୨୦୨୬ ପାଣିପାଗ ଅପ୍‌ଡେଟ: ଜୁନ୍ ଶେଷ ବେଳକୁ ଆସୁଛି ଏଲ୍‌ ନିନୋ, ମୌସୁମୀ ବାଟରେ ସାଜିବ ପ୍ରତିବନ୍ଧକ

ନୂଆଦିଲ୍ଲୀ ୦୧/୦୧: ବଦଳୁଛି ପାଣିପାଗର ମିଜାଜ୍ । ଏବର୍ଷ ବି ସେମିତି କିଛି ପରିବର୍ତ୍ତନ ଦେଖିବାକୁ ମିଳିପାରେ । ଯାହା ଫଳରେ ଲମ୍ବି ଯାଇପାରେ ଗ୍ରୀଷ୍ମ ଅବଧି । ଏମିତିକି ବର୍ଷା ଋତୁରେ ଅନୁଭୂତ ହୋଇପାରେ ଗ୍ରୀଷ୍ମ ଭଳି ତାତି । ଖାଲି ସେତିକି ନୁହେଁ, ବର୍ଷାର ପରିମାଣ କମିଯିବ । ଅନିୟମିତ ହେବ ବର୍ଷାର ଅବଧି । କେଉଁଠି ହେବ, ଆଉ କେଉଁଠି ଶୁଖିଯିବ । ମଝିରେ ମଝିରେ ହଜିଯାଇପାରେ ମୌସୁମୀ ।

୨୦୨୬ରେ ଏମିତି ନିର୍ଦ୍ଦୟୀ ପାଣିପାଗ ଜନଜୀବନକୁ ନାକେଦମ କରିପାରେ । ଦୀର୍ଘମିଆଦି ମଡେଲ୍କୁ ନେଇ ବିଶିଷ୍ଟ ପାଣିପାଗ ବିଜ୍ଞାନୀ ପ୍ରଫେସର ସୁରେନ୍ଦ୍ରନାଥ ପଶୁପାଳକ ଏଭଳି ଚରମ ପାଣିପାଗ ପୂର୍ବାନୁମାନ କରିଛନ୍ତି ୨୦୨୬ ପାଇଁ ।ସେ କହିଛନ୍ତି, ଏନସୋର ତିନୋଟି ସ୍ଥିତି (ଲା-ନିନା, ଏଲ୍-ନିନୋ, ନ୍ୟୁଟ୍ରାଲ) ଏବଂ ଭାରତୀୟ ମହାସାଗରର ଡାଇପୋଲ୍ (ଆଇଓଡି) ମାନଦଣ୍ଡ ପାଣିପାଗକୁ ପ୍ରଭାବିତ କରିଥାଏ । ଗତ ୫ ବର୍ଷ ହେବ ଭାରତରେ ହାରାହାରି ଭଲ ବର୍ଷା ରହୁଛି ।

ଲା-ନିନା ସ୍ଥିତି ଥିବାରୁ ୨ ବର୍ଷ ହେବ ଓଡ଼ିଶାରେ ସ୍ୱାଭାବିକ କିମ୍ବା ତା’ଠାରୁ ଅଧିକ ବର୍ଷା ହେଉଛି । ବର୍ତ୍ତମାନ ଲା-ନିନା ସ୍ଥିତି ରହିଛି । ଜାନୁଆରୀ ପରେ ନ୍ୟୁଟ୍ରାଲ୍ ସ୍ଥିତି ଆସିବ, ଯାହାକି ପ୍ରାୟ ୩ ମାସ ରହିବ । ଜୁନ୍ ଶେଷବେଳକୁ ଏଲ୍-ନିନୋ ସ୍ଥିତି ଆସିବା ସମ୍ଭାବନା ଅଛି । ଏଲ୍-ନିନୋ ସ୍ଥିତିରେ ତାତି ବଢ଼ିବା ସହ ବର୍ଷା ଅନିୟମିତ କିମ୍ବା କମ୍ ହୋଇଥାଏ । ସେହିପରି ଆଇଓଡି ପଜିଟିଭ ରହିଲେ ଭଲ ବର୍ଷା ଓ ନେଗେଟିଭ ହେଲେ କମ୍ ବର୍ଷା ହୁଏ । ଏବେ ଆଇଓଡି ନେଗେଟିଭ୍ ରହିଛି ।

୩ ମାସ ପରେ ନ୍ୟୁଟ୍ରାଲ ସ୍ଥିତି ଆସିବ । ତା’ପରେ ପଜିଟିଭ ହେବା ସମ୍ଭାବନା କମ୍ । ଏହା ମଧ୍ୟ ସଙ୍କେତ ଦେଖାଉଛି, ଏ ବର୍ଷ କମ୍ ବର୍ଷା ହେବ ।ମଡେଲ୍ରୁ ଅନୁମାନ କରାଯାଉଛି, ଫେବ୍ରୁଆରୀ-ମାର୍ଚ୍ଚ ତାପମାତ୍ରା ସ୍ୱାଭାବିକ ରହିବ । କିମ୍ବା ସାମାନ୍ୟ ଅଧିକ ରହିପାରେ । ଏପ୍ରିଲରୁ ତାପମାତ୍ରା ସ୍ୱାଭାବିକଠାରୁ ଅଧିକ ରହିପାରେ । ହେଲେ ଜୁନ୍ ଶେଷବେଳକୁ ଏଲ୍-ନିନୋ ସ୍ଥିତି ଯୋଗୁ ଗରମ ଅବଧି ଲମ୍ବିବା ଆଶଙ୍କା ରହିଛି । ଗ୍ରୀଷ୍ମ ଅବଧି ବଢ଼ିଲେ ଜୁନ, ଜୁଲାଇ ଓ ଅଗଷ୍ଟରେ ବି ଅସ୍ୱାଭାବିକ ଗରମ ଅସ୍ତବ୍ୟସ୍ତ କରିପାରେ ।

ଚିନ୍ତାର ବିଷୟ ହେଲା, ଏଲ୍-ନିନୋ ପ୍ରଭାବରେ ମୌସୁମୀ ପାଇଁ ପାଗ ପ୍ରତିକୂଳ ରହିବ । ଏହା ପ୍ରଭାବରେ ବର୍ଷା ବାଧାପ୍ରାପ୍ତ ହେବ । ଜୁଲାଇ ଓ ଅଗଷ୍ଟ ମାସରେ ବର୍ଷା କମିଲେ ଚାଷ ଗୁରୁତର ଭାବେ ପ୍ରଭାବିତ ହେବ । ଏହି ସମୟରେ ଧାନ ରୁଆ କାମ ଆଗକୁ ବଢ଼ିଥାଏ । ବିଲ ଶୁଖିଲେ ପଡ଼ିଲେ ମରୁଡ଼ି ଆଶଙ୍କା ଦେଖା ଦେଇପାରେ । ୨୦୨୩ରେ ଏଲ୍-ନିନୋ ପ୍ରଭାବରେ ରାଜ୍ୟରେ ଭୟାନକ ଗ୍ରୀଷ୍ମ ପ୍ରବାହ ଅନୁଭୂତ ହୋଇଥିଲା । ୨୦୨୫ରେ ଗ୍ରୀଷ୍ମ ଅବଧି ସେତେ ଯନ୍ତ୍ରଣାଦାୟକ ନଥିଲା । ବର୍ଷା ମଧ୍ୟ ଭଲ ହୋଇଥିଲା । ଏପରିକି ଲା-ନିନା ସ୍ଥିତି ଯୋଗୁ ଏଥର ଶୀତ ମଧ୍ୟ ଲମ୍ବା ରହିଛି ।