କାର୍ ଚଲେଇବ ଏଆଇ, କରିବ ସବୁ ଫଙ୍କସନ୍ : ଦରକାର ପଡିବେନି ଡ୍ରାଇଭର

ନୂଆଦିଲ୍ଲୀ, ୦୬/୦୧ :ଦରକାର ପଡିବେନି ଡ୍ରାଇଭର । ଏବେ ଆପେ ଆପେ ଚାଲିବ କାର୍ । ପୁରା ମଣିଷ ଚଲାଇବା ଭଳି ଚାଲିବ । ଟେସଲାର ଅଟୋ ପାଇଲଟ୍ କାରଠୁ ବି ଉନ୍ନତ । ଏପରି ଏକ ସ୍ମାର୍ଟ୍ ଏବଂ ଆଡଭାନ୍ସଡ୍ ଏଆଇ ଟେକନୋଲୋଜି ବାବଦରେ ଘୋଷଣା କରିଛି ଏନଭିଡିଆ । ଏହାର ଏଆଇ ଟୁଲ୍ ଆଗାମୀ ଦିନରେ ସମ୍ପୂର୍ଣ୍ଣ ସଂୟଚାଳିତ କାରକୁ ବାସ୍ତବତାର ରୂପ ଦେବ ବୋଲି ଲସ୍ ଭେଗାସର ଏକ କାର୍ଯ୍ୟକ୍ରମରେ କମ୍ପାନୀ କହିଛି ।

ଲସ୍ ଭେଗାସରେ କନଜ୍ୟୁମର୍ ଇଲେକ୍ଟ୍ରୋନିକସ ଶୋର ଆୟୋଜନ କରାଯାଇଛି । ଏଥିରେ ଏନଭିଡିଆ ନୂଆ ନୂଆ ପ୍ରଡକ୍ଟକୁ ସାମ୍ନାକୁ ଆଣୁଛି । ଏହାସହ ଆଲପାମାୟୋ ନାମକ ଏକ ଏଆଇ ଟୁଲକୁ ମଧ୍ୟ ଉନ୍ମୋଚିତ କରାଯାଇଛି । ଏହା କାରକୁ ସ୍ୱୟଚାଳିତ କରିବା ପାଇଁ ଅନେକ ସାହାଯ୍ୟ କରିବ । ଖାଲି ଏତିକି ନୁହେଁ ଡ୍ରାଇଭର ଭଳି ଛୋଟରୁ ଛୋଟ ଘଟଣା ଉପରେ ନଜର ରଖିବ । ଅଧିକ ଟ୍ରାଫିକରେ ଗାଡି ଯେପରି ଆଉ କାହା ସହ ଧକ୍କା ନହୁଏ ଏବଂ ଓଭରଟେକିଂରେ ଯେପରି ଅସୁବିଧା ନହୁଏ ତାହାର ସମାଧାନ ଆଲପାମାୟୋ କରିପାରିବ ।

କମ୍ପାନୀର ସିଇଓ ଜାନସେନ୍ ହୁଆଙ୍ଗ୍ କହିଛନ୍ତି ଯେ, ଆଜି ସେମାନେ ଆଲପାମାୟୋକୁ ଦୁନିଆ ଆଗରେ ରଖୁଛନ୍ତି । ଏହା ବିଶ୍ୱ କାର୍ ଡ୍ରାଇଭିଂରେ ବିପ୍ଳବ ଆଣିବା ପାଇଁ ପ୍ରସ୍ତୁତ ରହିଛି । ଯାହା ସ୍ୱୟଂଚାଳିତ କାରକୁ ନୂଆ ଦିଗ ଦେବ । ଅର୍ଥାତ ଆଗାମୀ ଦିନରେ ମେସିନମାନେ ମଣିଷ ଭଳି ଭାବି ପାରିବେ । ନିଷ୍ପତ୍ତି ନେଇପାରିବେ ।

ଆଲପାମାୟୋ କ’ଣ ?

ଆଲପାମାୟୋ ମଡେଲ୍ ଏବଂ ଟୁଲ୍ସ ଆପେ ଆପେ ଚାଲୁଥିବା ଯାନ ପାଇଁ ସହାୟକ ହେବ । କାରରେ ମଣିଷର ମସ୍ତିସ୍କ ରହିବା ଭଳି ଏହା କାମ କରିବ । ମଣିଷମାନେ ଯେପରି ଭାବିପାରନ୍ତି ତାହା କାର୍ ମଧ୍ୟ ବିଚାର କରିପାରିବ । ଟ୍ରାଫିକରେ କେତେ ସ୍ପିଡ୍ ରହିବ, କେତେବେଳେ ବ୍ରେକ୍ ଦିଆଯିବ, କେତେ ଦୂରତାରୁ ଓଭରଟେକ୍ ହେବ ତାହା ଆଲପାମାୟୋ ଏଆଇ ଟେକନୋଲୋଜି ସାହାଯ୍ୟରେ ସମ୍ଭବ ହୋଇପାରିବ ।