୪ ମିନିଟରେ ୫୨ ଥର 'SORRY', ତଥାପି ଧମକାଇଲେ ପ୍ରିନ୍ସିପାଲ, ତୃତୀୟ ମହଲାରୁ ଡେଇଁ ପଡିଲେ ଅଷ୍ଟମ ଶ୍ରେଣୀ ଛାତ୍ର

ଇନ୍ଦୋର, ୩୦/୧୧: ଛୋଟ ଭୁଲ କରିଥିଲା ଛାତ୍ର । ଯାହାକୁ ଗ୍ରହଣ କରିପାରିଲେନି ସ୍କୁଲ ଅଧ୍ୟକ୍ଷ । ଭୁଲ ମାଗିଲେ ବି ବଢିଥିଲା ମାନସିକ ଅତ୍ୟାଚାର । ଶେଷରେ ତୃତୀୟ ମହଲାରୁ ଛେଇଁପଡିଲା ଛାତ୍ର । ଏପରି କିଛି ଘଟଣା ସାମ୍ନାକୁ ଆସିଛି ମଧ୍ୟପ୍ରଦେଶର ରାତଲମରେ । ଏବେ ଛାତ୍ରର ଅବସ୍ଥା ଗୁରୁତର ଥିବା ଜଣା ପଡିଛି ।

ମିଡିଆ ରିପୋର୍ଟ ଅନୁସାରେ, ଛାତ୍ର ଜଣଙ୍କ ଗୁରୁବାର ସ୍କୁଲକୁ ମୋବାଇଲ ଫୋନ୍ ଆଣିଥିଲେ । ସେ କ୍ଲାସରୁମର ଏକ ଭିଡିଓ ରେକର୍ଡ କରିଥିଲେ । ପରେ ତାକୁ ସୋସିଆଲ ମିଡିଆରେ ପୋଷ୍ଟ କରିଥିଲେ । ସ୍କୁଲ କର୍ତ୍ତୃପକ୍ଷ ଏନେଇ ତାଙ୍କ ଅଭିଭାବକଙ୍କୁ ସୂଚନା ଦେଇଥିଲେ । ଘଟଣା ବାବଦରେ ଆଲୋଚନା ପାଇଁ ସ୍କୁଲକୁ ଡାକିଥିଲେ ।

ସ୍କୁଲ ସିସିଟିଭି ଫୁଟେଜରେ ଦେଖିବାକୁ ମିଳିଛି ଯେ, ଶୁକ୍ରବାର ୧୩ ବର୍ଷୀୟ ଛାତ୍ରଜଣଙ୍କ ପ୍ରିନ୍ସପାଲଙ୍କ କାର୍ଯ୍ୟଳୟକୁ ଯାଇଥିଲେ । ପ୍ରାୟ ୪ ମିନିଟ ପରେ ରୁମରୁ ବାହାରିଥିଲେ । ଭୟରେ ପ୍ରିନ୍ସିପାଲଙ୍କ ଆଗରେ ସେ ୫୨ ଥର ସରି ମଧ୍ୟ କହିଥିଲେ । ଡରରେ ତାଙ୍କ ପାଟିରୁ ଆଉ କିଛି ବାହାରୁନଥିଲା । କିନ୍ତୁ ଅଭିଯୋଗ ହୋଇଛି ଯେ, କ୍ୟାରିଅରକୁ ଶେଷ କରିଦେବେ ବୋଲି ପ୍ରିନ୍ସିପାଲ ତାଙ୍କୁ ଧମକ ଦେଇଥିଲେ । ଏହାସହ ସମସ୍ତ ମେଡାଲକୁ ସ୍କୁଲ ନେଇଯିବେ ବୋଲି ସେ କହିଥିଲେ । ଜାତୀୟ ସ୍ତରରେ ଅନେକ ପ୍ରତିଯୋଗିତାରେ ଭାଗ ନେଇ ପଦକ ହାସଲ କରିଥିଲେ ଅଷ୍ଟମ ଶ୍ରେଣୀ ଛାତ୍ର । ତେଣୁ ସେ ନିଜ କ୍ୟାରିଅର ପାଇଁ ଅଧିକ ଡରିଯାଇଥିଲେ ।

ଘଟଣାର କିଛି ସମୟ ପରେ ସ୍କୁଲ କରିଡରରେ ସେ ଧାଉଁଥିବା ଦେଖିବାକୁ ମିଳିଥିଲା । ଏହାସହ ସେ ହଠାତ ତୃତୀୟ ମହଲାରୁ ତଳକୁ ଡେଇଁ ପଡିଥିଲେ । ସେଠାରେ ତାଙ୍କ ବାପା ପ୍ରିତମ କଟାରା ଉପସ୍ଥିତ ଥିଲେ ବି ଘଟଣା ବାବଦରେ ସେ ଜାଣିପାରିନଥିଲେ । ପ୍ରିତମ କହିଛନ୍ତି ଯେ, ପୁଅକୁ ଦେଖା କରିବା ପାଇଁ ସ୍କୁଲରୁ ଫୋନ୍ ଆସିଥିଲା । ସେ ସ୍କୁଲରେ ପହଁଚିଲା ବେଳକୁ ପୁଅ ତୃତୀୟ ମହଲାରୁ ଡେଇଁ ପଡିଥିଲା ।

ସ୍ଥାନୀୟ ଉପଜିଲ୍ଲାପାଳ କହିଛନ୍ତି ଯେ, ଛାତ୍ର ଜଣଙ୍କ ସ୍କୁଲକୁ ଫୋନ୍ ଆଣିଥିଲେ । ଯାହା ନିୟମର ଖିଲାପ ଥିଲା । ତେଣୁ ଅଧ୍ୟକ୍ଷ ତାଙ୍କୁ କିଛି ପଚରାଉଚୁରା କରିଥିଲେ । ଯାହା ପରେ ସେ ଆତ୍ମହତ୍ୟା ଉଦ୍ୟମ କରିଥିଲେ । ଘଟଣାର ତଦନ୍ତ ଚାଲିଛି । ଏହାପରେ ଦୋଷୀ ବିରୋଧରେ ଆକ୍ସନ ନିଆଯିବ ବୋଲି ସେ କହିଛନ୍ତି ।