ପାକିସ୍ତାନକୁ ହୃଦୟ ଖୋଲି ସାହାଯ୍ୟ କରୁଛି ସାଉଦୀ ଆରବ , ଖୁବ୍‌ ଶସ୍ତା ସୁଧ ଦରରେ ଦେଉଛି ଋଣ

ଇସଲାମାବାଦ : ପାକିସ୍ତାନକୁ ହୃଦୟ ଖୋଲି ସାହାଯ୍ୟ କରୁଛି ସାଉଦୀ ଆରବ। ସେ କେବଳ ଚାରି ପ୍ରତିଶତର ବାର୍ଷିକ ସୁଧ ହାର ସହ ପାକିସ୍ତାନକୁ ମିଳୁଥିବା ଶସ୍ତା ବିଦେଶୀ ଋଣର ପ୍ରମୁଖ ଉତ୍ସ ସୃଷ୍ଟି ହୋଇଛି। ରବିବାର ମିଡ଼ିଆରେ ଆସିଥିବା ଏକ ଖବରରେ ଏହି ସୂଚନା ଦିଆଯାଇଛି। ଅଫିସିଆଲି ରେକର୍ଡ ଅନୁସାରେ, ରିୟାଦ ନିକଟବର୍ତ୍ତୀ ବର୍ଷ ଗୁଡି଼କରେ ଇସଲାମାବାଦକୁ ଦେଇ ଥିବା ଅଲଗା ଅଲଗା ନଗଦ ଋଣ ଉପରେ ଚାରି ପ୍ରତିଶତ ସୁଧ ଦର ଆଦାୟ କରିଛି। ଦ ଏକ୍ସପ୍ରେସ୍‌ ଟ୍ରିବ୍ୟୁନ୍‌ର ଖବର ଅନୁସାରେ , ମୂଳତଃ ଗୋଟିଏ ବର୍ଷ ପାଇଁ ଦିଆଯାଇ ଥିବା ଏହି ଋଣକୁ ପାକିସ୍ତାନ ଦ୍ୱାରା ଶୁଝିବା ଏବେ ବାକି ଅଛି।

ସାଉଦୀ , ବିନା କୌଣସି ଅତିରିକ୍ତ ସୁଧରେ ଏହି ଋଣ ଗୁଡ଼ିକୁ ବାର୍ଷିକ ରୂପେ ଆଗକୁ ବଢୁଛି। ଖବର ଅନୁସାରେ, ସାଉଦୀ ଆରବ ଦ୍ୱାରା ପାକିସ୍ତାନକୁ ଦିଆଯାଇ ଥିବା ଏହି ଋଣ ଚୀନରୁ ମିଳୁଥିବା ଋଣର ତୁଳନାରେ ପାଖାପାଖି ଏକ-ତୃତୀୟାଂଶ ଶସ୍ତା। ଏହାସହ , ବିଦେଶୀ ବାଣିଜ୍ୟିକ ଋଣର ଅଧା ମୂଲ୍ୟରେ ରହିଛି। ଖବରରେ ସୂତ୍ରାନୁସାରେ କୁହାଯାଇଛି ଯେ, ସାଉଦୀ ଆରବ ଦ୍ୱାରା ଦିଆଯାଇ ଥିବା ଦୁଇ ଆରବ ଆମେରିକୀୟ ଡଲାରର ନଗଦ ଜମା ସୁବିଧାର ଅବଧି ଡିସେମ୍ୱରରେ ପୂରା ହେବାକୁ ଯାଉଛି ଏବଂ ଅର୍ଥ ମନ୍ତ୍ରଣାଳୟ ଏହାକୁ ପୁଣି ଥରେ ବୃଦ୍ଧି କରିବାକୁ ଯୋଜନା କରୁଛି।

ଆନ୍ତର୍ଜାତିକ ମୁଦ୍ରା କୋଷ (ଆଇଏମଏଫ୍‌) କାର୍ଯ୍ୟକ୍ରମ ଅନୁସାରେ , ବାହ୍ୟ ଆର୍ଥିକ ଅଭାବକୁ ପୂରଣ କରିବା ପାଇଁ ପ୍ରାପ୍ତ ୩ ବିଲିୟନ ଆମେରିକୀୟ ଡଲାରର ଆଉ ଏକ ସାଉଦୀ ଋଣକ ଅବଧି ଆସନ୍ତା ବର୍ଷ ଜୁନ୍‌ରେ ପୂରା ହୋଇଯିବ। ଆଇଏମଏଫ୍‌ ସର୍ତ୍ତ ରଖିଛି ଯେ, ପାକିସ୍ତାନର ତିନୋଟି ଋଣଦାତା , ସାଉଦୀ ଆରବ, ଚୀନ ଓ ସଂଯୁକ୍ତ ଆରବ ଏମିରେଟ୍ ତିନି ବର୍ଷର କାର୍ଯ୍ୟକ୍ରମ ପୂରା ହେବା ଯାଏ ନିଜର ନଗଦ ଜମା ରାଶି ଜାରି ରଖିବେ। ଖବର ମୁତାବିକ , ଏହି ସବୁ ଦେଶ ପାକିସ୍ତାନକୁ ମୋଟ ୧୨ ବିଲିୟନ ଆମେରିକୀୟ ଡଲାରର ଋଣ ଦେଇଛି, ଯାହା ପାକିସ୍ତାନୀ କେନ୍ଦ୍ରୀୟ ବ୍ୟାଙ୍କର ୧୪.୩ ବିଲିୟନ ଆମେରିକୀୟ ଡଲାରର ସମସ୍ତ ବିଦେଶୀ ମୁଦ୍ରା ଭଣ୍ଡାରର ଏକ ବଡ଼ ଭାଗ। ସୂତ୍ରାନୁସାରେ, ସାଉଦୀ ଆରବର ଋଣ ଉପରେ ଚାରି ପ୍ରତିଶତ ସୁଧ ଦର ଥିବା ବେଳେ ପାକିସ୍ତାନ ଚାରି ବିଲିୟନ ଆମେରିକୀୟ ଡଲାରର ଚାରୋଟି ଋଣ ଉପରେ ପାଖାପାଖି ୬.୧ ପ୍ରତିଶତ ସୁଧ ପେମେଣ୍ଟ କରୁଛି।