ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (RBI) ୨୦୨୪-୨୫ ଆର୍ଥିକ ବର୍ଷରେ ସାମ୍ବିଧାନିକ ବ୍ୟବସ୍ଥା ଏବଂ ନିୟାମକ ନିର୍ଦ୍ଦେଶାବଳୀର ବିଭିନ୍ନ ଉଲ୍ଲଂଘନ ପାଇଁ ୩୫୩ଟି ନିୟନ୍ତ୍ରିତ ସଂସ୍ଥା (REs) ଉପରେ ମୋଟ ୫୪.୭୮ କୋଟି ଟଙ୍କାର ଜରିମାନା ଲଗାଇଛି। ଗୁରୁବାର ପ୍ରକାଶିତ ଏହାର ବାର୍ଷିକ ରିପୋର୍ଟରେ ଏହି ସୂଚନା ଦେଇଛି କେନ୍ଦ୍ରୀୟ ବ୍ୟାଙ୍କ୍।
ବିଭିନ୍ନ ଆଇନ ଓ ନିୟମର ଅନୁପାଳନରେ ତ୍ରୁଟି ଯୋଗୁ ବ୍ୟାଙ୍କ, ଅଣ-ବ୍ୟାଙ୍କିଙ୍ଗ ଆର୍ଥିକ କମ୍ପାନୀ (NBFC), ଆସେଟ ରିକନଷ୍ଟ୍ରକ୍ସନ କମ୍ପାନୀ (ARC), ହାଉସିଂ ଫାଇନାନ୍ସ କମ୍ପାନୀ ଏବଂ ସମବାୟ ବ୍ୟାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ କାର୍ଯ୍ୟାନୁଷ୍ଠାନ ନିଆଯାଇଛି। ଏହି ବ୍ୟାଙ୍କ ଓ ସଂସ୍ଥାମାନେ ସାଇବର ସୁରକ୍ଷା, ଏକ୍ସପୋଜର ନର୍ମ୍ସ, ଆୟ ଚିହ୍ନଟ ଏବଂ ସମ୍ପତ୍ତି ବର୍ଗୀକରଣ (IRAC), ନୋ ୟୋର କଷ୍ଟମର (KYC) ନିର୍ଦ୍ଦେଶାବଳୀ, ଠକେଇ ବର୍ଗୀକରଣ ଏବଂ ରିପୋର୍ଟିଂ, ବଡ଼ ଋଣ ଉପରେ ସୂଚନାର କେନ୍ଦ୍ରୀୟ ଭଣ୍ଡାର (CRILC) କୁ ତଥ୍ୟ ଦାଖଲ କରିବା ଏବଂ କ୍ରେଡିଟ୍ ସୂଚନା କମ୍ପାନୀ (CIC) କୁ କ୍ରେଡିଟ୍ ସୂଚନା ରିପୋର୍ଟିଂ ଭଳି କ୍ଷେତ୍ରରେ ତ୍ରୁଟି କରିଥିଲେ।
ତଥ୍ୟ ଅନୁଯାୟୀ, ଆର୍ଥିକ ସଂସ୍ଥାଗୁଡ଼ିକରେ ସମବାୟ ବ୍ୟାଙ୍କଗୁଡ଼ିକ ସବୁଠାରୁ ଅଧିକ ଦଣ୍ଡିତ ବର୍ଗ ଥିଲେ। ମୋଟ ୨୬୪ଟି ସମବାୟ ବ୍ୟାଙ୍କକୁ ଦଣ୍ଡିତ କରାଯାଇଥିଲା। ଏଥିରେ ମୋଟ ଜରିମାନ ୧୫.୬୩ କୋଟି ଟଙ୍କା ଥିଲା। କେନ୍ଦ୍ରୀୟ ବ୍ୟାଙ୍କ ୩୭ଟି ଏନବିଏଫସି ଏବଂ ଏଆରସି ବିରୁଦ୍ଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା, ଏଥିରେ ମୋଟ ୭.୨୯ କୋଟି ଟଙ୍କା ଜରିମାନା ଲଗାଇଥିଲା। ଏଥିସହିତ ୧୩ଟି ହାଉସିଂ ଫାଇନାନ୍ସ କମ୍ପାନୀକୁ ମିଳିତ ଭାବରେ ୮୩ ଲକ୍ଷ ଜରିମାନା କରାଯାଇଥିଲା।
ପଢନ୍ତୁ- କାନାରା ବ୍ୟାଙ୍କ ଗ୍ରାହକଙ୍କୁ ଆଶ୍ବସ୍ତି, ଲାଗୁ କଲା ଏହି ନୂଆ ନିୟମ
ସେହିପରି ବାଣିଜ୍ୟିକ ବ୍ୟାଙ୍କଗୁଡ଼ିକ ମଧ୍ୟରେ, ୮ଟି ସରକାରୀ ବ୍ୟାଙ୍କକୁ ମୋଟ ୧୧.୧୧ କୋଟି ଜରିମାନା କରାଯାଇଥିଲା। ସେହିପରି ୧୫ଟି ଘରୋଇ ବ୍ୟାଙ୍କକୁ ୧୪.୮ କୋଟି ଜରିମାନା କରିଛି ଆର୍ବିଆଇ। ୨୦୨୪-୨୫ ଆର୍ଥିକ ବର୍ଷରେ ରିଜର୍ଭ ବ୍ୟାଙ୍କ ୬ଟି ବିଦେଶୀ ବ୍ୟାଙ୍କକୁ ମଧ୍ୟ ଦଣ୍ଡିତ କରିଛି।
ନିୟମ ଅନୁପାଳନରେ ତ୍ରୁଟି ଯୋଗୁ ଆଇସିଆଇସିଆଇ ବ୍ୟାଙ୍କ, ଆକ୍ସିସ୍ ବ୍ୟାଙ୍କ, ବ୍ୟାଙ୍କ ଅଫ୍ ମହାରାଷ୍ଟ୍ର, ଆଇଡିବିଆଇ ବ୍ୟାଙ୍କ ଏବଂ ବ୍ୟାଙ୍କ ଅଫ୍ ବରୋଦାକୁ ଫାଇନ ଲଗାଇଚି ଭାରତୀୟ ରିଜର୍ଭ ବ୍ୟାଙ୍କ। ଏନେଇ ଆର୍ବିଆଇ ପକ୍ଷରୁ ଶୁକ୍ରବାର ସୂଚନା ଦିଆଯାଇଛି। ଜରିମାନା ପରିମାଣ ୯୮ ଲକ୍ଷ ଟଙ୍କା ପର୍ଯ୍ୟନ୍ତ ବୃଦ୍ଧି କରାଯାଇଛି।
ଆକ୍ସିସ୍ ବ୍ୟାଙ୍କକୁ ୨୯.୬୦ ଲକ୍ଷ ଟଙ୍କା ଜରିମାନା- ଆକ୍ସିସ୍ ବ୍ୟାଙ୍କ ବିରୋଧରେ ନିଆଯାଇଥିବା କାର୍ଯ୍ୟାନୁଷ୍ଠାନ ବିଷୟରେ ଜାରି କରିଥିବା ବିବୃତ୍ତିରେ ଆର୍ବିଆଇ କହିଛି "ବ୍ୟାଙ୍କ କିଛି ଆଭ୍ୟନ୍ତରୀଣ/କାର୍ଯ୍ୟାଳୟ ଆକାଉଣ୍ଟ ମାଧ୍ୟମରେ ଅନଧିକୃତ କିମ୍ବା ଅସମ୍ପର୍କିତ ଏଣ୍ଟ୍ରି ପଠାଇଥିଲା। ଏଥିପାଇଁ ୨୯.୬୦ ଲକ୍ଷ ଫାଇନ କରାଯାଇଛି।
ICICI ବ୍ୟାଙ୍କକୁ ଏକାଧିକ ନିୟମ ଉଲ୍ଲଂଘନ ପାଇଁ ₹୯୭.୮୦ ଲକ୍ଷ ଜରିମାନା- ବିଭିନ୍ନ କାରଣ ଯୋଗୁ ICICI ବିରୋଧରେ ଦଣ୍ଡ ଲାଗୁ କରାଯାଇଛି। ଏନେଇ କେନ୍ଦ୍ରୀୟ ବ୍ୟାଙ୍କ କହିଛି ଯେ ଏହି ବ୍ୟାଙ୍କ ନିର୍ଦ୍ଧାରିତ ସମୟସୀମା ମଧ୍ୟରେ ଆରବିଆଇକୁ ଏକ ସାଇବର ସୁରକ୍ଷା ଘଟଣାର ରିପୋର୍ଟ କରିବାରେ ବିଫଳ ହୋଇଥିଲା। କିଛି ବର୍ଗର ଆକାଉଣ୍ଟକୁ ଆଲର୍ଟ ପଠାଇବା ପାଇଁ ଏକ ଦୃଢ଼ ସଫ୍ଟୱେର୍ ବ୍ୟବହାର କରିବାରେ ମଧ୍ୟ ବିଫଳ ହୋଇଥିଲା। କ୍ରେଡିଟ୍ କାର୍ଡ କ୍ଷେତ୍ରରେ, ବ୍ୟାଙ୍କ କିଛି ଗ୍ରାହକଙ୍କୁ ବିଲ୍ କିମ୍ବା ଷ୍ଟେଟମେଣ୍ଟ ପଠାଇ ନଥିଲା, କିନ୍ତୁ ସେମାନଙ୍କ ଉପରେ ବିଳମ୍ବରେ ପେମେଣ୍ଟ ଚାର୍ଜ ଲାଗୁ କରିଥିଲା।
ବ୍ୟାଙ୍କ ଅଫ୍ ମହାରାଷ୍ଟ୍ର ଏବଂ IDBI ବ୍ୟାଙ୍କ ଉପରେ ₹୩୧.୮୦ ଲକ୍ଷ ଜରିମାନା- କେନ୍ଦ୍ରୀୟ ବ୍ୟାଙ୍କ କହିଛି ଯେ, ନନ-ଫେସ୍ ଟୁ ଫେସ୍ ମୋଡ୍ରେ ଆଧାର OTP-ଆଧାରିତ e-KYC ବ୍ୟବହାର କରି ଖୋଲାଯାଇଥିବା ଅନେକ ଜମା ଆକାଉଣ୍ଟ ସମ୍ପର୍କରେ କିଛି ନିୟାମକ ଆବଶ୍ୟକତା ପାଳନ କରିବାରେ ବିଫଳତା ପାଇଁ ବ୍ୟାଙ୍କ ଅଫ୍ ମହାରାଷ୍ଟ୍ରକୁ ଦଣ୍ଡିତ କରାଯାଇଛି। ସେହିପରି IDBI କିଛି KCC ଆକାଉଣ୍ଟରେ ପ୍ରଯୁଜ୍ୟ ସୁଧ ହାରଠାରୁ ଅଧିକ ସୁଧ ଆଦାୟ କରିଥିଲା ବୋଲି ତା ଉପରେ ଫାଇନ ପଡ଼ିଛି।
ବ୍ୟାଙ୍କ ଅଫ୍ ବରୋଦାକୁ ₹୬୧.୪୦ ଲକ୍ଷ ଜରିମାନା- ସେହିପରି ବ୍ୟାଙ୍କ ଅଫ୍ ବରୋଦା ଏକ ବୀମା କମ୍ପାନୀ ଦ୍ୱାରା ବୀମା କର୍ପୋରେଟ୍ ଏଜେନ୍ସି ସେବାରେ ନିୟୋଜିତ ଏହାର କର୍ମଚାରୀମାନଙ୍କୁ କୌଣସି ପ୍ରୋତ୍ସାହନ (ନଗଦ ନୁହେଁ) ପ୍ରଦାନ କରାଯାଇ ନାହିଁ ବୋଲି ସୁନିଶ୍ଚିତ କରିବାରେ ବିଫଳ ହୋଇଥିଲା। ଏବଂ ଏହା ନିର୍ଦ୍ଦିଷ୍ଟ ବର୍ଗର ସଞ୍ଚୟ ଜମା ଆକାଉଣ୍ଟରେ ନିର୍ଦ୍ଧାରିତ ବ୍ୟବଧାନରେ ସୁଧ ମଧ୍ୟ ଜମା କରି ନଥିଲା।
