ନୂଆଦିଲ୍ଲୀ ୨୭।୦୬: ଭାରତକୁ ପ୍ରତିଶ୍ରୁତି ଦେଇଛି ଋଷ । ୨୦୨୭ ସୁଦ୍ଧା ବାକି ଥିବା ଦୁଇଟି S-400 ଏୟାର ଡିଫେନ୍ସ ସିଷ୍ଟମର ଡେଲିଭରି ପୁରା କରିବ ରୁଷିଆ । ଚୀନର କ୍ୱିଙ୍ଗଡାଓରେ ହେଉଥିବା SCO ସମ୍ମିଳନୀରେ ଭାରତ-ଋଷ ମଧ୍ୟରେ ହୋଇଛି ଦ୍ୱିପାକ୍ଷିକ ପ୍ରତିରକ୍ଷା ଆଲୋଚନା । ଏହି ସମୟରେ ଉଭୟ ପକ୍ଷ Su-30MKI ଯୁଦ୍ଧ ବିମାନର ଅପଗ୍ରେଡ଼, ମିଳିତ ପ୍ରତିରକ୍ଷା ଉତ୍ପାଦନ ଏବଂ ପ୍ଲାଟଫର୍ମର ଆଧୁନିକୀକରଣ ବିଷୟରେ ମଧ୍ୟ ଆଲୋଚନା କରିଥିଲେ ।
ଭାରତୀୟ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏବଂ ରୁଷୀୟ ପ୍ରତିରକ୍ଷା ମନ୍ତ୍ରୀ ଆଣ୍ଡ୍ରେ ବେଲୋସୋଭ ସୀମାପାର ଆତଙ୍କବାଦ ଉପରେ ଆଲୋଚନା କରିଥିଲେ । ମସ୍କୋ ଏପ୍ରିଲ ୨୨ରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୫ ଜଣ ଭାରତୀୟଙ୍କ ମୃତ୍ୟୁ ନେଇ ନୂଆଦିଲ୍ଲୀ ସହିତ ଏକତା ପ୍ରକାଶ କରିଥିଲେ ।
ଭାରତ ସରକାରଙ୍କ ବିଜ୍ଞପ୍ତିରେ କୁହାଯାଇଛି ଯେ ସେମାନେ ବ୍ୟାପକ ଭୂ-ରାଜନୈତିକ ଚିନ୍ତା ଏବଂ ରଣନୈତିକ ସହଯୋଗ ବିଷୟରେ ମଧ୍ୟ ଆଲୋଚନା କରିଛନ୍ତି । ପହଲଗାମ ଆତଙ୍କବାଦୀ ଆକ୍ରମଣର ଜବାବରେ ଭାରତ ଦ୍ୱାରା ଆରମ୍ଭ ହୋଇଥିବା ଅପରେସନ ସିନ୍ଦୁର ପରିପ୍ରେକ୍ଷୀରେ ଏହି ଆଲୋଚନା ହୋଇଥିଲା।
ମେ ମାସରେ ଭାରତ କରିଥିଲା ଅପରେସନ ସିନ୍ଦୁର । ଏହି ସମୟରେ S400 ଟ୍ରାୟମ୍ଫ ଏୟାର ଡିଫେନ୍ସ ସିଷ୍ଟମ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ରୁଷ-ୟୁକ୍ରେନ ଯୁଦ୍ଧ ଯୋଗୁଁ ଚୁକ୍ତି ଅନୁଯାୟୀ ଆଉ ଦୁଇଟି S-400 ପ୍ରଣାଳୀର ବିତରଣ ବିଳମ୍ବିତ ହୋଇଥିଲା। ବର୍ତ୍ତମାନ ରୁଷ ପ୍ରତିଶ୍ରୁତି ଦେଇଛି ଯେ ଏଥିମଧ୍ୟରୁ ଗୋଟିଏ ୨୦୨୬ ରେ ଏବଂ ଶେଷଟି ୨୦୨୭ରେ ପ୍ରଦାନ କରାଯିବ। ପାକିସ୍ତାନ ଏବଂ ଚୀନରୁ ବିପଦର ମୁକାବିଲା କରିବା ପାଇଁ ଭାରତ ବିଭିନ୍ନ ଅଞ୍ଚଳରେ ରୁଷିଆ ମିସାଇଲ୍ ପ୍ରତିରକ୍ଷାର ତିନୋଟି ସ୍କ୍ୱାର୍ଡନ ମୁତୟନ କରିଛି।
ରୁଷିଆ ଏୟାର ଡିଫେନ୍ସ ସିଷ୍ଟମ ପାକିସ୍ତାନୀ ଆକ୍ରମଣରୁ ଭାରତକୁ ସୁରକ୍ଷା ଯୋଗାଇଥିଲା । ପାକିସ୍ତାନ ପ୍ରଥମେ ଏକ S-400 ବ୍ୟାଟେରୀ ନଷ୍ଟ କରିଥିବା ଦାବି କରିଥିଲା । କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅପରେସନ ସିନ୍ଦୂର ପରେ ଆଦମପୁର ଏୟାରବେସ ପରିଦର୍ଶନ କରି ଏବଂ S-400 ସାମ୍ନାରେ ଠିଆ ହୋଇ ଏହାକୁ ଭୁଲ ପ୍ରମାଣିତ କରିଥିଲେ।
