ନୂଆଦିଲ୍ଲୀ: ବିରାଟ କୋହଲି ଓ କୃଣାଲ ପାଣ୍ଡ୍ୟାଙ୍କ ଦମଦାର ଧୈର୍ଯ୍ୟପୂର୍ଣ୍ଣ ଅର୍ଦ୍ଧଶତକ। ଦିଲ୍ଲୀ କ୍ୟାପିଟାଲ୍ସକୁ ତାରି ମାଟିରେ ୬ ଓ୍ଵିକେଟ୍ରେ ହରାଇଲା ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ। ଆଉ ଚଳିତ ସିଜିନ ପରାଜୟର ପ୍ରତିଶୋଧ ନେଇଛି ବେଙ୍ଗାଲୁରୁ। ଏଥିସହ ବେଙ୍ଗାଲୁରୁ ଚଳିତ ସିଜିନରେ ୬ଟି ମ୍ୟାଚ୍ ବାହାରେ ଖେଳି ସବୁ ମ୍ୟାଚ୍ ଜିତିଛି। ପ୍ରଥମେ ବ୍ୟାଟିଂ କରିଥିବା ଦିଲ୍ଲୀ ୮ ଓ୍ଵିକେଟ୍ ହରାଇ ୧୬୨ ରନ କରିଥିଲା। କେଏଲ ରାହୁଲ ସର୍ବାଧିକ ୪୧ ରନ ଓ ଟ୍ରିଷ୍ଟନ ଷ୍ଟବ୍ସ ୩୪ ରନ କରିଥିଲେ। ଜବାବରେ ବେଙ୍ଗାଲୁରୁ ୧୮.୩ ଓଭରରେ ୪ ଓ୍ଵିକେଟ୍ ହରାଇ ମ୍ୟାଚ୍କୁ ଜିତି ନେଇଛି। କୃଣାଲ ପାଣ୍ଡ୍ୟା ୭୩ ରନର ମ୍ୟାଚ୍ ବିଜୟୀ ଇନିଂସ ଖେଳିଥିବା ବେଳେ କୋହଲି ଗୁରୁତ୍ଵପୂର୍ଣ୍ଣ ୫୧ ରନ କରିଛନ୍ତି। ବିଜୟ ସହ ବେଙ୍ଗାଲୁରୁ ୧୪ ପଏଣ୍ଟ ପାଇ ପଏଣ୍ଟ ଟେବୁଲର ଶୀର୍ଷକୁ ଉଠିଥିବା ବେଳେ ଦିଲ୍ଲୀ ଚତୁର୍ଥ ସ୍ଥାନକୁ ଖସି ଆସିଛି।
୧୬୩ ରନର ବିଜୟ ଲକ୍ଷ୍ୟ ପିଛା କରିଥିବା ଆରସିବିକୁ ୨୦ ରନ ସ୍କୋରରେ ଡବଲ ଝଟକା ଲାଗିଥିଲା। ଜାକବ ବେଥେଲ ୧୨ ରନ ଓ ଦେବଦତ୍ତ ପାଡିକଲ ଖାତା ଖୋଲି ନ ପାରି ପାଭିଲିୟନ ଫେରିଥିଲେ। ପୁଣି ଅଧିନାୟକ ରଜତ ପାଟିଦାର ୬ ରନ କରି ପାଭିଲିୟନ ଫେରିଥିଲେ। ୨୬ ରନ ସ୍କୋରରେ ୩ ଓ୍ଵିକେଟ୍ ହରାଇ ସଙ୍କଟରେ ପଡ଼ିଥିବା ଆରସିବିର ଇନିଂସ ସମ୍ଭାଳିଥିଲେ କୋହଲି ଓ କୃଣାଲ ପାଣ୍ଡ୍ୟା। ପିଚ୍ ଧିମା ଥିବାରୁ ସେହି ହିସାବରେ ଧୈର୍ଯ୍ୟର ସହ ବ୍ୟାଟିଂ କରିଥିଲେ।
ଦୁହେଁ କ୍ରିଜରେ ଜମିବା ସହ ଆବଶ୍ୟକ ରନ ହାର ସଂଗ୍ରହ କରିଥିଲେ। ଦୁଇ ବ୍ୟାଟର ନିଜ ନିଜର ଅର୍ଦ୍ଧଶତକ ପୂରା କରିଥିଲେ। ବିଶେଷ କରି କୃଣାଲ ପାଣ୍ଡ୍ୟା ଦ୍ରୁତ ବ୍ୟାଟିଂ କରିଥିଲେ। ଦୁଇ ବ୍ୟାଟର ଚତୁର୍ଥ ଓ୍ଵିକେଟ୍ରେ ୧୧୯ ରନ ଯୋଡ଼ି ଦଳର ବିଜୟ ମାର୍ଗ ପ୍ରଶସ୍ତ କରିଥିଲେ। କୋହଲି ୫୧ ରନ କରି ଆଉଟ୍ ହୋଇଥିଲେ। ବିଜୟ ଔପଚାରିକତା ପୂରା କରିଥିଲେ କୃଣାଲ ପାଣ୍ଡ୍ୟା ଓ ଟିମ୍ ଡେଭିଡ୍। କୃଣାଲ ୪୭ ବଲରୁ ୫ ଚୌକା ଓ ୪ ଛକା ସହ ୭୩ ରନ ଓ ଟିମ୍ ଡେଭିଡ ୫ ବଲରୁ ୧୯ ରନ କରି ଅପରାଜିତ ଥିଲେ। ଶେଷରେ ମ୍ୟାଚ୍କୁ ୧୮.୩ ଓଭରରେ ୪ ଓ୍ଵିକେଟ୍ ହରାଇ ଜିତି ନେଇଛି ବେଙ୍ଗାଲୁରୁ।
