ଟ୍ରମ୍ପ କହିଛନ୍ତି । 

ସୂଚନାଯୋଗ୍ୟ, ବର୍ଷା ନେଇ ପୂର୍ବରୁ କୌଣସି ସୂଚନା ଦିଆଯାଇନଥିଲା । ହଠାତ ଏମିତି ବର୍ଷା ହେଲା ବନ୍ୟା ହୋଇଗଲା । ଆମେରିକାର ଟେକ୍ସାସରେ ରାତାରାତି ଆସିଥିବା ବନ୍ୟା ଏକ ପ୍ରକାର ପ୍ରଳୟ ରଚିଛି । ଯେତିକି ବର୍ଷା ମାସ ସାରା ହେବା କଥା ସେତିକି ବର୍ଷା ମାତ୍ର ଗୋଟିଏ ଘଣ୍ଟା ଭିତରେ ହୋଇଛି ।

 

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.